Македонија
Визер скопски маратон преку партнерство со GivenGain цели кон поддршка на оние на кои им треба помош

Оваа година за илјадниците учесници, но и за тие кои сакаат да помагаат, Визер скопски маратон одлучи да ја надгради хуманоста во Македонија со отворање партнерство со глобалната платформа за донации GivenGain. Воедно, преку официјалниот вебсајт www.givengain.com секој може да донира за СОС Детско село, Проект среќа или Здружение на лица со пулмонална хипертензија – Момент плус за само 30 секунди.
Тимот на Визер скопски маратон, Сојуз на спортови на Град Скопје, ја користи оваа можност и соработка со цел да направи што е можно поголем социјален импакт во државата. Покрај охрабрувањето луѓето да спортуваат и да го негуваат своето здравје, организаторот го користи своето влијание за поттик на донирањето. Кире Синадиновски, директор на Визер скопски маратон, за можноста вели, „Имаме обврска кон нашата заедница. Ние сме луѓе кои сме цврсто уверени и убедени дека напредокот на светот во кој живееме зависи од нас. Секојдневно ги бараме начините како да го постигнеме тоа и затоа ни е екстремно драго што како Визер скопски маратон го најдовме најефективниот и најбрз начин да им се помогне на тие кои им е потребно.“
Покрај самата директна донација, сите кои ќе учествуваат на Визер скопскиот маратон можат да креираат своја страна за поддршка на некои од трите здруженија и да ги повикаат своите пријатели да им помогнат во нивната поставена цел за собирање на средства. Креирањето повик преку GivenGain е многу едноставен:
– посетете ја официјалната страница на Визер скопски маратон на GivenGain на https://www.givengain.com/e/wizzairskopjemarathon2019/
– избирате ‘Start fundraising’ за да се регистрирате со Facebook или Google
– избирате една од партнерските добротворни организации за поддршка
– додавате ваша слика/порака, таргет за собирање средства и кратка приказна за тоа зошто собирате средства
– го споделувате вашиот линк за проектот за собирање средства и ги охрабрувате и вашите пријатели и познаници
„Време е промената која ја посакуваме да дојде од нас. Донирајте, лајкувајте и споделувајте. GivenGain е нашиот чекор, па ве повикуваме да биде и вашиот“, порача Гордана Николовска од Сојуз на спортови на Град Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Штедачите на „Еуростандард банка“: Пет години нема ниту едно обвинение, ниту еден обвинет, ниту едно рочиште

Пет години по затворањето на „Еуростандард банка“, оштетените штедачи повторно јавно реагираат дека истрагата на Основното јавно обвинителство за гонење организиран криминал стагнира – без обвиненија, без обвинети и без рочишта. „Само молк, само време што истекува, само надеж што бледнее,“ велат од Здружението.
„Не го забораваме јавното признание на Трифун Костовски за сторен криминал – незаконското префрлање на 3 милиони евра депозити во Комерцијална банка. Не ги забораваме фирмите поврзани со директори, роднини и бизнис-кругови, кои добиле кредити без реални гаранции. Не ги забораваме погледите на нашите најмили кога сфатија дека нивната макотрпна заштеда исчезнала преку ноќ поради недомаќинско работење на поедини криминогени умови. Не забораваме дека според извештајот за стечајот, 149 фирми не вратиле ниту една рата, а 58 од нив добиле кредити вредни 16,8 милиони евра, обезбедени само со обични меници“, велат штедачите.
Истакнуваат дека голем дел од оштетените се пензионери, работници и мали бизниси. Тие обвинуваат за „внимателно испланиран криминал“ во кој се вклучени лица од бизнис и семејни кругови на поранешни директори.
„Ќе постоиме додека последниот денар не биде вратен и додека последниот одговорен не биде изведен пред лицето на правдата. Во целиот овој план единственото нешто што не го планирале е дека ние – оштетените – ќе се обединиме и нема да замолчиме,“ порачаа од Здружението, прашувајќи дали побрзо ќе се изгради пругата Скопје–Солун отколку што ќе се поднесе обвинение за криминал тежок над 50 милиони евра.
Македонија
Без струја две улици во Илинден и Волково

ЕВН Македонија АД известуваат дека на денес без електрична енергија ќе останат:
· од 08.30 до 12.30 часот, корисниците на улица бр. 27 во нас. Илинден. (Општина Илинден)
· од 09.00 до 11.00 часот, корисниците на улица бр. 33 во нас. Волково. (Општина Ѓорче Петров)
Македонија
Сончево и многу топло, максималната температура до 40 степени

Времето денеска ќе биде сончево и многу топло. Ќе дува слаб до умерен ветер од југоисточен правец. Минималната температура ќе биде во интервал од 12 до 21, а максималната ќе достигне од 32 до 40 степени.
Во Скопје сончево и многу топло со слаб до умерен ветер од југоисточен правец. Минималната температура ќе се спушти до 17, а максималната ќе достигне до 39 степени.
Времето во наредните денови
Под влијание на многу топла воздушна маса во текот на оваа седмица ќе се задржи сончево и топло време со умерена облачност во текот на денот. Ќе дува слаб до умерен ветер од југоистоичен правец.