Претседателот на САД, Доналд Трамп, упати писмо до косовскиот претседател, Хашим Тачи, во кое му ја честита на народот на Косово годишнината од независноста.

Тој ги охрабри косовските граѓани да се сосредочат на зачувувањето на демократските принципи, зајакнувањето на владеењето на законите и унапредувањето на економските и трговските можности.

„Нашите силни билатерални односи се вкоренети во заедничката визија за стабилно, сигурно и благословено Косово и Западен Балкан. Она што е најважно, Косово и Србија треба да ги нормализираат односите, бидејќи тоа е важно за западната интеграција на Косово. Ние обостраното признавање го гледаме како основа за нормализацијата на односите и како основа за секое сопфатно решение“, вели Трамп.

Во писмото, американскиот претседател додава дека САД остануваат партнер со секој кој ги дели овие вредности и е подготвен да направи тешка задача, неопходна за сегашниот и идниот успех на Косово.

Трамп упати и писмо со српскиот претседател, Александар Вучиќ, по повод Денот на државноста на Србија.

„Двете страни треба да постигнат договор што ќе можат да го поддржат. Сметаме дека заемното признавање треба да биде централен елемент за трајна нормализација на односите. Таквиот историски договор, со заемно признавање во својата суштина, би го изградил патот за целите на евроинтеграцијата на Србија и економскиот раст“, наведе Трамп.