Македонија
Средба Џафери – Маркуш: Поддршка од Словачка за членството во НАТО и ЕУ

Претседателот на Собранието, Талат Џафери, оствари работна средба со амбасадорот на Словачката Република во земјава, Хенрик Маркуш, кој најпрвин му упати честитки на претседателот Џафери за успешното усвојување на измените на Уставот, како клучен фактор за понатамошниот процес на интегрирање на државата во НАТО-заедницата.
Тема на разговор беа и останатите активности на Собранието кои произлегуваат како обврски од преспанскиот договор. На ова се надоврза претседателот Џафери и потврди дека интензивно работи на исполнување на стратешките цели на земјава. Тој потенцираше дека за успешната работа придонес дале сите политички субјекти, а за особено важна ја потенцираше поддршката од меѓународните пријатели.
Амбасадорот Маркуш ја потенцираше силната поддршка од страна на Словачката Република во аспирацијата на земјава кон полноправно члество во алијансата и Европската Унија.
Оваа средба беше уште една од низата на протоколарните средби со амбасадорите од земјите членки на НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре променливо облачно со сончеви периоди, во наредните денови со повремени локални врнежи од дожд

Времето утре, променливо облачно со сончеви периоди. Кон крајот на денот и во текот на ноќта во западните делови ќе има повремен локален дожд. Ќе дува слаб до умерен јужен ветер. Минималната температура ќе биде во интервал од 6 до 13, а максималната ќе достигне од 16 до 22 степена.
Во Скопје, променливо облачно со сончеви периоди. Ќе дува слаб до умерен јужен ветер. Минималната температура ќе се спушти до 10, а максималната ќе достигне до 20 степени.
Во наредните денови следува период на променливо облачно време со повремени локални врнежи од дожд.
Во петок и понеделник врнежите ќе бидат поројни со услови за појава на грмежи, а во понеделник наместа и пообилни. Ќе дува засилен, повремено силен ветер од јужен правец кој ќе надминува брзина од 70 km/h.
Македонија
Николоски и Димитриеска Кочоска со Тим Рид: Го потврдуваме стратешкото партнерство, следат конкретни чекори за реализација на проектите од Договорот Влада со Влада

Заменик претседателот на Владата и министер за транспорт Александар Николоски и министерката за финансии Гордана Димитриеска Кочоска, остварија работна средба со Тим Рид, извршен директор на Националната агенција за надворешно финансирање на Обединетото Кралство -УКЕФ.
На средбата се разговараше за деталите околу соработката и подршката што ја овозможува оваа Агенција во рамки на Договорот за соработка меѓу двете земји.
На Македонија се ставени 6 милијарди евра на располагање преку УКЕФ за реализација на капитални проекти кои треба да го подржат севкупниот развој на државата и треба да донесат додадена вредност во делот на транспортот, здравството, образованието, енергетиката и животната средина.
Како што потеницираше вицепремиерот Николоски, покрај финансискиот дел, исклучителна е подршката на Велика Британија во насока на пренесување на експертски знаења и искуства и технологии во реализација на крупните проекти предвидени со партнерскиот договор Влада со Влада.
Притоа Николоски ја истакна, како што рече. посветеноста на Владата во реализација на инфраструктурните проекти кои се опфатени во првата фаза со Договорот, со посебен фокус на брзата пруга и инвестициите во изградба на нови болници.
На средбата се прецизираа идните активности во однос на соработката меѓу двете земји, користење на финансиските средства и подршката во реализација на проектите.
Николоски го потврди стратешкото партнерство истакнувајки дека Велика Британија е силен подржувач на Македонија во нејзиниот развој, со добри политички и трговски односи и можност за нови партнерства преку нови инвестиции.
Македонија
Гаши – Солстром: продолжување на поддршката за интеграција на Македонија во ЕУ

Претседателот на Собранието на Република Северна Македонија, Африм Гаши се сретна со новоназначениот амбасадор на Кралството Шведска, Ола Солстром, на кого му го честита назначувањето на амбасадорската функција и му посака успех на новата должност, изразувајќи надеж дека и во иднина ќе продолжи многу успешната и динамична соработка со Шведската Амбасада.
Тој ја искористи можноста и да изрази благодарност до Кралството Шведска за континуираната поддршка за демократскиот и економскиот развој на нашата држава преку бројни развојни проекти, не само на политичко, дипломатско и институционално ниво, туку и финансиски преку програмата за реформи за поддршка на евроинтегративниот пат на Северна Македонија со околу 10 милиони евра годишно, што ја прави Шведска најголем индивидуален донор меѓу земјите членки на Унијата.
Амбасадорот Солстром, осврнувајќи се на одличните билатерални односи меѓу двете држави, истакна дека во текот на неговиот мандат ќе се фокусира на политичките односи, односно продолжување на поддршката за интеграција на Северна Македонија во ЕУ, соработката во НАТО, како и унапредување на економската соработка. Се осврна и на контактите меѓу луѓето, и во таа смисла билатералната парламентарна соработка ја оцени како многу динамична и плодна.
Двајцата соговорници се согласија дека бројната дијаспора од Република Северна Македонија која живее во Шведска придонесува во голема мера за приближување на двете земји и за продлабочување на взаемните односи.
Гаши потсети дека во сите досегашни состави на Собранието се формира Пратеничката група за соработка со Шведскиот парламент, со што во континуитет се покажува подготвеноста и желбата за интензивирање на меѓупарламентарната соработка и го поздрави и формирањето на ваква Група за соработка и во Шведскиот Парламент, како продолжување на блиската билатерална соработка.