Македонија
Таткото на Фросина: Ако нема правда за моето дете, тогаш јас ќе ја земам во свои раце
„Или ќе има правда за моето дете или ќе станеме Див Запад, па секој ќе се снаоѓа како умее и знае, ќе си ја зема правдата во свои раце“, изјави Љупчо Цековски, таткото на прегазената Фросина, за „Макфакс“, по одлуката на Апелација за намалување на казната на три години за возачот Љубиша Видојковиќ. Цековски вели дека болката е уште поголема од пред 4 години кога загина Фросина и за него е неприфатливо, како што вели, толку ниска казна за некој што возел со преголема брзина и усмртил човек на пешачки премин, а потоа избегал и не укажал помош.
„За семејството Цековски, болката е преголема по загубата на најмилото и ништо не може да ни ја врати ќерката. Но, се надевавме дека правдата ќе излезе на виделина и дека сторителот ќе си ја добие заслужената казна. Очигледно правдата е во рацете на моќните. Не знам што да кажам, очекувавме казна затвор од најмалку 10 години, а тие му намалија на три. Ова ли е држава, ова ли е судство? Згора на тоа, му го поништија делото дека не ѝ укажал помош по удирањето во неа. Порачувам, нема да се смириме, ќе се жалиме до сите институции“, рече Цековски.
За таткото на Фросина, има многу неразјаснети работи во целиот случај. Тој вели дека не му е јасно како сведоците пред судот тврделе дека девојчето поминало на зелено, а вештачењето покажало дека било запалено црвено светло.
„Не знам, не ми јасно. Барав да се вратат камерите, да се зумира, но не дозволија. Кажаа дека било црвено светло и толку“, додава таткото на Фросина.
Адвокатот на семејството Цековски, Благоја Ангеловски, вели дека кога ќе ја добие одлуката од Апелациониот суд, ќе поднесе иницијатива до Врховен суд за преиспитување на висината на казната.
„Ќе бараме преиспитување на казната затоа што болката е преголема за злото што му е нанесено на семејството. Се надеваме дека судските институции ќе го разгледаат нашето барање и ќе ја сменат одлуката во корист на Цековски“, рече адвокатот Ангеловски.
Инаку, Фросина Цековска, студентка од Крива Паланка, загина на пешачки премин во сообраќајна несреќа на булеварот Партизански одреди кај Универзалната сала. Возачот Љубиша Видојковиќ не застанал по кобниот удар, а при прегледот му се најдени 1,2 промил алкохол во крвта. Кривичниот суд еднаш му пресуди и го осуди на 6 и пол години затвор, но Апелација го врати процесот назад и ја поништи пресудата. На второто судење Видојковиќ беше осуден на 4 години затвор, а денеска Апелација, која жалбата ја разгледувала на јавен претрес, му ја намали затворската казна дополнително на 3 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Остануваат уште 9 дена изборна кампања: партиските агенди и денеска набиени
Уште 9 дена изборна кампања. И денеска лидерите на партиите, заедно со носителите на листи, како и кандидатите за претседател, ќе ги презентираат своите изборни програми.
Кандидатот за претседател поддржан од СДСМ, Стево Пендаровски, денеска ќе оствари средба со жителите на село Велебрдо и со жителите на општина Маврово.
Гордана Силјановска Давкова, исто така, ќе има средби со граѓани, додека коалицијата што ја поддржува предводена од ВМРО-ДПМНЕ ќе ја презентира програмата за парламентарните избори пред граѓаните во Могила, Ресен, Демир Хисар и Битола.
Претседателот на Движењето ЗНАМ – За наша Македонија, Максим Димитриевски, ќе оствари средби со граѓаните на Крушево, Кичево, Струга и Охрид.
Во Штип на народен собир ќе се обрати претседателот на Левица, Димитар Апасиев.
Првиот човек на ДУИ, Али Ахмети, ќе се сретне со граѓаните на Струга и Дебар, а претседателот на Демократското движење, Изет Меџити, дел од Коалицијата „Вреди“ во рамките на изборните активности ќе даде изјава за медиумите во 12 часот во близина на „Веро“ во Чаир.
Македонија
Основците и средношколците од утре на пролетен распуст
Од утре до 6 мај, учениците од основните и средните училишта ќе бидат на пролетен распуст.
Пролетниот распуст е воведен првпат во оваа учебна година, па затоа има промена и во календарот за настава.
Па така, учебната 2023/2024 година за основците ќе заврши на 17 јуни, а за средношколците, како и во минатите години – на 10 јуни.
Училиштата нема да работат на 8 мај (среда) кога ќе се одржуваат вториот круг од Претседателските избори и Парламентарните избори 2024.
Ден претходно, односно на 7 мај, вторник, во училиштата каде што ќе се организира гласањето, ќе имаат скратени часови и работно време до 11 часот.
Неработните денови поради изборите ќе бидат одработени во работни денови со подолг престој на учениците во училиштата за да се реализираат дополнителни часови.
Учениците во Скопје треба да надоместат и за пропуштената наставата на 30 ноември лани кога во главниот град беше организиран Советот на министри на ОБСЕ.
За планирањето и организирањето на дополнителните часови, Министерството за образование и наука ги задолжи директорите на училиштата.
Македонија
Денеска сончево и топло, промена на времето со пороен дожд и грмежи од први мај
Управата за хидрометеоролошки работи информира дека времето денеска ќе биде сончево и релативно топло со мала до умерена локална облачност. Ќе дува слаб до умерен ветер претежно од североисточен правец. Минималната температура ќе биде во интервал од 3 до 10, а максималната ќе достигне од 21 до 27 степени Целзиусови.
Во Скопје ќе биде сончево и релативно топло со мала облачност и со слаб североисточен ветер. Минималната температура ќе се спушти до 8, а максималната ќе достигне до 26 степени, велат од УХМР.
Стабилното и суво време, сепак, нема да се задржи долго. Веќе од средината на следната седмица, повторно се очекува дожд.
Промената на времето ќе започне уште во среда, на први мај, кога во попладневните часови ќе има услови за локална појава на краткотраен пороен дожд и ретки грмежи. Поголема нестабилност со дожд и чести грмежи се очекува во четврток.