Речиси една петина од луѓето што ги регрутираат руските специјални служби за задачи во Украина се малолетници, кои биле користени за подготовка на саботажа или терористички напади, изјави портпаролот на Службата за безбедност на Украина (СБУ), Артем Дехтаренко, во коментар за „Укринформ“.

„Русите за своите задачи најмногу регрутираат малолетници, невработени и луѓе со разни видови зависности. Според нашата статистика, 22 отсто од откриените сторители се малолетни, 55 се невработени, а другите се лица со криминално досие за разни кривични дела“, рече Дехтаренко.

Дехтаренко објасни дека малолетниците се поподложни на психолошка манипулација бидејќи младите не се во можност целосно да ги проценат последиците од своите постапки.

Портпаролот истакна дека подметнувањето пожари врз возила на украинските вооружени сили и саботажи на железницата се интензивирале во мај 2024 година, а масовното регрутирање деца за организирање експлозии почнало на почетокот на 2025 година.

„Од почетокот на 2025 година руските специјални служби повторно покажаа дека немаат црвени линии и дека се префрлија на терористички напади со употреба на експлозиви. Тие регрутираат, меѓу другото, тинејџери за такви злосторства“, рече Дехтаренко додавајќи дека најмладите извршители на руските наредби откриени од СБУ за време на палењето на канцелариите на Укрзалиц имле само 13 години.

Дехтаренко изјави дека, според податоците на Службата за безбедност на Украина, само во 2025 година СБУ и Националната полиција откриле повеќе од 50 малолетници, кои по наредба на Руската Федерација учествувале во терористички напади, палење автомобили и други злосторства.

Претседателката на Европската комисија, Урсула фон дер Лајен, утрово разговараше со кинескиот премиер Ли Кијанг. Европската комисија објави соопштение за медиумите.

„Како одговор на широкото нарушување предизвикано од американските царини, претседателката Фон дер Лајен ја нагласи одговорноста на Европа и на Кина како два најголеми пазара во светот да поддржат силен реформиран трговски систем, слободен, фер и заснован на еднакви услови“, се вели во соопштението.

„Претседателката повика на договорено решение на актуелната ситуација нагласувајќи ја потребата да се избегне понатамошна ескалација“, се посочува.

Се додава дека Фон дер Лајен и Ли ја допреле клучната улога на Кина во справувањето со потенцијалното трговско пренасочување предизвикано од царините.

Јужнокорејската армија лансира предупредувачки истрели откога севернокорејските војници денеска ја преминаа границата, соопшти Сеул.

Во соопштението се наведува дека десетина севернокорејски војници се вратиле на Северот откако Јужна Кореја емитувала предупредувања и лансирала предупредувачки истрели. Се додава дека севернокорејските војници ја преминале воената демаркациска линија на источниот дел на границата околу 17 часот по локално време.

Има повремени инциденти на силно утврдената граница меѓу двете Кореи, наречена демилитаризирана зона. Мотивот за преминување на границата денеска не е познат.

Непријателството меѓу Кореите останува на високо ниво. Сеул е незадоволен бидејќи севернокорејскиот лидер Ким Џонг-ун продолжува да се фали со нуклеарни капацитети и да застане на страната на Русија во војната против Украина. Ким исто така ги игнорира повиците од Сеул и Вашингтон за продолжување на преговорите за денуклеаризација.

Од инаугурацијата на 20 јануари американскиот претседател Доналд Трамп рече дека повторно ќе допре до Ким за да ја оживее дипломатијата. Северна Кореја не одговори на предлозите на Трамп и на тврдењата дека американските непријателства против неа се продлабочиле по инаугурацијата на Трамп.