Македонија
Mицкоски од Кочани: И тука владее чемер, јад и депресија откако СДСМ е на власт
Претседателот на ВМРО-ДПМНЕ, Христијан Мицкоски, синоќа на митинг се обрати пред граѓаните во Кочани. Мицкоски посочи дека и во Кочани, како и во цела Македонија буквално владее чемер, јад, депресија и разочараност од моменталната реалност откако е СДСМ на власт и истакна дека на сето тоа ќе му се стави крај прво со победата на професорката Гордана Силјановска-Давкова на претседателските избори, а потоа и со победата на предвремените парламентарни избори.
„Затоа овие избори не се само претседателски избори, туку се пораз на заевизмот во Република Македонија, затоа ни е потребна победа. Затоа е потребна масовност на 21 април и на 5 мај, за да биде победата уште поголема. Потоа се знае. Следат предвремени парламентар избори и огромна победа на ВМРО-ДПМНЕ“, рече Мицкоски.
Потребна ни е победа, истакна претседателот на ВМРО-ДПМНЕ, за да ставиме крај на сето она омаловажување, понижување и неправди коишто ни се случуваат во овие две години во Република Македонија и оној заевизам кој е секојдневие.
Тој потенцираше дека со СДСМ на земјава ѝ се случуваат само неправди, како на пример што во Кочани манипулира со земјоделците со лажни ветувања како што е зелена нафта, а две години од неа ни трага ни глас, а земјоделците мака мачат да скрпат од први до први.
„Неправда е кога ќе ветат загарантиран откуп, повисоки субвенции и дополнителни стимулации за земјоделците, а денеска реалноста овде во Кочанско е катастрофална, ниту имаат каде ниту за што да го продадат родот. Ниту има загарантиран откуп ниту има зголемени субвенции. Истото тоа се случува и во Пелагонија и во Ресен и Ресенско, луѓето со пила ги сечат крошните бидејќи немаат каде да го пласираат родот затоа што 1 денар е килограм јаболко, а луѓето ги растеле тие дрва за еден ден да родат плод и да ги прехранат своите семејства“, нагласи Мицкоски.
Тој додаде дека неправда е и тоа што патриоти добија 2 века казна, а борци на ИСИС добиваат три пати помали казни, кога за шест години нашите деца ќе се гледаат очи во очи со терористите од ИСИС, патриотите ќе имаат уште по 12 години зандана, само затоа што така сака деспотот Заев.
„Неправда е кога на капитулантски начин ќе потпишат договор со нашиот јужен сосед и ќе речат дека е условот за да добиеме преговори со ЕУ. Неправда е кога минатата година на плоштади ќе играат чочеци дека сме добиле датум за преговори, па потоа ќе се премислат и ќе речат дека оваа година, а нема ни оваа година да добиеме“, истакна Мицкоски.
Мицкоски потенцираше дека Заев сето свое политичко битисување го темели на два аргументи, лага и кражба, и тоа се двете работи со коишто опстојува. Го лажеше сопствениот народ, вели Мицкоски, се колнеше во децата дека нема да го промени името, за на крај да ги промени и името и идентиетот. Токму затоа, рече дека на Македонија веднаш ѝ потребна правда и држава.
„Затоа што од една страна го имаме Стево Пендаровски и опустошена, ограбена и омаловажена држава, а од друга страна професорката Гордана Силјановска-Давкова, честита и горда држава. Имаме човек, имаме кандидат кој со сета своја харизма, со сето свое животно искуство, со сите генерации кои поминале на правниот факултет и добиле знаење, со сета додадена вредност што уште може да ѝ ја даде на Македонија како држава, како претседател на Република Македонија, тоа е нашиот избор“, истакна Мицкоски.
Тој уште еднаш ги повика присутните за масовност на изборите и поддршка на ВМРО-ДПМНЕ и професорката Силјановска, за граѓаните да го живеат сонот на Македонија која ќе се ги врати децата назад,
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.