Македонија
Поповски: Концептот за медиумска писменост е еден од начините за борба против лажните вести
Mинистерот задолжен за комуникации, отчетност и транспарентност, Роберт Поповски, во хотелот „Холидеј ин“ учествуваше на дебата за перспективите на истражувачкото новинарство во организација на Центарот за граѓански комуникации, БИРН и НВО Инфо-центар.
Дебатата, на која учествуваа новинари, медиуми и претставници на нивните здруженија и невладини организации, опфати две панел-дискусии, а беа презентирани резултати од мониторингот на медиумите за квантитетот и квалитетот на истражувачкото и аналитичкото новинарство во рамки на проектот „Истражувачко новинарство за поттикнување реформи“, финансиран од Европската Унија, за периодот од 2016-2018 година.
Во презентацијата беше споменато дека за последните три години најголем процент на истражувачки стории бил забележан во последните три години. Во овие новинарски стории доминирале темите од политиката и економијата, а најзастапени биле анализите за државните институции.
Министерот Поповски, кој учествуваше во првиот дел, на дебатата, кој беше фокусиран на прашањето „Дали зголемениот број на истражувачки стории во медиумите е долгорочен тренд или само краткотрајна промена“ подвлече дека за разлика од претходната пракса, актуелната Влада обезбеди услови за гласност за секое прашање од важност за граѓаните, што е еден од предусловите за истражувачките стории кои бележат долгорочен тренд на пораст.
Оценувајќи ја дебатата како исклучително квалитетна поради учеството на професионалци во медиумската сфера, министерот Поповски истакна дека таа може многу да придонесе за развојот на новинарството вклучително и истражувачкото новинарство.
„Верувајте мене лично не ме задоволува овој процент. Да, можеби и во светски рамки, 5,6 пати поголема застапеност е задоволителна, но мислам дека на Македонија ѝ треба многу повеќе. За таа работа своја улога и одговорност има Владата и институциите, но и новинарската професија, медиумските работници и медиумската индустрија“, подвлече Поповски констатирајќи дека само заедничката соработка и укажувањата на слабостите и на едната и на другата страна можат да доведат до подобрување на информираноста на граѓаните и остварување на интересот на јавноста во една демократска држава.
Министерот Поповски истакна дека на врвот на политиките на актуелната Влада е концептот на отворена влада, која максимално ги поддржува сите идеи за концептот за медиумска писменост како еден од начините за борба против лажните вести.
Тој додаде дека Владата го укина надоместокот за добивање информации и документи од јавен карактер, кои сега секој може да ги добие бесплатно во електронска форма на дигитален носач или преку електронска пошта, со што се олеснува работата на новинарите со слободен пристап до извори на информации од посебно значење за истражувачкото новинарство.
Како поддршка на истражувачкото новинарство и сториите ги наведе и достапноста на „Алатката за јавните трошења на владините функционери“, доставувањето на увид на јавноста на 21 документ од министерствата, е-порталот и внесувањето на најголем број од сугестиите на медиумските работници во новиот текст на Законот за слободен пристап до информации од јавен карактер.
„Заробената држава, сериозно ги има оставено ефектите кај некои луѓе од администрацијата, кои се плашат да комуницираат. И тоа е менување на политичката одлука. Огромна обврска и наша и ваша е да ни укажувате секаде каде има проблеми за да можеме брзо да реагираме бидејќи детектирањето е многу попрецизно кога доаѓа од ваша страна“, подвлече министерот Поповски. Тој додаде дека Владата колку што е можно повеќе ја намалува улогата на владините регулативи во медиумските реформи, останувајќи и понатаму посветена на силна и целосна поддршка кога е во прашање саморегулацијата и подигањето на професионалните стандарди.
Истакнувајќи дека секоја влада што се декларира како демократска и прогресивна ќе најде секогаш начини и можности да ги помага и јакне капацитетите на истражувачките новинари, секогаш водејќи сметка да не ја помине црвената линија што ја гарантира нивната слобода и независност, министерот Поповски посебно се осврна на поддршката која Владата ја дава за вмрежувањето на истражувачките новинари во регионални, европски и глобални мрежи, како дел од настојувањата да се истражуваат криминалните меѓународни мрежи за сите видови криминал, особено оној во кој се вмешани политички функционери.
Министерот задолжен за комуникации, отчетност и транспарентност, Поповски, ги повика сите медиумски работници да учествуваат во дебатите што се однесуваат на потребите од регулации на одредени прашања за кои сметаат дека е потребно, како и да се изјаснуваат јавно при донесувањето на законите што ја регулираат оваа сфера.
Во вториот дел од дебатата посветена на прашањето на „Отворени податоци: Придонесуваат ли базите на податоци кон подобрување на истражувачкото новинарство?“, заедно со новинари и претставници на граѓанските организации, свој осврт за можноста за користење податоци на новинарите во нивните истражувања даде министерот за информатичко општество и администрација, Дамјан Манчевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дедо Мраз од Лапонија ќе дојде со волшебен воз на Железничка во Скопје
Специјална новогодишна театарска претстава за деца „Дедо Мраз дојде со воз“ ќе се одржува од денеска 30 декември на Железничката станица во Скопје, со почеток од 19 часот. Претставата ја организираат Училиштето за театар „Од игра до претстава“, Македонски железници Инфраструктура и Македонски железници АД Транспорт.
Публиката ќе може да го следи големото доаѓање на Дедо Мраз од Лапонија, со неговиот волшебен воз во центарот на Скопје, преку приказна која се раскажува на различни локации: музејската постановка на Македонски железници, театарска претстава во салон и посета не волшебниот воз и подарок од Дедо Мраз за секој посетител во вагонот.
– Како куриозитет годинава во соработка со МЖ Транспорт, го имаме и легендарниот воз „Шпанец“, неодамна реставриран, во кој се пренесува новогодишната волшебна магија и со која посетителите ќе може да патуваат низ Скопје и да другаруваат со ликови од претставата. Претставата ги следи патешествијата со кои се соочува Дедо Мраз пред да стигне на Железничката станица во Скопје и неговото доаѓање е неизвесно, па му треба помош од неговите Елени, Џуџиња, Снешко, но најмногу од неговите обожаватели, децата, се вели во соопштението од „Од игра до претстава“, ЈП Македонски Железници – Инфраструктура Македонски Железници АД Транспорт.
Автор и продуцент на проектот е Миодраг Костиќ, а текстот и режијата на Игор Ивковиќ. Реставратор и автор на музејската изложба користена во проектот е дело на авторот Ванчо Милошевски.
Во претставата играат актерите: Дарко Вељиќ, Андреј Серафимовски, Тодор Стојковски, Симона Петрушева, Ведра Димова, Александар Спироски. Вклучени се и 40-тина учениците од училиштето за театар „Од игра до претстава“.
Визуелното обликување на проектот е доверено на Бранкица Јордановска, во соработка со Горан Сачкарски. Музиката е авторско дело на Драган Илиевски, а монтажата е на Андреј Златаноски.
За потребите на претставата, ќе бидат користени: локомотива создадена во 1942 година, серија 33 и вагон што е изработен во 50-те години на 20 век и бил во употреба до крајот на 70-те години, а сега реставриран по урнекот на „ОРИЕНТ ЕКСПРЕС“, како и од неодамна реставрираниот воз „шпанец“ серија 712/714.

Билети може да се купат на билетарницата на Железничка станица – Скопје, секој работен ден од 12 до 19 часот. Резервација на [email protected] и на телефонскиот број 075 295 905.
Македонија
Скопје повторно ќе пулсира во ритамот на виното со Винодонија 2025
Винодонија 2025 – најпрестижниот вински настан во Македонија и годинава ветува незаборавно искуство за сите љубители на виното. Деветтото издание на салонот ќе се одржува денеска и утре во Скопје, а посетителите ќе имаат можност да ги вкусат најдобрите вина од земјата и од странство, додека 15 гастро-изложувачи ќе ги надополнат елегантните вински моменти со ексклузивни деликатеси.
-Салонот ќе биде винска сцена за споделување на вкусови, емоции и моменти, идеално место за уживање во најдоброто од виното пред крајот на годината. Со внимателно одбран амбиент, богата програма и вински ритуали што ги слават сетилата, Винодонија 2025 воедно е и покана за достоинствено затворање на годината – со чаша вино во рака и со друштво што знае да препознае вкус и вредност. Со повеќе од 75 вински брендови кои ќе изложат над 500 вински етикети, Винодонија 2025 ветува незаборавно винско патување, најавуваат организаторите.
Интернационалниот карактер на Винодонија 2025 се огледува во присуството на винари и експерти од различни земји, кои ќе ги споделат своите најдобрите вина и најнови трендови во светското винарство. Оваа година, покрај македонските вина кои ја раскажуваат приказната на нашите лозја, посетителите ќе имаат можност да дегустираат и врвни вина од регионот и пошироко.
Водечкиот карактер на Винодонија 2025 ќе дојде до израз и преку едукативните работилници и предавања. Еминентни експерти од винската индустрија ќе споделат свои знаења на специјални мастер-клас дегустации и интерактивни сесии, кои се наменети за сите – од искусни вински познавачи до оние кои сакаат да ја продлабочат својата љубов и разбирање за виното.
Македонија
Магла кај Ресен и Удово, видливоста е намалена
Сообраќајот на државните патишта се одвива непречено, по претежно суви коловози. Намалена видливост поради магла до 50 метри има кај Ресен и Удово, информира АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
Во сила е законската обврска за задолжително поседување на зимска опрема во возилата, без оглед на моменталната временска состојба.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

