Свет
Франција им наметна дигитален данок од три отсто на Гугл, Амазон, Фејсбук и Епл
Француската влада во средата воведе данок за дигитални продажби на гигантските технолошки компании, во обид да се спречи практиката на плаќање глобални давачки во земјите со пониски даночни стапки, пренесува „Спутник“.
Предлог-законот, кој треба да го разгледаат министрите на владата пред да биде доставен до парламентот, е на министерот за економија, Бруно ле Мер, и предвидува компаниите да платат данок од три отсто на поголемиот дел од нивната дигитална продажба во Франција, објави „Франс 24“.
Данокот ќе се применува на француските приходи на околу 30 големи компании, од кои повеќето се со седиште во САД. Ле Мер проценува дека данокот ќе генерира приближно 500 милиони евра годишно.
Данокот, кој е насловен како GAFA-данок од страна на француските медиуми – француски акроним за технолошки гиганти Google, Apple, Facebook и Amazon – е насочен кон дигитални компании со глобална годишна продажба од повеќе од 750 милиони евра и продажба во Франција од најмалку 25 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
18-годишник е уапсен бидејќи го запалил хрватското знаме и го споделил на социјалните мрежи
Осумнаесетгодишник е уапсен во Славонија бидејќи на 1 мај го запалил хрватското знаме во шумата кај Трпија.
Како што дознала полицијата, тој тоа го снимил и го објавил на социјалните мрежи.
„На овој начин тој јавно го подложи знамето на Република Хрватска на потсмев и грубо омаловажување и на јавноста и стави на располагање видео од тој чин преку компјутерска мрежа, во кое повикува на насилство или омраза насочена кон група луѓе поради нивната национална или етничка припадност“, наведува полицијата во кривичната пријава.
Пријавата го товари младиот човек за јавно поттикнување насилство и омраза и нарушување на угледот на Република Хрватска. За овие злосторства му се заканува затворска казна до три години.
Од полицијата потврдија дека со решение на Жупанискиот суд во Вуковар, на 18-годишникот му е одредена мерка притвор.
Свет
Зеленски му го честиташе третиот премиерски мандат на Пленковиќ и му се заблагодари за поддршката на Украина
Претседателот на Украина, Володимир Зеленски, му го честиташе третиот мандат на хрватскиот премиер Андреј Пленковиќ и изрази благодарност за постојаната поддршка од Украина.
Зеленски на социјалната мрежа Икс напиша дека разговарал со Пленковиќ, кому му се заблагодарил и го потврдил доаѓањето на мировниот самит во Швајцарија.
„Разговаравме и за поддршката на Хрватска за почеток на пристапните преговори на Украина со Европската унија, како и за можноста Хрватска да се приклучи на декларацијата на Г7 од Вилнус за поддршка на Украина“, напиша Зеленски.
Свет
Повеќе од 226.000 домови во Тексас без струја по невремето
Повеќе од 226.000 домови и деловни објекти во Тексас и денеска се без струја откако невремето го погоди регионот минатата недела и викендот, според синоптичарите и PowerOutage.us.
Тоа е помалку од повеќе од 946.000 клиенти во Тексас, Луизијана и Мисисипи кои беа без струја во петокот наутро.
Покрај тоа, невремето на крајот на минатата недела во Тексас и другите држави долж брегот на Персискиот залив остави без струја во текот на викендот повеќе од 44.000 клиенти во Оклахома и Канзас, пренесува Ројтерс.