Македонија
Заев легализира во Лагадин, Беџети на Матка, законите само на хартија
Градоначалникот на општина Сарај, Блерим Беџети, најави дека ќе се залага за изнаоѓање начин за легализирање на платформите на Матка безмалку исто како што премиерот Зоран Заев на трибина во Охрид вети дека лично ќе се заложи за легализацијата на дивиот хотел во Лагадин. И платформите и хотелот за архитектите се школски пример за дивоградби изградени, меѓу другото, во заштитени подрачја во кои не постои начин да бидат легализирани во согласност со важечките закони.
Хотелот во Лагадин почна да се гради 2016 година и покрај предупредувањата дека прекршува 12 закони, еден подзаконски акт и не е во согалсност со Уставот, на што постојано укажуваа граѓанските здруженија. Истата година, по барање на граѓаните, на терен излезе Инспекторатот за животна средина, кој утврди дека хотелот е во заштитените 50 метри од езерото во кои не се дозволени градби, а Државниот инспекторат за градежништво и урбанизам му наложи на тогашниот градоначалник на Охрид, Никола Бакрачески, да го урне. Сопственикот на хотелот двапати се жалеше кај Второстепената комисија, а истовремено и си градеше. Поддршка на граѓаните и барање да се стопира градбата тогаш имаше и СДСМ, но тоа не го спречи премиерот Зоран Заев минатиот месец на сопственикот да му вети дека лично ќе се заложи хотелот да може да се догради.
Сопственикот на хотелот, Никола Толески, на трибината „Силна економија – шанса за сите“ му објасни на премиерот дека фамозниот хотелски комплекс е, всушност, „обично објектче со 8 соби и 9 апартмани“ и рече дека само сакал да го догради за ако може, да ја фати претстојната сезона.
„Чичко Никола за хотелот во Лагадин неколкупати насоки давал и на министерот и го знам проблемот. Ако треба, ќе ја земам под раце Второстепената комисија и ќе дојдат тука и ќе решиме до крај“, му вети премиерот Заев на сопственикот на хотелот.
Од Владата, еден месец по ветувањето на премиерот, најавуваат средба со граѓанските организации.
„За објектот во населбата Лагадин премиерот Зоран Заев во текот на наредните денови ќе одржи средба со претставници на здружението за заштита на интегритетот на селото Лагадин – ‘Стар Лагадин – Скопје’“, изјавија од Владата за „Макфакс“.
За дивите платформи на Матка од Владата потенцираат дека Министерството за транспорт и врски има мандат да ги одземе ингеренциите од инспекторите од Сарај, во чија надлежност е уривањето на бесправните објекти.
„Според член 145 од Законот за градењето, Министерството за транспорт врски има можност да одзема надлежност на овластен градежен инспектор во општината доколку не постапува по конкретен предмет, но само по предлог на Државниот инспекторат за градежништво и урбанизам доколку се утврди неизвршување на работите по конкретниот предмет. Министерството за транспорт и врски во рамките на своите надлежности веќе испрати барање до Државниот инспекторат за градежништво и урбанизам да ја провери фактичката состојба со дивограбите во општина Сарај“, велат од Владата и покрај тоа што Инспекторатот вчера се прогласи за ненадлежен за платформите оти не биле градби од прва категорија.
Од Владата најавуваат дека и Државниот инспекторат за животна средина ќе излезе на терен да направи увид во однос на дивоградбите во кањонот Матка. Ќе направи проверка на нивната техничка документација и усогласеноста на неа со Законот за природата, според кој кањонот Матка е прогласен за заштитено подрачје во категоријата споменик на природата.
Сите платформи изградени на Матка се бесправни градби. Луѓето што работат таму велат дека ниту една не е сосема нова, вклучително и онаа во првиот залив до браната. Таа до минатата сезона била далеку помала и изградена ниско над водата, а за оваа сезона сопственикот решил да ја крене, да ја надгради и да ја прошири.
И покрај тоа што на Матка со години функционираат дивите платформи, Законот за градењето децидно пропишува дека секоја градба, привремен објект или урбана опрема, поставени без одобрение, треба да бидат отстранети, а сопственикот казнет. Одредбите од Законот за градењето и за платформите на Матка и за хотелот во Лагадин остануваат само на хартија, дивоградбите се нечепнати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тренчевска: Од 2017 година до денес најниската исплатена пензија ја покачивме за 5.309 денари
„330% повисока социјална помош, 53% повисоки пензии, 180% повисока минимална плата, 40 000 просечна плата се нашите резултати и знам дека тоа можеби не е доволно. Затоа вечерва стојам пред вас не како жена, туку како ваша пријателка и комшивка, како жена која работеше со интегритет и бара поддршка за број 1 на 8 мај“ порача Тренчевска од говорницата на митингот во Радовиш.
Ко-носителката на изборна единица 4 од СДСМ, Јованка Тренчевска вечерва на радовишани им порача дека вистинскиот избор е јасен и дека само СДСМ е опција која ќе го води напредокот на општеството.
„Вие највозрасните кои гледам ве има тука во голем број, а со кои деновиве често се среќавав и често ме прашувавте зошто не може покачување од 5000 денари за секој од вас, Ве потсетувам дека од 2017 година до денес најниската исплатена пензија ја покачивме за 5.309 денари, и овој месец најниската исплатена пензија изнесува 13 880 денари. Стабилната исплата на вашите пензии ќе биде доведена во прашање со лажните ветувања на ВМРО, кои слушам деновиве дека започнаа да го раситнуваат лажното покачување на пензиите на месеци, на години и на нови методологии. Знаат и тие дека на лагата и се кратки нозете! Знаат дека 5000 линеарно е невозможно. Но дека е добро за да манипулираат со највозрасните“ рече Тренчевска.
Таа истакна дека во новиот мандат СДСМ се обврзува минималната пензија да ја покачи на 20.000 денари додека просечната пензија ќе ја покачи на 30.000 денари.
„Да продолжиме да градиме мостови посилни од ѕидовите и омразата кои ни ги наметнува ДПМНЕ“ истакна Тренчевска во нејзината покана за граѓаните за да излезат на гласање на 8ми мај.
Македонија
Мицкоски од Тетово: Во рамките на проектот за 250 милиони евра за инфраструктурен развој на општините, дел ќе се инвестира и во општините во западна Македонија
„Живееме под едно небо, делиме исти проблеми, исти предизвици. Маката ни е иста, и копнееме по заеднички работи. Денес Македонија е држава каде управуваат стотина души кои ги запоседнале институциите и грубо ги злоупотребуваат. Секој тендер поминува низ нивни раце, за секој бизнис процентот на добивка го определуваат истите луѓе. Тој артаноиден систем стана синоним за корупција и неказнет криминал. Систем на искривени вредности и непринципиелност која државата ја носи во пропаст“, истакна претседателот на ВМРО-ДПМНЕ, Христијан Мицкоски од митингот во Тетово.
Мицкоски додаде дека доаѓа ново време, се врти нов лист, нов почеток.
„Овде од Тетово објавувам дека веднаш по победата и формирањето на влада значаен процент од буџетот ќе оди за развој и решавање на децениските инфраструктурни проекти на Тетово, Гостивар, Кичево, Струга, Дебар и повеќе други општини од западна Македонија“, вети Мицкоски.
„Се обврзувам дека во рамките на проектот за 250 милиони евра за инфраструктурен развој на општините дел ќе се инвестира и на овие места овде. Подеднакво ќе градиме и работиме за развој на штипско Ново село, но и за тетовско Теарце, за струмички Куклиш, но и за тетовско Одри“, порача претседателот на ВМРО-ДПМНЕ.
Тој рече дека на народот му е доста од удирање во гради, зборење за права, а во реалноста сето тоа да се сведе на крадење и тендери. Реално и со дела да се менува животот на луѓето и тоа идната Влада предводена од ВМРО-ДПМНЕ ќе го направи.
„За да се случи ова што ви го зборувам, на 8-ми мај мора да се заврши започнатата работа. Цунамито е кренато. Тоа цунами треба да удри на денот на изборите и да ја оддува забрефтаната од криминал власт. Решението против сите сценарија кои ги прават од СДСМ и ДУИ е излезноста“, порача Мицкоски.
Тој ги повика граѓаните на осми мај да излезат и да гласаат, време е да започнат промените во Македонија.
Македонија
Битиќи: Бидете патриоти, изберете европска иднина на соживот и плати од 1.300 евра
„На 8-ми мај излезете на гласачките места и со заокружување на бројот еден да ги сочуваме темелите на државата, на демократските вредности, на внатрешната кохезија на етникумите и верските заедници. Бидете патриоти и изберете безбедна и европска иднина, каде ќе бидеме сплотени и ќе имаме просечна плато до 1.300 евра“, порача на денешните средби со жителите на Бутел и Чучер Сандево, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Битиќи истакна дека длабоко верува дека мнозинството од граѓаните не сакаат враќање 20 години назад во минатото, во заробена држава и поделено општество, во држава во која минималната плата изнесуваше под 10.000 денари.
„Гледате политичари кои дефилираат по митинзите со националистички пароли и пораки за изолација на државата. Но, уверен сум дека со вашиот глас за бројот 1 ќе ги замолчите, ќе им покажете дека вашата одлука е да имаме нова влада која ќе продолжи државата да ја води кон Европската унија, кон нејзините вредности, “ рече Битиќи и посочи дека СДСМ и коалицијата имаат програма која ќе ја исполни оваа мнозинска желба на граѓаните на Македонија.
Нагласи дека агендата на националистите е празна, а програмите им се полни со празни зборови, затоа нудат само несигурност и страв меѓу граѓаните.
„Знаеме дека патот до ЕУ е тежок, со многу пречки пред нас, но ЕУ е единствениот начин да ги смениме работите на подобро, во економијата, во образованието, во здравството.
Не смееме да се откажеме од европското семејство и да ги замолчиме националистите“, порача Битиќи.
Зборувајќи за мерките од предизборната програма на СДСМ, Битиќи посочи дека членството во ЕУ не само што ќе однесе посилна кохезија помеѓу различните етнички и верски заедници во Македонија, туку тоа ќе значи и подобар и поквалитетен живот за сите граѓани
„Пред вас излегуваме со конкретни верувања, за кои во минатото покажавме дека ги исполнуваме, а ќе ги исполниме и сега. Гарантирам е просечна плата од 1.100 евра и минимална плата од 600 евра, кои со влезот во ЕУ проектираме да достигнат до 1.300 евра односно 800 евра“, им порача Битиќи на жителите на Бутел и Чучер Сандево.