Македонија
(Видео) Заев од Брисел: На земјите членки на ЕУ им дадовме силни аргументи да донесат одлука за отворање на преговорите во јуни

Паралелно со големата посветеност на решавање на отворените билатерални прашања, Република Северна Македонија во континуитет ги спроведуваше реформските процеси во земјата. Особено внимание државата посвети на реформите во клучните области правосудство, реформа на разузнавачките и безбедносните служби, борба против корупцијата и реформа на јавната администрација, порача претседателот на Владата, Зоран Заев, на 15-тиот состанок на Советот за стабилизација и асоцијација, тело што во моментот претставува највисоко за одржување на формалните односи помеѓу Европската Унија и Република Северна Македонија.
По состанокот, Заев одржа заедничка прес-конференција со потпретседателката на Европската комисија и висока претставничка на Европската Унија за надворешна политика и безбедност, Федерика Могерини, и со комесарот за проширување и соседска политика, Јоханес Хан.
„Во периодот пред нас ќе работиме уште повеќе и уште подобро заедно со опозицијата и сите пратеници во Собранието за остварување на сите преостанати задачи, кои може да имаат влијание за одлуките во јуни, но и за подобрување на животот на нашите граѓани. Отворањето на пристапните преговори останува примарна цел на Република Северна Македонија. Уверени сме дека имаме силни аргументи, кои ќе им овозможат на земјите членки на ЕУ да донесат одлука за отворање на преговорите во јуни, врз основа на препораката на Европската комисија за која се надеваме дека ќе биде позитивна и оваа година. Изразуваме задоволство од интересот на Европската Унија за задржување на фокусот кон регионот и неговата европска перспектива и апелираме да се земат предвид околностите и важноста соодветно да се продолжи со вреднување на постигнатото“, нагласи Заев.
Македонскиот премиер им порача на европските институции дека може и понатаму да сметаат на Република Северна Македонија како на доверлив и веродостоен партнер во вградувањето на европските демократски вредности во целиот регион, кој ја потврдува својата стратешка ориентација колку што може побргу да стане интегриран дел од Европската Унија“.
„Во нашата земја реформите даваат резултат и билатералните договори со Грција и Бугарија даваат резултат. Економските параметри ги кршат сите рекорди, бројот на странски инвестиции е двојно поголем од која било година досега, се намалува невработеноста, растат индустриското производство и извозот и истовремено се профилираме како земја што преку билатералните договори и успешните реформи навистина во пракса покажува дека е вредно низ дијалог да се постигнуваат договори со своите соседи и со реформите да се биде доволно атрактивен за домашните и странските инвестиции“, додаде Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.