Од денес, општина Кисела Вода е првата локална самоуправа која ја имплементираше услугата „Итно Копче“ во соработка со Црвениот Крст. Се работи за аларм уред поставен на нараквица кој на постарите и изнемоштени лица во случај на итна здравствена потреба им овозможува да искомуницираат со оператор или да им биде испратен тим за прва помош директно во нивниот дом.

Услугата, за почеток е достапна бесплатно за 40 корисници, а тенденцијата е овој број да се зголеми, истакна градоначалникот Ѓорѓиевски, кој му се заблагодари на Генералниот секретар на Црвен крст на Република Македонија, Саит Саити за сите досегашни заеднички проекти.

Презентирајќи го „Итно Копче“, информираа дека продолжува и проектот за бесплатен транспорт на овие лица, кој стартуваше од Кисела Вода минатата година.

– Општина Кисела Вода денеска ја започнува новата услуга „Итно Копче“, наменета за нашите постари и изнемоштени сограѓани. Оваа услуга, која е достапна 24/7, е овозможена преку соработката со Црвениот крст и претставува уште еден чекор напред во нашата посветеност кон грижата за најранливите категории на граѓани. „Итно Копче“ е иновативен аларм-уред кој на нашите сограѓани им овозможува брз и лесен пристап до помош во секое време. Сѐ што е потребно е да го притиснат копчето на уредот, по што ќе добијат повик од операторот на контакт центарот на Итно Копче. По воспоставувањето на контакт, корисникот ќе ги сподели информациите за своите тегоби, а обученото лице ќе му даде понатамошни насоки. Доколку е потребно, ќе биде испратен тим за прва помош директно во нивниот дом. Општина Кисела Вода и досега беше лидер во обезбедување на услуги за постарите и изнемоштените лица и лицата со посебни потреби. Ние први започнавме со услугата за бесплатен превоз, овозможувајќи им на нашите повозрасни сограѓани транспорт до лекар или до некоја институција за вршење на административни услуги. Оваа услуга продолжува и годинава, но со големо задоволство ја промовираме и новата услуга со бесплатни нараквици со итно копче. За почеток, општина Кисела Вода обезбедува вакви нараквици за 40 корисници, со надеж дека оваа бројка ќе се зголеми во иднина. Се надеваме дека и другите општини, а зошто не и Градот Скопје, ќе ја следат оваа траекторија и ќе се приклучат кон обезбедувањето на подобри услови за граѓаните. Нашата мисија е да обезбедиме безбедност, грижа и поддршка за сите наши сограѓани, а „Итно Копче“ е уште еден значаен чекор во остварувањето на таа мисија, истакна градоначалникот Ѓорѓиевски.

Генералниот секретар на Црвен крст на Република Македонија, Саит Саити истакна дека со овој проект се надградува досегашната одлична соработка со Општина Кисела Вода за корисниците од овој дел на градот.

– Примерот со Општина Кисела Вода е пример за следење, типичен пример за грижа за сопственото население за имплементација на улогата на градоначалникот. Црвениот крст дава поддршка на градоначалниците, на институциите на системот за тоа како да ги подобрат социјалните политики. Се надевам дека истиот ќе биде следен од останатите градоначалници и од другите институции. Ова за Црвениот крст е само почеток, сега за сега ги покриваме општините во Скопје, со тенденција во наредните година, две да се прошириме и во поголемите градови во нашата земја. Засега ова услуга ја користат 100 лица. Со договорите што ги правиме, денес започнуваме со Општина Кисела Вода, како прва, а интерес пројавија и други градоначалници, би биле задоволни ако стигнеме до бројката на 1000 корисници, со тенденција да ги покриеме сите граѓани кои имаат ваква потреба, изјави Генералниот секретар на Црвен крст на Република Македонија, Саит Саити

Петранка Димишкова, која веќе 33 години е дијабетичар, е првиот корисник кој денес преку уредот поставен на раката, бесплатно ја искористи услугата. Досега во општина Кисела Вода седум лица го користеле ова „итно копче“, но за тоа плаќале. Од денес и за нив и за останатите, засега вкупно 40, услугата ќе ја покрива општина Кисела Вода.

„Сведочиме за последните политички „купи ден-продај“ зафати на СДС-ДУИ.

Километарски редици за чекање операции, хирургија е во колапс, а мора да се потпреме на среќа или на небото да не се случи поголема трагедија, затоа што ќе нема каде да се примат пациенти.

За жал се потврди дека од петок до денеска вторник ништо нема да биде преземено на Хирургија“, истакна на денешната прес-конференција Наум Стоилковски, портпарол на ВМРО-ДПМНЕ.

Дознавме вели тој дека за СДС-ДУИ поважни им се партиските функции.

„Дознавме дека Владата, оние од СДС-ДУИ воопшто не им е грижа за тоа што се случува, и нема став за Хирургија. Нема ниту одговор дали санацијата би чинела само 120.000 евра?

И секако, дознавме дека додека трае процес на ЈО за Хирургија, заменик министерката Маја Манолева се среќавала со сите директори на Хирургија!? Уште еднаш ќе повторам – ЈО наводно испитува дали има заговор во Хирургија, а сите директори и власта си прават средби и се договараат!?

20 дена ниту еден директор од 12 на Хирургија, не излезе со став или осуда, ама затоа се здружени со заменик министерот Манолева, која што е и втор човек во Лекарската комора во исто време!?

Па треба да веруваме дека збореле дека ќе отпочнат со работа кога ќе има услови, а не и можеби за ветување заштита за 12-те директори заради колапсот на Хирургија?“, истакнува Стоилковски.

Додаде дека веќе 20-тина дена „абер нема од санација на Хирургија, се заради негрижа на двоецот СДС-ДУИ, за лични интереси и партиски функции“.

„Кабелот повеќе не може да е виновен! Ако санацијата би вредела 120.000 евра, ако за 120.000 евра 20 дена здравството е во колапс, некој дебело ќе одговара.

Одговорност ќе има, колку и да се групираат и регрупираат“, потенцира портпаролот на ВМРО-ДПМНЕ.

Лекарската комора одбележа 32 година од постоењето како самостојна и професионална организација на сите доктори на медицина во нашата земја на свеченоста организирана во „Куќата на уметноста“, во село Кнежино, во присуство на претставници на органите и телата на Комората, претставници на државни институции како и доктори од целата држава. Пригодни обраќања имаа претседателката на Комората, Калина Гривчева Старделова и заменик претседателот на Комората, Беким Исмаили.

„Времињата и околностите во кои живееме и работиме се турбулентни и променливи, но она што мора да биде нашата константа, како доктори, тоа е нашиот напор да се држиме до професионалното, стручно и квалитетно работење бидејќи само така ќе сме сигурни дека она што го правиме е токму тоа за што сме учеле и на што сме се обврзале. Комората останува да биде претставник на лекарите како и конструктивен партнер на креаторите на здравствените политики во креирање на подобри услови за работа на докторите и задржување на младите доктори во земјава, обезбедување достоинствени приходи и обезбедување на одржлив и квалитетен здравствен систем што претставува еден од основните сегменти на квалитетно општество. Верувам дека само заедно, со обединети сили, можеме да издејствуваме подобро утре и за нас, како доктори, и на нашите пациенти“, истакна Гривчева Стаределова во своето обраќање, давајќи пресек на активностите кои ги имаше Комората во изминатиот период.

Исмаили поблиску се осврна на измените во начинот на кој се полага стручниот испит, што почнуваат од јунската испитна сесија.

„Писмениот дел од испитот ќе се полага на компјутер, преку посебена програма што ќе генерира тест со испитни прашања и понудени одговори, а докторите ќе може да одберат дали ќе полагаат на македонски или на албански јазик. На интернет страницата на Лекарска комора е достапна обновената база на испитни прашања, со што докторите добиваат подобра поддршка за подготовка за полагање на стручен испит. Со новиот начин на полагање, целиот процес ќе се забрза бидејќи тестовите од писмениот дел нема да треба да се прегледуваат од страна на комисијата, што е особено важно за испитните сесии во кои има голем број кандидати. За реализација на оваа активности се набавија компјутери, се изработи посебен компјутерски програм, а се адаптираше и соодветен простор“, истакна Исмаили.

На настанот беше врачено највисокото признание што го доделува Комората, наградата „Св. Наум Охридски“ која ја доби Панче Арсов, интернист од Велес, со богато професионало искуство. Арсов претставува синоним за доктор кој посветено и одговорно се грижи за своите пациенти и несебично дава поддршка на колегите во секојдневната комуникација но и преку организираното дејствување во Комората и стручните здруженија.

Посебната награда „Примариус д-р Димитар Ивановски“ за тројцата студенти по медицина со највисок просек од трите медицински факултети, годинава ја добија Анастасија Петличковска – Медицински факултет, Универзитет Св. Кирил и Методиј – Скопје, Бојана Кацарова – Факултет за медицински науки, Универзитет Гоце Делчев Штип и Аљбина Рамадани – Факултет за медицински науки, Државен универзитет Тетово.

Плакетата за најдобар труд го доби трудот “Екстракорпорална фотофереза во третман на GVHD по алогена трансплантација на матични хематопоетски клетки”, чиј автор е Лазар Ј. Чадиевски и коавтори Александра Пивкова Велјановска, Сања Трајкова, Лидија Чевреска,Борче Георгиевски, Милче Цветаноски, Невенка Ридова, Симона Стојановска, Божидар Кочоски и Ирина Пановска Ставридис, сите од Оддел за трансплантација на хематопоетски матични клетки при ЈЗУ Универзитетска клиника за хематологија, Скопје.

Лекарската комора е формирана на 5 јуни 1992 година на иницијатива на неколку доктори од Македонското лекарско друштво. Првата конститутивна седница на Собранието на Комора е одржана во просториите на Воената болница. Во Лекарската комора во почетокот членувале доктори по медицина и доктори по стоматологија. Во 1995 година стоматолозите се издвојуваат и формираат нова Стоматолошка комора. Tриесет и две години подоцна Лекарската комора прерасна во почитувана, самостојна и независна професионална организација која е етаблирана на домашен и меѓународен план со свои јасни цели и јасна програма во рамки на промоција на правата на лекарите и унапредување на здравствениот систем.