Регион
Харадинај: Акцијата не е поврзана со политичките настани
Косовскиот премиер, Рамуш Харадинај, се огласи на „Фејсбук“ за акцијата на специјалната единица на косовската полиција РОСУ во Косовска Митровица. Тој напиша дека ацијата била во целосна согласност со законот и дека не е поврзана со каков било политички настан.
Харадинај ги повика граѓаните, политичките субјекти и градоначалниците да придонесат за одржување на јавниот ред.
„Денес, по налог на косовското специјално обвинителство, на северот во Косово е спроведена полициска операција за апсење осомничени за убиството на политичарот Оливер Ивановиќ. Полициската акција беше во согласност со законот и спроведена по наредба на специјалното обвинителство и на никаков начин не е поврзана со политичките настани. Ги уверувам сите граѓани дека потезите на Косово никогаш нема да бидат насочени против која било етничка или политичка група. Ги повикувам граѓаните, политичките субјекти, градоначалниците, особено на северот, да придонесат за одржување и унапредување на јавниот мир во служба на мирот и стабилноста. Важно е никој да не потпадне под влијание на разните дезинформации. Одржувањето на редот и почитувањето на законите е во интерес на сите во Косово“, напиша Харадинај на „Фејсбук“.
Владата на Косово соопшти дека акцијата во северниот дел на Косовска Митровица е поврзана со истрагата за убиството на лидерот на СДП, Оливер Ивановиќ, и дека не е насочена против ниту една заедница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Нови детали за малата Данка: нејзината ДНК не била пронајдена на автомобилот со кој била удрена
Како што пренесува „Нова.рс“, на ниеден од предметите што биле земени за помош во истрагата не биле пронајдени биолошки траги од двегодишната Данка Илиќ од Србија.
Српскиот портал напиша дека досега се пронајдени повеќе од 400 траги во службеното возило за кое се сомневаат дека го користеле Дејан Драгојевиќ и Срѓан Јанковиќ кога, според нивното признание, го удриле девојчето. Обвинителството пред неколку дена ги доби резултатите од новите вештачења.
„Од внатрешноста на службениот автомобил во Бор се земени повеќе од 500 траги, како и траги од надворешната страна на автомобилот. Досега вештачењата покажаа дека нема трага од ДНК на Данка Илиќ ниту во самиот автомобил ниту на надворешните делови од возилото“, пишува „Нова.рс“ повикувајќи се на Вишото јавно обвинителство.
Медиумот потсетува дека осомничените работници на фирмата „Водовод“ од Бор, Јанковиќ и Драгијевиќ, биле на работна задача на 26 март кога во Бањско Поле исчезна двегодишно девојче. Според признанието на Драгијевиќ, девојчето го удриле со службеното возило, го задавиле и го фрлиле на дива депонија, од каде што два дена подоцна Дејан со својот татко (73) и сега починатиот брат Далибор (40) наводно го преселиле телото на друга, непозната локација.
Телото на двегодишната Данка сè уште не е пронајдено.
Регион
Се урна конструкција на рингишпил, повредени 13 деца, од кои едно е во животна опасност во Куршумлија
Во Куршумлија денеска се случила несреќа кога на локалниот саем се урнала конструкцијата на рингишпилот, пренесуваат српските медиуми.
Според написите, повредени се 13 деца, од кои едно потешко.
Станува збор за девојче, чиј живот е во опасност и има сериозни повреди на главата и ‘рбетниот столб.
Таа била итно префрлена во КЦ „Ниш“ на Одделот за неврохирургија.
Седум деца се во друга болница, каде што во тек е понатамошна дијагностика, а другите деца се полесно повредени, пишуваат тамошните медиуми.
Регион
Шји Џјинпинг: Србија е првата земја од Европа со која ќе изградиме заедница со заедничка иднина
Претседателот на Народна Република Кина, Шји Џјинпинг, изјави дека во денешните разговори со претседателот Вучиќ е постигнат значаен консензус и дека Србија ќе биде првата земја од Европа со која ќе изгради заедница со заедничка иднина.
„Заеднички објавивме дека ќе изградиме заедница меѓу Кина и Србија со заедничка иднина во новата ера, што ќе отвори ново поглавје во историјата на кинеско-српските односи. Пред осум години Србија стана првиот сеопфатен стратешки партнер на Кина во Централна и Источна Европа, а денеска станува првата европска земја во која ќе изградиме заедница со заедничка иднина“, рече Шји во говорот по размената на потпишаните меѓудржавни договори меѓу Србија и Кина во Палатата „Србија“.
Тој посочи дека како вистински пријатели и добри партнери Кина и Србија уживаат политичка доверба, која е силна како карпа.