Регионалната иницијатива за азил, бегалци и миграции – МАРРИ е докажана успешна регионална приказна, успешен регионален проект кој успеа да опстои и покрај многуте премрежја пред кои беше исправен нашиот регион во изминатиот период, рече министерот за внатрешни работи, Оливер Спасовски, на почетокот од своето излагање во рамки на дипломатскиот брифинг посветен на 15-годишната активност на МАРРИ Регионалниот центар, што денеска се одржа во МНР и на којшто беа сублимирани досегашните активности и значење на оваа регионална иницијатива, како и предизвиците пред коишто е исправена во наредниот период.

Според министерот Спасовски, во релативно краток временски период Република Северна Македонија, но и регионот, се соочија со голем прилив на мигранти на своите граници, притоа посочувајќи дека научените лекции брзо беа преточени во законски и подзаконски решенија, беа изготвени соодветни акциски планови за справување во слични ситуации во иднина, а сега веќе искуства се споделуваат во рамки на МАРРИ-учесниците, а и пошироко.

„Миграцијата, сама по себе, особено онаа која вклучува ненадеен и огромен прилив на мигранти, повлекува земање предвид на уште неколку други феномени. Тоа се, пред сè кривични дела од областа на трговијата со луѓе и криумчарење мигранти, кои треба да ги спречиме или откриеме. Но тоа се и ситуации кои понекогаш налагаат пружање медицинска помош, обезбедување соодветна заштита и интеграција. Во насока на справување со сите овие предизвици и обврски, првенствено е потребен координиран настап на сите засегнати државни институции, но и заедничко регионално дејствување токму во обезбедувањето на тој координиран пристап“, потенцираше министерот Спасовски.

Тој нагласи дека платформата за соработка креирана токму преку самото постоење на МАРРИ претставува огромна придобивка за целиот регион на Западен Балкан, односно истата се користи како значајна алатка за размена на искуства и најдобри пракси.

„Она што можам да го кажам во мое име и во име на Министерството за внатрешни работи на Република Северна Македонија е дека нашата поддршка на МАРРИ и натаму ќе продолжи и ќе се интензивира“, констатираше на крајот министерот Спасовски.