Македонија
Во Битола се дебатира за соработката на народниот правобранител со локалните власти

Во салата на Советот на Општина Битола се одржа јавен настан на тема „Народниот правобранител и локалната власт: Подобра соработка за поголема заштита на правата на граѓаните“, на кој говореа народниот правобранител, Иџет Мемети, битолската градоначалничка Наташа Петровска и Лилјана Илиевска од регионалната канцеларија на народниот правобранител во Битола.
Како што информираат од Општина Битола, главниот фокус на оваа дискусија била улогата на народниот правобранител како клучна институција во заштита на правата на граѓаните, како и начините за подобрување на соработката на локалните власти, државните и јавните институци на локално ниво со народниот правобранител.
„На мое задоволство ја имавме оваа средба со народниот правобранител и претставници од општинската администрација, јавните претпријатија, претставници од училиштата, советници и граѓани, со што се воспостави дијалог во функција на граѓаните и создавање еден коректив што може да го направи народниот правобранител за генерално подобрување на тоа како функционираат институциите во нашата држава затоа што тие реално постојат за водење добри јавни политики и да бидат во функција на граѓаните. Се надевам дека оваа средба е само почеток на мотивирање за подобрување на состојбите во оваа насока“, истакна градоначалничката Петровска.
Народниот правобранител Мемети го оценил јавниот настан како многу успешен затоа што, како што истакнал, мора да се разговара, дискутира и што почесто да се реализираат средби од отворен вид и за институциите и за граѓаните.
„Институцијата народен правобранител постои веќе 20 години, а мал дел од граѓаните знае која е нејзината вистинска функција. Од речиси 4.000 претставки на годишно ниво, само по 1.000-1.200 од нив може да постапува народниот правобранител. Во последните две години забележлива е зголемената соработка на централната и локалната власт со народниот правобранител, иако има уште простор за подобрување на заемната соработка“, посочил Мемети.
Од Општина Битола информираат дека во 2018 година, во регионалната канцеларија на народниот правобранител во Битола, која постапува на територијата на југозападна Македонија и покрива 15 општини, поднесени биле 367 претставки од граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.