Македонија
Заниер-Џафери: Да се гради одржлива политика со балансиран пристап

Претседателот на Собранието, Талат Џафери, се сретна со Ламберто Заниер, висок комесар за малцински прашања на ОБСЕ, избран на таа позиција на 19 јули 2017 година. Џафери даде краток вовед во однос на воспоставената долгогодишна соработка од 1993 година и рече дека улогата на ОБСЕ е високо ценета кај нас во насока на развојот на демократските процеси во земјата и особено значајна во таа насока е улогата и константната соработка со високиот комесар за национални малцинства.
Особена благодарност за придонесот на високиот комесар за придонесот што го дава во унапредувањето на меѓуетничките односи и залагањето на Република Северна Македонија за изедначување на степенот на вклученост и интеграција на сите етнички заедници кои живеат тука. Претседателот Џафери направи краток осврт и на актуелната застапеност на претставници од сите етнички заедници во парламентарниот состав и за законското решение со кое заедниците кои не се застапени во Собранието, да имаат свој претставник во Комитетот за меѓуетнички односи, на предлог на омбудсманот. Што се однесува на определбите од Охридскиот рамковен договор, во март 2018 година е донесен Законот за употреба на јазиците, и согласно истиот, основана е Агенција за примена на јазикот што го зборуваат најмалку 20 проценти од граѓаните, а се очекува и основање на Инспекторатот за употреба на јазикот. Претседателот на Собранието изрази задоволство и од Резолуцијата за промени и подобрување на положбата на Ромите, којашто е веќе во процедура. Сиот вложен ангажман е во насока на остварување на заедничката цел, односно градење соживот и унапредување на меѓуетничката интеграција и толеранција, кои се многу важни за стабилноста на државата.
Високиот комесар Заниер, вреднувајќи ја високо улогата на Собранието во ратификацијата на договорот со Грција и ЕУ и НАТО-перспективите, му честиташе на претседателот Џафери за неговиот личен ангажман во постигнување на овие цели. Неговиот прв впечаток по пристигнувањето во Република Северна Македонија е дека има повисок степен на стабилност а по остварените средби со директорот на Агенцијата за примена на јазикот и Министерот за образование, констатира дека тие институции имаат стратешка улога за зајакнување на процесот на социјална интеграција. Неговите совети се да се гради одржлива политика со балансиран пристап. Имајќи предвид дека ОБСЕ работи во многу земји на овие прашања, имаат и искуство и практики кои можат да ги споделат и со нас. Комесарот Заниер се интересираше и за новото Министерство за политички систем и за тоа дали тоа ќе повлече нова законска регулатива на што претседателот Џафери даде широко образложение за тоа како дојде до основање на оваа нова институција и дека новина за разлика од претходните две институции кои се редефинираат во ова тело е всушност извршната надлежност.
Соговорниците разговараа и за претстојните претседателски избори за кои веруваат дека ќе бидат фер и демократски, а претседателот Џафери потврди дека за верификација на непристрасноста акредитирани за ОБСЕ и ОДИХР, а вклучени се и домашни институции како што е Државниот завод за ревизија и Комисијата за борба против корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.
Македонија
Приведени уште 13 полициски службеници за пожарот во „Пулс“

Во тек е акција под раководство на обвинител од Специјализираното одделение за полициски службеници, соопштија од Обвинителство за гонење на организиран криминал и корупција.
Уште 13 полициски службеници и началници се приведени во рамки на истрагата за пожарот во дискотеката „Пулс“ во Кочани.
Од Обвинителството најавија дека соопштение ќе има во текот на утрешниот ден.
Македонија
МОН: Стручното образование е силна страна на македонскиот образовен систем, креира квалитетен и побаруван кадар на пазарот на трудот

„Во средните стручни училишта во Македонија успешно функционира концептот на дуално образование во чија реализација е вклучена и бизнис заедницата. Училиштата и компаниите заедно содаваат квалитетен кадар кој полесно може да се снајде на пазарот на трудот. Затоа, развојот и проширувањето на овој концепт ќе биде наш приоритет и во следниот период“.
Ова го истакна државниот секретар во Министерството за образование и наука, Елена Ивановска на панел дискусија „Достапност на квалификувана работна сила: предизвик и стратешки фактор за инвестициски одлуки и економски раст“, организирана во рамки на Првиот македонско – германско бизнис самит, со кој АХК германската стопанска комора во Македонија одбележува 25 години постоење.
Ивановска рече дека од самиот почеток на мандатот, новото раководство во МОН се заложи за унапредување на законската регулатива, бидејќи таа е основ за спроведување на образовните политики, новите мерки и активности со кои ќе се остварат целите од владината програма за градење на поквалитетен образовен систем.
„Во новиот Закон за стручно образование и обука системски се уреди концептот на дуално образование, се прецизираа обврските на сите учесници во реализацијата. На пример се дефинираше кој и како може да стане ментор на учениците, компаниите да им исплаќаат месечен надомест на практикантите, да им овозможат заштита и безбедност при работа и така натаму. Со Законот за средно образование пак, се предвиде поголема поддршка за талентираните ученици, се воведуваат кариерни советници што ќе ги насочуваат учениците и сето ова е во интерес на создавање на потребната квалификувана работна сила“, рече Ивановска.
Осврнувајќи се на регионалните центри за стручно образование и обука рече дека тоа се всушност средни стручни училишта кои се трансформираат во образовни установи со поголема вредност и повеќе функции, обврски и одговорност.
„Таму не само што се реализира средно стручно образование за ученици, туку идејата е да се реализира и образование и обука на повозрасни кои имаат потреба од доквалификација, преквалификација и слично, за да станат конкурентни на пазарот на трудот. Фреквентноста на луѓе ќе биде многу поголема. Центрите ќе прават и анализи на пазарот на трудот, ќе креираат програми за настава и обука и така натаму“, рече Ивановска, додавајќи дека во моментов се формирани 7 регионални центри, а до 2028 година ќе се формира осмиот и последен, што како обврска е предвидено во Реформската агенда.
Државниот секретар информираше дека во регионалните центри се вложуваат големи износи на средства за да има добри училници, опремени кабинети, работилници и соодветни сместувачки капацитети. Средствата во најголем дел ги обезбедува Европската унија, а Ивановска ја повика и бизнис заедицата да помогне во модернизацијата на инфраструктурата, затоа што, како што рече, училиштата се инкубатори на човечки капитал кој и нив им е потребен.
На панел дискусијата модерирана од Дејан Чуповски, раководител на програмата за дуално образование при АХК германската комора, се обратија и програмската директорка на Источниот комитет на германското стопанство, директорот на средно стручно училиште „Св. Наум Охридски“ во Охрид, Сашо Недески, раководителката на одделот за глобална техничка и комерцијална обука во компанијата Дрекслмаер, Барбара Гербер и управниот директор на компанијата Унија Груп, Бранислав Серафимоски.