Култура
Берлинале се подготвува за Петрунија, закажани 8 проекции на македонскиот филм
Во Берлин речиси сè е подготвено за отворањето на 69. издание на Берлинскиот филмски фестивал, на кој светската премиера во официјалната конкуренција за наградата „Златна мечка“ ќе ја има македонскиот филм „Господ постои, името ѝ е Петрунија“ во режија на Теона Стругар Митевска. За време на фестивалот се закажани 8 проекции на македонскиот филм, а билетите се веќе распродадени.
Фестивалот секоја година привлекува повеќе 350.000 посетители од целиот свет и 4.500 акредитирани новинари, а за филмската индустрија и медиумите, овие 11 денови во февруари се воедно и едни од најважните настани во годишниот календар.
На Булеварот на ѕвездите (Allee der Sterne) од минатата недела веќе се поставени и огласни табли со официјалниот постер на „Господ постои, името ѝ е Петрунија“, а првата премиера ќе биде прикажана на 10 февруари од 16 часот пред повеќе од 1800 посетители меѓународна публика.
Првите се закажани уште пред официјалната премиера на 7 и 9 февруари, кои се ексклузивни затворени проекции организирани од страна на францускиот агент за продажба „Пирамид“ за заинтересираните купувачи, додека на денот на премиерата, 10 февруари, филмот прво ексклузивно ќе биде прикажан пред новинарите, по што ќе следи и официјалната прес-конференција со екипата на македонскиот претставник за „Златната мечка“.
На 12.02, нашиот филм „Господ постои, името ѝ е Петрунија“ ќе биде прикажан и во локалното кино b-ware! Ladenkino, во рамки на специјалните прикажувања Berlinale Goes Kiez, кои имаат за цел да го доближат Берлинале до локалните уметнички кино сали во Берлин. На овој начин фестивалот им оддава почит на кино-салите кои ја поддржуваат кино-културата во текот на целата година. Во исто време, преку овие специјални прикажувања на публиката ѝ се дава можност да ја проследат селекцијата на Берлинале во нивната локална населба, но и да разменат мислења и коментари со авторите на филмот (Kiez на германски значи „населба“, „маало“). Дополнително прикажување е закажано и на денот на затворање на фестивалот, на 17 февруари во Haus der Berliner Festspiele.
На 12 февруари, со почеток од 14 часот, во HAU2 театарот, кој се смета за центар на светот на талентите, сестрите Лабина и Теона Митевски ќе одржат и свој „Мастер клас“ во рамки на програмата Berlinale Talents.
Публиката ќе биде сочинета од вкупно 200 „таленти“ во филмската индустрија и останати филмски работници кои го следат Берлинале, а мастер-класот ќе биде модериран од страна на филмски куратор Џамила Грандитс, кој се приклучува од Виена специјално за овој настан.
Во однос на темата, мастер-класот има за цел да фрли светлина на начините на кои Стругар Митевска ги развива своите филмови, а со оглед на тоа што публиката е сочинета од врвни професионалци, со публиката ќе се разговара и за многу специфични детали околу снимањето, мотивот и личната инспирација за филмот, но исто така ќе се презентираат и практични примери од најдобрите или најлошите случаи со кои се соочиле авторите, актерите и продуцентите во текот на својата работа.
Во Брлин ќе присуствива и актерската екипа сочинета од Зорица Нушева, Симеон Мони Дамевски, Суад Беговски, Стефан Вујисиќ, Виолета Шапковска, Џевдет Јашари и Бајруш Мјаку.
На денот на премиерата екипата ќе приреди и специјална македонска вечер на која ексклузивни гости ќе биде македонскиот бенд „Фолтин“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.