Јордан во неделата се приклучи на жестоките протести по повод егзекутирањето на вториот јапонски заложник од страна на Исламската држава (IS), и истакна дека џихадистите ги отфрлиле сите напори на ова кралство да го ослободи заложникот.

Припадниците на Исламската држава на интернет во саботата поставија видеоснимка којашто наводно го прикажува отсекувањето на главата на јапонскиот новинар Кенџи Гото, кого го држеше во заточение заедно со јорданскиот пилот Маз ал-Касасбех чиј авион се урна во текот на воената кампања против џихадистите во Сирија.

„Јорданската влада силно го осудува погубувањето на вториот јапонски заложник, кое го изведе терористичката организација Даеш (погрден арапски акроним за Исламската држава)“, изјави портпаролот на владата Мухамед ал-Момани. Притоа истакна дека Јордан е „подготвен да стори сé“ за да го спаси животот на својот пилот, кому џихадистите исто така му се закануваат со животот.

Владата во Аман ќе „стори сé за да го спаси својот пилот“, порача портпаролот ал-Момани, додавајќи дека „сите државни институции вложуваат напори да добијат докази дека пилотот сé уште е жив, за да го осигурат неговото враќање во татковината“. „И натаму сме подготвени да ја предадеме затвореничката Саџида ал-Ришави во замена за враќањето на напиот син и херој“, истакна портпаролот, пренесе јорданската агенција Petra.

Пилотот Маз ал-Касасбех, кому Исламската држава се заканува дека ќе му ја отсече главата доколку Јордан не ја ослободи ирачката џихадистка Саџида ал-Ришави која од 2006 година е во јордански затвор, беше заробен во декември откако се урна неговиот авион „F-16“ над Сирија, каде што учествуваше во бомбардирањата во рамките на операцијата на меѓународната коалиција предводена од САД.

Независниот јордански дневен весник Al-Gad во недела објави дека се водат индиректни разговори меѓу Јордан и Исламската држава за ослободување на пилотот. Агенцијата AFP, меѓутоа, не добила официјална потврда на ваквите наводи.

Претходно во саботата навечер американскиот ресурс SITE за следење на интернет страниците кои ги користат исламските радикали, објави дека Исламската држава објавила видео материјал од обезглавувањето на јапонскиот новинар Кенџи Гото. Агенцијата Reuters објави дека нема сигурна потврда за автентичноста на видеото кое покажува маж со ќулавка како стои над Јапонецот со нож под неговиот врат а потоа следува снимка од тело над кое е поставена отсечената глава.

Обраќајќи му се на јапонскиот премиер Шинзо Абе, мажот вели „Поради вашата непромислена одлука да уечствувате во војната која не може да ја добиете, овој нож не само што ќе го заколе Кенџи, туку ќе продолжи и ќе предизвика колеж каде и да се најдат вашите луѓе. Нека започне кошмарот за Јапонија“.

Јапонската влада бараше ослободување на Кенџи Гото, воен дописник кој џихадистите го заробија минатиот октомври во Сирија барајќи ослободување на другиот јапонски заложник претприемачот Харуна Јукава кој беше заробен во август ај беше убиен пред десетина дена.

Во претходните снимки Исламската држава бараше размена на Гото доколку Јордан ја ослободи Ирачанката Саџида ал-Ришави која беше уапсена во 2006-та откако се обиде да изведе самоубиствен бомбашки напад во Аман. Претходно џихадистие за ослободувањето на двајцата Јапонци бараа 200 милион американски долари, што Токио го одби.

Токио во неделата објави дека нема да попушти пред тероризмот, по емитувањето на снимката за егзекуцијата и на вториот јапонски заложник.

„Најодлучно го осудуваме овој акт“, изјави портпаролот на владата Јошида Суга. Според него автентичноста на снимката е „високо веројатна“. „Мислиме дека веројатноста е многу висока“, рече Суга, прецизирајќи дека тоа се анализи на експерти. Потврди и оти личноста на снимката сигурно е новинарот Кенџи Гото.

„Тоа е одвратен терористички чин на кој сум многу гневен. Никогаш нема да им простиме на терористите. Јапонија е решителна да ја преземе одговорноста во рамките на ,меѓународната заедница во борбата против тероризмот и во настојувањата оние кои се одговорни за него да бидат изведен пред правдата“, изјави во Токио јапонскиот премиер Шинзо Абе, видно вознемирен, пренесуваат агенциите.

Осуда за егзекуцијата на јапонскиот заложник дојдоа и од Вашингтон, Париз и Лондон, нарекувајќи го овој чин „одвратен“ и „достоен за презир“

„САД го осудуваат одвратното убиство на јапонскиот граѓанин и новинар Кенџи Гото. Денеска сме солидарни со премиерот Шинзо Абе и со јапонскиот народ во осудата на овој варварски чин“, порача американскиот претседател Барак Обама.

Францускиот претседател Франсоа Оланд во името на својата земја изрази солидарност со Јапонија осудувајќи го „свирепото убиство“. „Претседателот на Републиката со најголема одлучност го осудува свирепото убиство на јапонскиот државјанин Кенџи Гото“, се наведува во изјавата на Елисејската палата.

Велика Британија чинот го нарече „ужасувачки“. „Решително го осудувам она што е ужасно и вредно за презир, како што е убиството на Кенџи Гото. Тоа е уште е потсетник дека Исламската држава го олицетворува злото кое не се грижи за човечките животи“,изјави премиерот Дејвид Камерон./крај/мф/сн

Извор: Макфакс