Во кривичниот суд денеска со изведување на материјални докази продолжи судење за смртта на 20-годишниот член на навивачката група „Комити“, Никола Саздовски.

Обвинителот Анел Фидовски од Јавното обвинителство како докази ги изведе извештајот и анализата од Крим-техника, извештај од вештачење, анализа од трага од биолошко потекло, извештај од дактилографска анализа, документација од патничко моторно возило „мерцедес“ со кое обвинетите пристигнале на местото каде што бил претепан Саздовски, психијатриско вештачење, вештачење од Институт за судска медицина и криминалистика, писмен извештај за извршена обдукција и цеде со видеозапис од автомобилот и препознавање на обвинетите.

Адвокатите на обвинетите, Бесир Беља и Скендер Демири, Насер Рауфи и Асмир Алиспахиќ, имаа забелешки на изведените материјални докази од страна на јавниот обвинител во поглед на видеозаписите од доставеното цеде. Нивната забелешка беше во поглед на начинот на кој овој доказ беше изнесен пред судот, односно дека видеозапис не може да биде изнесен со говор.

Адвокатот на семејството на Никола Саздовски, Ванчо Шехтански, побара од судот да обезбеди докази од одделението за дигитална форензика на МВР, да се издадат посебни електронски истражни мерки на компјутерскиот систем и телефоните на Никола Саздовски и обвинетите Бесир Беља, Скендер Демири, како и на Јетон Љужа, кој во моментов е во бегство.

Судот даде петнаесетминутна пауза по што ќе одлучи дали ќе го уважи ова барање на адвокатот Шехтански.