Регион
Јункер: Европа сé уште не ја надмина кризата
Европа сé уште не ја надмина кризата, но постигнат е напредок, изјави во понеделникот во Атина, претседателот на новата Европска комисија (ЕК) Жан-Клод Јункер, при првата официјална посета на земја членка на Европската унија (ЕУ), пренесува AFP.
„Верувам дека веќе минавме долг пат и дека сме кон крајот, но сé уште не сме го поминале прагот“, изјавил Јункер за време на симболична посета на Грција, по неговото неодамнешно назначување на чело на Европската комисија.
Запрашан за ситуацијата во Португалија, претседателот на новата Европска комисија изјавил дека таа „останува нестабилна и е потребна внимателност“.
„Треба да останеме будни во цела Европа, бидејќи можеме да бидеме погодени од нештата кои не можеме да ги предвидиме“, предупредил Јункер, посочувајќи го примерот со португалска банка Еспирито Санто, која неодамна ги потресе европските пазари.
За справување со кризата, според Јункер, потребно е „строгите буџетски ограничувања да продолжат“.
„Не велам дека буџетските ограничувања стигнаа до крајот, ограничувањата остануваат актуелни во Грција, како и во другите земји”, изјавил Јункер со грчкиот премиер Андонис Самарас.
Поранешниот претседател на Еврогрупата, кој иницираше издавање на два меѓународни заеми за Грција, земја која беше првата жртва на должничката криза во 2010 година, потсетил дека своевремено се борел „како лав” за зачувувањето на земјата во еврозоната.
„Имаме потреба од буџетската дисциплина и од финансиската сигурност, но исто така треба да работиме и за економски раст”, изјавил Јункер, потсетувајќи дека неговите приоритети како претседател на Комисијата ќе бидат „растот, вработеноста и инвестициите“./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.