Силите на либиската влада кои се поддржани од меѓународната заедница во петокот навечер го заземаа пристаништето во градот Сирт од џихадистите на екстремната сунитска организација исламска држава, соопштија во саботата либиските функционери.

Силите лојални на владата на национално единство „ја преземаа контролата над пристаништето Сирт и таму се распоредија“, изјавил Реда Иса, функционер во бирото за информации, говорејќи за офанзивата почната пред еден месец за заземање на градот, кој е роден град на соборениот и ликвидиран пред пет години либиски авторитарен челник Моамер ел-Гадафи, и околината од Исламската држава.

Либиските сили потоа успеале да освојат и неколку станбени населби во источниот дел на Сирт, додал Иса. Жестоки судири избувнале меѓу џихадистите и либиските сили пред ворите да го заземат пристаништето, исто така, и на истокот од градот.

Иса го изнесе податокот за најмалку 11 загинати и 45 ранети во редовите на владините сили, а повеќето од нив биле погодени од снајперисти на Исламската држава сместени по покривите на зградите.

Според Реда Иса, провладините сили во саботата ги ставиле во опсада џихадистичките борци во сектор од пет квадратни километри меѓу центарот и северниот дел од градот. Од четвртокот инаку го блокираа поморскиот пристап до градот, благодарејќи на бродовите на воената морнарица.

САД во петокот порачаа дека се „охрабрени“ од напредувањето на силите на либиската влада, против Исламската држава во нивното упориште во Сирт.

„Иако ситуацијата е променлива, охрабрени сме од напредувањето. Џихадистит со сила успеаја да го заземат сир, но кога на теренот се наоѓаат сили способни за покренување офанзива против нив, може брзо да се распаднат“, изјави специјалниот пратеник на американскиот претседател Барак Обама во меѓународната коалиција за борба против Исламската држава, Брет МекГарк.

Сирт, град сместен 450 километри источно од Триполи кои од јуни 2015 година е под контрола на Исламската држава, е главна цел на големата воена операција покрената пред еден месец за да се протераат џихадистите од областа долга 200 километри на северот од Либија.

САД кон средината на мај изразија загриженост од информациите дека радикалното исламистичко нигериско движење Боко Харам испраќа свои борци во Либија, каде што би се бореле на страната на екстремната сунитска организација Исламска држава. Движењето Боко Харам, кое се бори за прогласување шеријатска држава во североисточните покраини на Нигерија, минатата година ѝ изрази лојалност на џихадистичката терористичка групација Исламска држава, којашто на големите територии што ги контролира во Сирија и во Ирак прогласи „калифат“, а исто така контролира и области во Либија.

Либија во моментов се смета како една од главните територии за експанзијата на Исламската држава во Северна Африка, којашто користејќи го хаосот во оваа земја по соборувањето на деценискиот либиски челник Моамер ел-Гадафи во 2011 година, се етаблираше на нејзината територија. Таа во моментов го контролира големиот град Сирт и голем дел од медитеранското крајбрежје. Американското и руското разузнавање проценуваат дека во Либија моментално има повеќе од шест илјади џихадити, и оти Исламската држава откако започна да губи територии на Блискиот историк во прв ред во Сирија, ги префрла своите борци во Либија користејќи ја тамошната хаотична политичка ситуација./крај/мф/сн