Македонија
(Видео) Сотирова-Бухова: Нема ниту едно невакцинирано дете во градинките

Ниту едно дете кое не примило МРП-вакцина не е затекнато во државните ниту во приватните градинки, тврди директорката на Државниот здравствен и санитарен инспекторат, Ирина Сотирова-Бухова. Таа уверува дека тимовите на инспекторатот се на терен и за изминативе 48 часа колку што поминаа од прогласувањето на епидемијата од морбили, констатирале дека се почитува забраната за прием на невакцинирани деца.
„Со сосема точна сигурност ќе ви кажам дека денеска се пројдени апсолутно сите приватни градинки во Скопје, и тоа по 4 во Центар и Кисела Вода и 6 во Карпош. Во ниту една нема забележано дека е примено дете на чување, ниту вчера ниту во текот на денешниот ден, кое не е вакцинирано со МРП-вакцината“, вели д-р Бухова.
Во однос на опасноста од ширење на заразата и во игротеките или затворените трговски центри каде што најчесто се движат децата, Бухова вели дека засега проценките на центрите за јавно здравје се дека нема потреба да се наложат нови вонредни мерки за превенција.
„За движење во затворени простори и организирани групни збиднувања, сè уште проценката на центрите за јавно здравје и епидемиолошката анализа не укажува на тоа дека можеби ќе треба нови задолжителни мерки. Меѓутоа, состојбата се следи во континуитет и ако има потреба, ќе се наложат“, додава Бухова.
Според податоците од Министерството за здравство, во изминатите два дена нема нови заболени од морбили, а речиси 1 000 деца примиле МРП-вакцина. Вакциналните пунктови во поликлиниките во Скопје работат и втора смена, а здрваствените власти постојано апелираат да се имунизираат сите деца бидејќи МРП-вакцината е задолжителна.
Во меѓувреме, група родители кои одбиваат да ги вакцинираат децата најави граѓанска непослушност и протести против мерките на здравствените власти за спречување на епидемијата со мали сипаници.
Од градинките ги враќаат родителите кои не ги вакцинирале своите деца, иако, според информации на „Макфакс“, дел од приватните градинки вчера правеле отстапки за родителите кои немале каде да ги остават на чување децата. Лекарите појаснуваат дека во услови на епидемија личното право не може да биде над колективното и државата во овој случај го штити интересот на мнозинството од населението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.