Свет
Мигрантка вработена кај Трамп: Уморна сум од навреди и злоставувања

Илегална мигрантка која работела како чистачка во голф клубот на американскиот претседател Доналд Трамп, раскажува дека во клубот има вработени голем број мигранти. Викторина Моралес за „Њујорк тајмс“ раскажува дека повеќе од пет години ги местела креветите на Трамп, му ги чистела тоалетите, како и трофеите кои ги добивал на голф турнирите, пишува „Њујорк тајмс“.
Моралес (45), која во САД дошла илегално уште во 1999 година, рекла дека не е единствена која е вработена во клубот на Трамп. Покрај неа има и други илегални мигранти. Една од нив е и Сандра Дијаз, со потекло од Костарика, сега легално престојува во САД, но од 2010 до 2013 година работела во Бедминстер како чистачка, во период кога немала пријавен и одобрен престој.
„Тој е многу педантен во се. Ако стигне ненајавен, сите полудуваат. Трамп испитува се и коментира“ рекла Дијаз. Додала дека еднаш кога тој бил задоволен со нејзината работа, и` дал 100 долари.
Моралес ја повредиле коментарите на Трамп, откако станал претседател, во кои ги изедначил мигрантите од Латинска Америка со насилните криминалци.
„Коментарите беа еднакво злобни како оние кои ги слушав на работа. Надзорникот ме злоставуваше со коментари за мојата интелегенција и миграцискиот статус“ рекла Моралес.
„Уморна сум од злоставувања, навреди и начини на кои Трамп зборува за нас, додека ние работиме за тој да заработи пари. Се потиме за да ги исполниме неговите потреби и замисли и треба да трпиме понижувања“ додала таа. Моралес на работа во БЕдминстер заработува 13 долари на час.
Моралес и Дијаз проговориле за „Њујорк тајмс“ во договор со нивната адвокатка Анибал Ромер, која ги застапува на суд за миграциски прашања. Моралес е свесна дека поради разговорот со новинари би можела да биде депортирана, па поднела барање за азил. Во тек е и тужба за злоставувања и дискриминација на работното место.
Од голф клубот на Трамп не сакаа да коментираат премногу за тврдењата на двете вработени.
„Имаме десетина илјади вработени и многу строга селекција кај вработувањата. Ако некој дал лажна документација, ќе добие моментален отказ“ стои во нивниот одговор. Белата куќа воопшто не дала коментар за овој случај.
Трамп во неговата кампања тврдеше дека со сите сили ќе забрани илегален влез на мигранти и нивно вработување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон: Промената на режимот во Иран би довело до хаос

Францускиот претседател, Емануел Макрон, изјави на самитот на Г7 во Канада дека промената на воениот режим во Иран би била голема грешка, јавуваат „Ројтерс“ и АФП.
„Промената на режимот би довело до хаос“, изјави Макрон пред новинарите во Алберта, нагласувајќи дека земјите треба да се вратат на разговорите за нуклеарната програма на Иран.
„Верувам дека ни требаат Соединетите Американски Држави да ги вратат сите на преговарачката маса“, рече Макрон.
Свет
Голема акција во Израел: планира да врати 150.000 свои државјани во земјата

Израел подготвува воздушен и поморски транспорт за да ги врати дома своите граѓани заглавени во странство по нападот врз Иран во петокот и затворањето на неговиот воздушен простор, објави министерката за транспорт.
„Првиот чекор беше да се испратат сите израелски авиони во странство за да се спречи нивно оштетување, бидејќи тогаш немаше да имаме никакви средства за репатријација на луѓето. Тој чекор е завршен. Следниот чекор е постепено враќање на Израелците“, рече Мири Регев за време на посетата на местото на иранскиот напад во центарот на земјата.
„Има помеѓу 100.000 и 150.000 Израелци во странство“, рече министерката, додавајќи дека нејзината канцеларија отворила морска рута од Кипар и Грција.
Израелската авиокомпанија „Ел Ал“, која објави прекин на сите летови во петокот, во вторникот соопшти дека се подготвува за летови за спасување почнувајќи од среда.
Авионите на „Ел Ал“ ќе полетаат од Ларнака на Кипар, Атина, Рим и Милано во Италија и Париз, рече таа.
Израелскиот нискобуџетен превозник „Аркија“ исто така најави специјални летови почнувајќи од среда за да ги врати Израелците дома. Авионите на „Аркија“ ќе полетаат од Кипар, Грција и Црна Гора, се вели во соопштението.
Израел започнанапад врз Иран на 13 јуни, таргетирајќи стотици воени и нуклеарни цели, со цел, велат властите, да ја спречи земјата да развие атомска бомба. Иран постојано негира каква било таква намера.
Свет
Британскиот министер за одбрана: Единствениот пат до траен мир е дипломатско решение

Британскиот министер за одбрана, Џон Хили, изјави дека влошувањето на безбедносната ситуација на Блискиот Исток претставува опасен момент за целиот регион.
Тој нагласи дека Велика Британија продолжува да го поддржува правото на Израел на безбедност и дека има сериозна загриженост во врска со нуклеарната програма на Иран.
Сепак, Хили повика на воздржаност од сите страни и рече дека единствениот пат до траен мир е дипломатско решение, а не воена ескалација.
Тој додаде дека во регионот пристигнале дополнителни британски воени ресурси, вклучувајќи борбени авиони „Тајфун“ распоредени во RAF Акротири на Кипар, за да го заштитат британскиот воен персонал кој сега е во состојба на висока готовност.
На прашањето дали е загрижен за можноста САД директно да се вклучат во израелските напади врз Иран, со оглед на пристигнувањето на дополнителни американски борбени авиони, Хили одговори дека сегашниот американски претседател Доналд Трамп сè уште ги предводи повиците до Техеран да се согласи на договор.
Тој го опиша зголеменото воено присуство на Велика Британија и САД како порака до Иран дека дипломатскиот пат е единственото решение за сегашната криза.