Македонија
Шекеринска: Членството во НАТО ќе помогне, но нема да ги реши сите наши проблеми

Министерката за одбрана, Радмила Шекеринска, ја отвори дебатата со наслов „Помеѓу фактите и фикцијата – што ќе донесе пристапувањето на Македонија во НАТО“, во организација на Институтот за европска политика.
На неа беа презентирани и два независни истражувачки труда за ефектите од пристапувањето на нашата држава во алијансата.
Шекеринска на почетокот од своето воведно обраќање го изрази задоволството од соработката на државните институции со граѓанскиот сектор и истакна дека Владата цврсто верува оти државата може да стане подобро општество, поинтегрирано и попросперитетно преку членството во НАТО и ЕУ.
„Неподелен е ставот помеѓу сите 29 членки на НАТО дека Македонија е подготвена да стане 30. земја членка. И тоа е нешто со што треба да се гордееме затоа што оваа држава многу бргу успеа да го надомести загубеното. Меѓутоа, се разбира, процесот ќе зависи од завршување на процесот на уставните измени и од пораките што ќе ги испраќа РМ за целиот период на ратификација“, рече министерката на отворањето на дебатата.
Таа додаде дека сепак не треба да се чека НАТО-членството да ги реши сите наши проблеми, туку дека тоа е процес на растење, трансформација и подобрување на државата.
„На крајот, сè ќе зависи од нашите сили, сè ќе зависи од нашиот капацитет и моќ на граѓаните да им обезбедиме подобри шанси за живот“, посочи Шекеринска.
Симонида Кацарска, директорката на Институтот за европска политика, рече дека членството во НАТО ќе донесе зголемен развој и прилив на инвестиции.
„Базирајќи се на искуствата на другите земји што пристапиле во НАТО во изминатите 10-ина години, она што може да очекуваме е секако зголемен развој, зголемен прилив на странски директни инвестиции, меѓутоа со една нота на внимателност дека голем дел од тие очекувања и ефекти всушност ќе зависат од нас самите, од спроведувањето на домашните реформи и дали ќе можеме да ги оспособиме домашното стопанство и економијата“, истакна таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уште еден случај на семејно насилно – скопјанец со возило се обидел да ја прегази сопругата, па ја истепал

Уште еден случај на семејно насилство во Скопје, сопруг се обидел да ја прегази сопругата со автомобил, кога не успеал, ја истепал.
Јавен обвинител од Основното јавно обвинителство Скопје поведе постапка против едно лице за кривично дело – Телесна повреда.
„При вршење семејно насилство осомничениот 41-годишник телесно ја повредил неговата сопруга. Најпрво, во алкохолизирана состојба, ја натерал веднаш да одат и од банкомат да извадат пари од нејзината плата за да купи дрога. Оштетената го послушала, но враќајќи се назад кон нивниот дом, тој започнал вербална расправија, го запрел возилото и и кажал да излезе. Откако излегла, започнал да го врти возилото со намера да ја удри.
Бидејќи не успеал, го запрел возилото, тргнал кон оштетената по што и го одзел мобилниот телефон за да провери со кого разговарала. Во еден момент и физички ја нападнал, удирајќи и шлаканица и нанесувајќи и удари во пределот на лицето и вратот, од кои удари оштетената се здобила со телесни повреди изразени во вид на нагмечувања на лицето, на вратот и на раката“, соопшти Обвинителството.
Ценејќи ги сите околности, јавниот обвинител до судијата на претходна постапка предложи да определи мерка на претпазливост – забрана за осомничениот да се приближува или воспоставува, односно одржува контакти или врски со жртвата.
Македонија
ВМРО-ДПМНЕ со една реченица одговара на честитката од Заев до Ципрас: Она со кое паметниот се срами, недоветниот се гордее

ВМРО-ДПМНЕ му одговара на честитката на Заев до Ципрас по повод Преспанскиот договор во една реченица.
„Зоран Заев упати честитка до Алексис Ципрас по повод седумгодишнината од Преспанскиот договор. Одговорот е само еден: она од кое паметниот се срами, недоветниот се гордее“, се наведува во соопштението на ВМРО-ДПМНЕ.
Заев му честиташе на Ципрас за седумгодишнината од договорот потпишан на 17 јуни 2018 година во Преспа, кој овозможи членство на Северна Македонија во НАТО.
Договорот го потпишаа тогашните министри за надворешни работи на Македонија и Грција, Никола Димитров и Никос Коѕијас, во присуство на тогашните премиери Зоран Заев и Алексис Ципрас, посредникот во преговорите, Метју Нимиц, поранешниот еврокомесар за проширување, Јоханес Хан, поранешната висока претставничка на ЕУ за надворешна политика и безбедност, Федерика Могерини, и други високи меѓународни претставници, како и претставници на двете земји.
Македонија
Владата ја усвои новата стратегија за конфискација на незаконски стекнат имот

Со задоволство информирам дека на денешната седница на Владата беше усвоена Стратегијата за зајакнување на капацитетите за финансиски истраги и конфискација на имот за периодот 2025–2028, заедно со Акцискиот План, изјави вицепремиерот за добро владеење, Арбен Фетаи.
„Овој документ ја одразува непоколебливата посветеност на Владата на Република Северна Македонија за борба против организираниот криминал и корупцијата, преку зајакнување на надлежните институции со структуриран и систематски пристап, кој има за цел зголемување на ефикасноста при конфискацијата на незаконски стекнат имот“, рече тој.
Една стратегија, додаде Фетаи, колку и да е добра, останува само документ доколку не се спроведува ефикасно.
„Поради тоа, ги зајакнуваме механизмите за следење и надзор, преку основање на Националниот совет за финансиски истраги и конфискација на имот, кој ќе обезбеди успешно спроведување на утврдените цели“, рече тој.
Кабинетот на заменик-претседателот на Владата задолжен за политики за добро владеење ќе има централна улога во координирањето и поддршката на овие напори, обезбедувајќи постојана посветеност за реализација на оваа стратегија.