Полицијата на Северна Ирска во неделата уапсила уште двајца осомничени за вмешаност во бомбашкиот напад во саботата вечерта во еден од најголемите градови во Северна Ирска, Дери, со што вкупниот број на уапсени лица се зголеми на четворица, пренесува „Спутник“.

Претходно, полицијата објави апсење на двајца мажи во врска со инцидентот.

„Детективите што ја истражуваат експлозијата од саботата вечерта пред судот на ‘Бишоп стрит’ во Дери вечерва во градот уапсија уште двајца мажи на возраст од 34 и 42 години”, рече полицијата.

Една од главните верзии на истрагата за инцидентот е вмешаноста на северноирската терористичка група „Нова ИРА“ (ирска републиканска армија). Истрагата покажа дека  автомобилот бомба, комбе за испорака на пица, бил украден непосредно пред инцидентот во истиот град, а во него бил ставен и импровизиран експлозивен уред со мал капацитет.

Полицијата, исто така, потврди дека никој не бил повреден во експлозијата.

„Нова ИРА“ е националистичка група што се противи на договорот од Велики петок во 1998 година, со кој се стави крај на речиси 30-годишниот период на насилство и терористички напади во Северна Ирска. Во изминатите неколку години „Нова ИРА“ изврши неколку терористички напади во регионот. Така, на 22 февруари 2017 година нејзините милитанти се обидоа да кренат во воздух полициски автомобил во Дери.

Во 1970-тите и 1990-тите во Северна Ирска секојдневно се случуваа судири меѓу локалните католици и протестанти, придружени со терористички напади.