Регион
Цакалотос: Договорот првпат овозможува реструктуирање на грчкиот долг
Грчкиот министер Евклид Цакалотос им порача во средата на пратениците во грчкиот парламент дека договорот постигнат изминатиот викенд со челниците на еврозоната за решавањето грчката должничка криза, е тежок за прифаќање но и дека истовремено ја отворил вратата за реструктуирање на грчкиот долг.
Евклид Цакалотос, кој по референдумот од 5-ти јули кога беше одбиен планот на доверителите на должноста министер за финансии го замени Јанис Варуфакис, истакна дека пред неколку месеци грчките партнери дури не сакале воопшто да разговараат за реструктуирање на долгот, но новиот договор осигурил јасна обврска за тоа прашање да се разговара по првите анализи.
„Тоа е тежок договор и само времето ќе покаже дали е одржлив. Содржи мерки против рецесијата, коишто, под одредени услови и доколку проблемот со долгот биде решен и доколку пости план за инвестиции, и доколку луѓето со оптимизам гледаат дека излегувањето од еврозоната е зад нас тогаш може да донесе раст“, рече Цакалотос, кого го цитира агенцијата ANA.
„Кога ќе бидат довршени преговорите за три до четири седмици, ќе го анализираме договорот и секогаш ќе го имам предвид средниот слој од населението кој многу патеше“, изјави Цакалотос на заедничката седница на надлежните парламентарни комисии во кои членуваат околу 200 пратеници.
Законските предлози прво ги разгледуваат надлежните комисии на заедничка седница, на којашто присуствуваа повеќе од половината пратеници во грчкиот парламент, а потоа во средата ќе се одржи пленарната седница на парламентот на која ќе мора да биде усвоен реформскиот пакет.
Грчкиот парламент мора да усвои низа закони кои се предуслов за отпочнување на преговорите за третиот пакет меѓународна финансиска помош за земјата. Законските предлози за промените на серија даноци, како и на пензискиот систем, треба да овозможат раст на буџетските приходи за 3,175 милијарди евра на годишно ниво.
Владата во Атина проценува дека најголемиот приход ќе го донесе зголемувањето на стапката на данокот на додадена вредност (ДДВ), вкупно 2,39 милијарди евра годишно, а другиот дел од очекуваните буџетски приходи би дошол од зголемувањето на данокот на осигурување, данокот на добивка, данокот на луксузни стоки, на бродовите поголеми од пет метри, како и на посилните моторни возила, како и од дополнителните даноци за оние со примања поголеми од 30.000 евра, дознава грчката новинска агенција.
Грчкиот премиер Алексис Ципрас порача во вторникот вечерта во интервјуто за јавната телевизија ERT, дека договорот што изминатиот викенд беше постигнат со челниците на еврозоната, мора да биде спроведен па дури и да станува збор за едностран потег на Грција. Порача дека договорот, иако како што истакна ѝ наметнат на Грција, мора да се спроведе, бидејќи ја спасува од излегувањето од еврозоната,
Ципрас се соочува проблеми во редовите на пратеничката група на неговата владејачка коалиција на радикалната левица Сириза, од којашто 30 до 40 пратеници може да се одметнат, дознава агенцијата Reuters. Оттаму, му е неопходна поддршката од партиите коишто ја сочинуваа претходната влада, конзервативната Нова демократија, и другите кои се сметаат за проевропски, бидејќи за изгласување на пакетот му се потребни 151 глас од вкупно 300-те пратеници. „Болна е вистината дека ова за Грција е еднонасочна улица по која мора да оди“, рече премиерот во споменатото телевизиско интервју.
Испитувањата на јавното мнение покажуваат дека тесно мнозинство Грци сепак сметаат дека е постигнат позитивен договор. Според анкетата која во вторникот објави весникот TO BHMA, 51,5 отсто од испитаниците веруваат дека договорот кој владата го постигна со меѓународните доверители е позитивен, а уште поголем процент веруваат дека парламентот треба да го потврди. Дури 72 отсто сметат дека нема алтернатива за договорот и 70,1 проценти веруваат дека пратениците треба да го изгласаат./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Ужас во Загреб: пронајдено тело во автомобил во одводен канал
Граѓани попладнево во одводен канал во Загреб пронашле возило со тело на непознато лице, соопшти полицијата.
Повикот во полиција стигнал нешто по 13 часот.
Полицијата набрзо пристигнала на локацијата меѓу Антуновац и Тења и потврдила дека лицето во возилото починало, пишува Вечерњи лист.
Истрагата е во тек.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.