Македонија
Сите креваат раце, ДУИ молчи за законот за пратенички привилегии

Пратеницте или се откажаа или чекаат погоден момент да го протуркаат законското решение за уживање привилегии откога ќе им истече мандатот. Предлог-законоското решение, со кое се предвидува пратениците по завршувањето на функцијата, да се вработат во државната администрација, засега никој не го видел, сите пратенички групи се оградуваат од него. „Макфакс“ побара да го види написмено текстот што треба да го поднесе ДУИ заедно со независните на ВМРО-ДПМНЕ. Собраниските служби информираат дека засега нема пристигнат таков предлог.
„Нема пристигнат предлог-закон или слично законско решение во Собранието. Може ќе го поднесат подоцна затоа што првин треба да се разгледа на владина седница. Кога тамуќе заврши процедурата, би требало да дојде кај нас“, брифираат од Собранието.
Законот за пратеничките бенефиции го нема ниту во Владата. Од таму информираа дека таков закон не е поднесен, ниту е ставен на дневен ред на владина седница.
Во меѓувреме, откако викендов во медиумите беа прозвани како предлагачи заедно со ДУИ, независните на ВМРО-ДПМНЕ на прес-конференција во собранието се оградија од предлог-законот. Зекир Рамчиловиќ ги отфрли информациите дека осумте пратеници од неговата група се иницијаторите.
„Сакаме да ја информираме јавноста дека ние како група ниту сме мислеле ниту сме иницирале некој закон за пратеници, сме се ангажирале за актуелните важни теми, за реформите и интеграциите“, рече Рамчиловиќ.
Иако се оградија, на затворената седница за реформските закони, според наши извори, независните барале овој закон да се протурка со група од 15 закони како услов да гласаат за СЈО и уставните измени.
Бурни реакции во јавноста следуваа кога претседавачот на групата за реформи, Реџаил Исмаили, потврди дека на седницата имало дебата и за таква идеја, но не потврди чија е иницијативата и дали тие стојат зад неа.
„Има предлог од некои пратеници, но додека не се хармонизира со Владата, не можам да ви кажам детали“, изјави тогаш Исмаили.
Од ДУИ денеска не се огласија. Ниту демантираат ниту потврдуваат. Во отсуство на нивен став остана уште една дилема: дали Исмаили од ДУИ беше само гласник или навистина тие стојат зад идејата.
И пратениците на СДСМ се тргнаа на страна од закнот. За пратеничката група на ВМРО-ДПМНЕ, пак, поднесувањето вакво законско решение било со цел да се дефокусира јавноста од актуелните теми важни за државата.
Ова не е првпат претенците преку закон да си бараат бенефиции. Во 2005 беше изгласан Закон што им овозможуваше предвремено пензионирање, но со одлука на Уставниот суд тој падна во вода. Четири години подоцна ВМРО-ДПМНЕ и СДСМ прифатија предлог-верзија на закон за вработување во администрацијата по завршувањето на пратеничката функција, но под притисок на јавноста и ова инцијатива пропадна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.