Израелскиот премиер, Бенјамин Нетанјаху, вели дека Израел е подготвен да ја искористи моќта на своите поморски сили – и го повика светот да им се приклучи – да ги блокира иранските нафтени испораки што ги заобиколуваат унилатерално наметнатите американски санкции против Техеран, пренесува РТ.

„Иран се обидува да ги заобиколи санкциите што му се наметнати со криумчарење  нафта по морски пат. Бидејќи овие обиди зачестуваат, морнарицата ќе има поголема улога во напорите за блокирање на овие ирански обиди”, рече Нетанјаху во Хаифа во средата.

Не успевајќи да објасни како точно релативно малите поморски сили на Израел ќе ја наметнат предложената блокада против иранските танкери за нафта, Нетанјаху само нагласи дека израелските морнари се добро обучени и вешти во спроведувањето на поморските мисии против противниците.

Вашингтон ги санкционираше иранската нафтена и бродска индустрија и иранските банки во ноември минатата година, откако претседателот Доналд Трамп се повлече од иранскиот нуклеарен договор, за што беше поздравен од Израел, но наиде на шестоки критики од другите потписници на договорот и од бизнис-партнерите на Техеран.

Сакајќи да го сведе извозот на иранска нафта на нула, САД им се заканија на глобалните купувачи на нафта со секундарни санкции. Потоа, откако притисокот не ги постигна очекуваните резултати, на неколку земји им беше одобрено посебно ослободување, а Вашингтон великодушно им одобри засега да продолжат да купуваат сурова нафта од Техеран.

Бесни поради американската тактика на малтретирање, иранските вооружени сили соопштија дека ќе ја заштитат својата флота од нафтени танкери од какви било закани што би можеле да ги загрозат испораките. Техеран е особено посветен на осигурувањето безбеден премин низ теснецот Хормуз, кој го поврзува Персискиот Залив со остатокот од светот.