Хуманитарно трчање за подигање на свеста за постоењето на ретката белодробна болест – пулмонална хипертензија. Трката ќе се одржи в недела и ќе почне во 9 часот од плоштадот во Струмица, а финиш-линијата е во Гевгелија, со должина на патеката од 50 километри.

Трасата води од Струмица преку Валандово, Богданци и се очекува да заврши околу 14.30 часот на плоштадот во Гевгелија. Велосипедскиот клуб „Актив“ од Струмица и Здружението асоцијација за пулмонална хипертензија „Момент плус“ го организираат првото хуманитарно трчање по овој повод кое ги поврзува овие два града, со наслов „Трчаме со Николчо“.

Трчањето е во чест на гевгеличанката Ѓургица Ќаева, како и на сите пациенти што страдаат од оваа болест.
Маратонeцот предводник е Николчо Ѓоргиев, кој често ја поддржува оваа иницијатива на сите маратони што ги трча со носење маичка со логото и мотото на Здружението: „Остани без здив“.

Досега се пријавени 32 учесници кои ќе се приклучуваат од разни точки по трасата.

Белодробна артериска хипертензија (ПАХ) е прогресивна болест предизвикана од стеснување на белодробната артерија што ги поврзува десната страна од срцето со белите дробови. Пулмоналната хипертензија е сериозно заболување кое прогресивно се влошува со тек на време и понекогаш завршува фатално. Иако пулмоналната хипертензија не е излечлива болест, третманот што постои ги олеснува симптомите и го подобрува квалитетот на живот.

Во Македонија постојат 15 регистрирани случаи на оваа болест за која малку се знае. Со цел подигање на свеста за постоењето и борбата на болните, буквално секојдневно за здив, Велосипедскиот клуб „Актив“, Струмица, и Здружението асоцијација за пулмонална хипертензија „Момент плус“ го организираат овој настан со поддршка на Општина Струмица и Општина Гевгелија.

Со мотото „Остани без здив“, Здружението асоцијација за пулмонална хипертензија „Момент плус“ ги продолжува своите активности и во 2019 година за подигање на свеста за оваа ретка болест.