Македонија
Судот одново ќе утврдува дали МАН ги наклеветил Фросина Ременски и сопругот

Апелационите судии Лидија Димчевска, Суад Алиу и Афрдита Шеху Асани ја укинале пресудата на Основниот суд Скопје 2 кој утврди одговорност за сторена клевета врз ексминистерката за труд и социјална политика Фросина Ташевска Ременски и нејзиниот сопруг Јовче Ременски од Македонската асоцијација на новинари, за текст пренесен од електронско издание на весникот „Вечер“ и други медиуми.
Во пресудата на скопска Апелација пишува дека обжалената пресуда на првостепениот суд е нејасна, неразбирлива, не содржи доволно образложени причини за решителните факти од кои судот се раководел при одлучувањето. „Во оваа смисла, основани се жалбените наводи дека првостепениот суд сторил суштествена повреда со тоа што во текот на постапката доставата на поканите до тужениот не била вршена согласно со одредбите од ЗПП, па не е јасно од каде првостепениот суд ценел дека тужениот е уредно викан за расправите пред судот, како што утврдил на страна 8 од образложението на првостепената пресуда“, пишува во пресудата.
Станува збор за текстот под наслов „МАН до СДСМ и нивните функционери: Престанете со притисоци и закани кон новинарите“, објавен во повеќе медиуми кои, според образложението на судијата Нухи Рустеми од Основниот суд Скопје 2, содржи невистинити факти штетни за честа и угледот на тужителот.
Во текстот пишуваше: „Ф.Р. актуелна министерка за социјала и труд, потпретседателка на С. како и сопруга на висок полициски функционер, унапреден надвор од законската процедура, по стапувањето на функција на нејзиниот партиски колега О. С., преку својот фејсбук-профил повторно се обрати со закани, овој пат до главната уреднична на дневниот весник В., И. Т. за пишување во нејзиниот текст „Досие: Кој и за што му ги дал прислушуваните разговори на З. Б.“. Но според заканите на Ф.Р., таа има своја или партиска архива на прислушувани разговори и истите ги користи за јавни закани кон новири. Овој факт е особено опасен затоа што, патем таа е и сопруга на висок полициски функционер кој е директно вмешан во незаконска дистрибуција на таквите прислушувани разговори“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обвинителството бара да се продолжи притворот на осомничените за пожарот во Кочани

Основното јавно обвинителство Кочани побара од Судот да се продолжи притворот за сите осомничени во истрагата за пожарот во дискотеката „Пулс“ во Кочани што се случи на 16 март, а во кој загинаа 61 лице, а повеќе од 100 се повредени. За тројца од осомничените, Обвинителството бара мерката притвор да се замени со куќен притвор.
„Во текот на денешниот ден до Основниот суд Кочани достави предлози за продолжување на мерките за обезбедување – притвор и куќен притвор за сите осомничени во истрагата за пожарот во кочанската дискотека. Само за тројца осомничени, согласно фазата на обезбедување докази и исполнетоста на законските основи се предлага замена за мерката притвор во куќен притвор. Тоа се двајца осомничени од Државниот пазарен инспекторат и еден припадник на обезбедувањето на дискотеката“, соопштија од Обвинителството.
Од таму додаваат дека продолжуваат истражните дејствија во повеќе правци и во неколку институции со цел испитување на евентуална одговорност, за што јавноста ќе биде известена веднаш по донесувањето на соодветна јавнообвинителска одлука.
Македонија
Во недела посебен сообраќаен режим во Скопје

СВР Скопје известува дека 13.04.2025 (недела) со почеток во 10.00 часот, поради одржување на улична трка, Единицата за безбедност на патниот сообраќај ќе преземе мерки за посебен режим на сообраќајот.
Трасата на движење ќе започне од бул.„Илинден“ пред фонтана Лотус (старт и цел) право долж бул.„Илинден“ до крстосница со бул.„8-ми Септември“ каде се врти полукружно назад по бул.„Илинден“ до целта фонтана Лотус, при што сообраќајот ќе се пренасочува по околните сообраќајници.
СВР Скопје апелира до сите граѓани учесници во сообраќајот да ги почитуваат наредбите што ќе ги даваат полициските службеници.
Македонија
Герасимовски: Преку едукативни и практични активности ја зголемуваме свеста кај учениците за безбедно учество во сообраќајот

Денеска, на отвореното спортско игралиште во ООУ „Димитар Миладинов“, се реализираше проектот „И ние децата сме учесници во сообраќајот“, организиран од Општина Центар. Проектот има за цел преку едукативни и практични активности да ја зголеми свеста кај учениците за безбедно учество во сообраќајот.
Во настанот учествуваа вработени од општината, наставници по техничко и физичко образование, како и 24 ученици од 8 основни училишта на територија на општината. Учениците покажаа одлични вештини во возење велосипед на посебно подготвен полигон, поставен од наставниците по техничко образование.
Градоначалникот Горан Герасимовски потенцираше дека општината е посветена на создавање побезбедна средина за децата.
„Преку вакви проекти не само што учиме, туку исто така и градиме одговорни млади учесници во сообраќајот. Настанот беше одличен пример како преку едукација и игра може да се влијае врз свеста за сообраќајната култура кај најмладите”, рече Герасимовски.
Герасимовски ги награди најдобрите учесници со дипломи и вредносни ваучери од Мега спорт во висина од 12.000 денари за прво, 9.000 илјади денари второ и 6.000 денари за трето место. Прво место освои ученикот Димитар Арсиќ од ООУ „Гоце Делчев“, второ место Дамјан Чивчиристовски од ООУ „Киро Глигоров“ и трето место Томи Тодоровски од ООУ „Киро Глигоров“.
„Општина Центар и во иднина ќе продолжи со организирање вакви и слични настани со цел подобрување на безбедноста и едукацијата на младите во сообраќајот”, додаде Герасимовски.