Премиерот Зоран Заев и заменичката на претседателот на Владата на Република Северна Македонија и министерка за одбрана, Радмила Шекеринска, учествуваа на дипломатската дискусија на тема „Патот за Брисел“, која по повод НАТО-неделата, која почнува на 3 април и пред чествувањето на Денот на НАТО – 4 Април, беше организирана од Министерството за одбрана на Северна Македонија, Евро-атлантскиот совет (АТА) и Амбасадата на Република Словенија во земјата.

Амбасадорите и претставниците на земјите членки на НАТО во своите дискусии едногласно дадоа поддршка за членство на Северна Македонија во Северноатлантскиот сојуз и амбасадорот на Република Полска, Војциех Тицињски, во своето обраќање најави дека утре полскиот парламент ќе го ратификува протоколот за членство на Република Северна Македонија изразувајќи безрезервна поддршка за политичкиот процес со цел остварување на евро-атлантските аспирации на земјата.

„Со вашата поддршка и со вредните реформски процеси и решавањето на клучните прашања за иднината на нашата земја, на 6 февруари оваа година го потпишавме протоколот за пристапување во седиштето на НАТО. Постигнавме една од нашите стратешки обврски, а тоа е да станеме членка на НАТО. Оваа историска одредница за нашата земја ја постигнавме со вложувањата на повеќе генерации што не потклекнаа и напорно работеа за да ги реализираме нашата визија и стратешката цел: да станеме дел од евро-атлантското семејство“, истакна премиерот Заев., кој изрази уверување дека членството на нашата земја дополнително ќе придонесе за стабилноста и безбедноста во Југоисточна Европа и ќе има клучна улога во создавањето нова позитивна слика за регионот.

„Нема никакво сомневање дека членството во НАТО за нашата земја е гаранција за перспектива на безбедност и стабилност. Дополнително, тоа ги отвора хоризонтите за поголема предвидливост и јасна иднина за нашиот политички и економски прогрес. Секако, тоа вклучува и соодветно рамноправно учество и во споделувањето на заедничките одговорности за активностите и за иднината на алијансата. Како идна полноправна членка на НАТО ние сме подготвени целосно да ги споделиме товарот, должностите и одговорностите за зачувување на регионалниот и меѓународниот мир и стабилноста“, рече премиерот Заев.

Тој посочи дека во таа насока Владата на Република Северна Македонија донесе одлука за зголемување на трошоците за одбрана за 0,2 проценти од домашниот бруто-производ (БДП) секоја година имајќи силна политичка волја и посветеност за постигнувањето да бидат издвоени проценти од БДП на нашата држава најдоцна до 2024 година.

Вицепремиерката и министерка за одбрана, Шекеринска, во својот говор истакна дека денешната ситуација кога Северна Македонија се наоѓа пред исполнувањето на својата стратешка цел, да стане 30-та членка на НАТО, пред само една година изгледала нереална и преоптимистичка, но резултатите и прекумерната работа го докажуваат спротивното.

„Тоа докажува дека нема преоптимистичка цел и ако има политичка волја и ако се работи, резултатите доаѓаат. Работевме напорно на домашните реформи, на реформите во одбраната и со аргументи успеавме да ги убедиме и најголемите скептици дека оваа земја може да се трансформира, да отскокне од една кризна ситуација и да понуди модел на поинакво однесување на Балканот“, рече министерката Шекеринска, која додаде дека отворените врати во НАТО не се подарок, туку заработена шанса за нашата земја и се заблагодари за поддршката од земјите членки на НАТО и нивните претставници на денешната дискусија.

Министерката Шекеринска истакна дека бенефитите од членството во НАТО се безбедноста и просперитетот и посебно се осврна на прашањето што ќе добие НАТО од својата нова членка.

„Ќе понудиме и нови шанси, во јуни на полигонот Криволак ќе се одржи најголемата воена вежба на нашата територија досега. Вежбата ‘Одлучен удар 19’, на која ќе учествуваат над 3.000 војници не само од Армијата на Република Северна Македонија туку и од САД, Бугарија, Албанија, Литванија и Црна Гора. Ова за нас ќе биде и чест и симболички знак за нашето идно членство во НАТО, но и голем предизвик и одговорност да докажеме дека како идна членка сме способни да се справиме со логистички, организациски и политички предизвици. Ќе покажеме дека и малите држави може да носат нова вредност“, порача министерката Шекеринска заблагодарувајќи се за ратификацијата на протоколот, која заврши во 9 земји членки на НАТО, и порача дека целта е процесот бргу и ефикасно да се заврши.

Денешната дискусија на тема „Патот до Брисел“, според обраќањата на учесниците, е со цел да се испрати силна порака до земјите членки на НАТО за што побрзо завршување на правните процедури и ратификување на протоколот за членство во Северноатлантскиот сојуз, со што Република Северна Македонија ќе стане 30-та полноправна членка на НАТО.