Исламската држава испратила 60 џихадисти, на кои им платила по 50 илјади долари, за да извршат терористички напади во Европа, утврдиле разузнавачките служби на европските држави.

Според извештаите, во кои увид имале и некои западни медиуми, терористичката мрежа која ги извршила нападите во Париз и Брисел сѐ уште не е разбиена, за што сведочат и најновите апсења во Холандија.

Исламската држава (ИД) одбрала 1.500 од своите фанатизирани припадници за идните напади во светот, а како главна цел е означена Европа.

Италијанскиот весник Стампа, повикувајќи се на разузнавачки информации, пренесува дека терористичките мрежи, финансиите, експлозивот и оружјето го организира Одделението за надворешна безбедност на ИД, кое се наоѓа во главниот табор во Рака, Сирија.

Се работи за Амн ал-Карџи и е најважниот од четирите оддели на безбедносната структура на ИД Амнијарат. Овој оддел располага со најподготвените терористи и значителни парични средства, а неговите старешини и припадници во најголем дел се џихадисти странци кои доаѓаат од арапските земји и Европа.

Амн ал-Карџи е вистинска „држава во држава“ во ИД, им откриле на европските разузнувачи  џихадисти кои се покајале или не можеле повеќе да војуваат во Сирија и Ирак, поради што побегнале од ИД. Според нивните сведочења, од одделот наречен Амн ал-Карџи се плашеле сите „обични припадници на ИД“.

Овој клучен сектор на ИД, според дезертерите и бегалците, есента минатата година, испратил 60 терористи на чело со водачот Абделхамид Абауд со задача да извршат терористички напади во Франција, Белгија и Велика Британија. Инаку, Абделхамид беше убиен во терористичкиот напад во Париз, кој се случи на почетокот на ноември минатата година.

Според европските разузнувачи, најмалку 20 џихадисти од оваа група сѐ уште не се лоцирани. Тие биле организирани во засебни ќелии, така што мисијата можат да ја продолжат и во случај некоја ќелија да биде откриена или уништена.

Бомбашите самоубијци, чија цел е да се самоубијат и во смрт да однесат што повеќе луѓе, се под постојан надзор на „координатори“, кои им издаваат наредби и упатства за атентатите.

До ноември 2015 година, на чело на Амн ал-Карџи, бил Тунижанецот Абу Рахман ал-Туниси, но тој загинал веднаш по нападите во Париз, кога американските сили го бомбардилрале седиштето на ИД во Рака.

Според извори на американското министерство за одбрана, тој бил клучниот организатор на терористичките напади во западна Европа.

Подредени на Абу Рахман ал-Туниси му биле Абделхамид Абауд, потоа уапсениот атентатор од Париз, Салах Абдеслам, како и Тунижаните Шараф ал-Муадан и Абдул Кадер Хаким, кои исто така биле убиени во американски воздушни напади во Рака.

Главен за надворешното делување на Амн ал-Карџи бил  Сириецот Абу Каледа, кој бил задолжен за споведување на обуката на џихадистите од Европа и другите странски држави. Тој кон крајот на минатата година дезертирал, а на американскиот новинар Мајкл Вајс, му раскажал дека „обичните џихадисти“ не ги сакаат странците кои се обучуваат за тероростички акции.

„Обичните џихадисти“ ги сметале странците за „неправедни муслимани“, бидејќи многумина имале криминално минато.

Во Франција, џихадистот покајник, Никола Моро, на разузнавачите им раскажал дека секој џихадист кој ќе биде испратен во Европа добива по 50 илјади долари.

Тој на разузнавачките служби им дал имформации за севкупното делување на ИД, а во октомври минатата година, припадниците на тајните служби добиле информации дека 60 терористи биле испратени во Европа. Според Моро, тие терористи со фалсификувани документи, до Западна Европа стигнале преку Балканот измешани со бранот бегалци.

Разузнавач на либанската шиитска организација Хезболах Ау Залах, појаснил дека џихадистите кои се упатуваат во Европа се „странски борци кои се враќаат таму измешани со бегалците“ и дека се работи за ќелии составени од петмина терористи, но ниту една ќелија не знае за другата. Ќелиите стапуваат во акција веднаш откако ќе добијат наредба.

Разузнувачот на Хезболах смета дека од групата од 60 терорристи кои дошле во Европа и која изврши напади во Париз и Брисел, активни се уште половина кои чекаат наредби од ИД.

Шпанскиот весник Мундо објави дека целата операција за „сеење на терор и страв низ Европа“ била договорена на 4.ноември 2015 година, девет дена пред нападите во Париз, кога лидерите на ИД се сретнале во градот Табки во Сирија.

Британски Гардијан, исто така, пренесува дека лидерите на ИД, на тој состанок не ги разгледувале само плановите за атентати, туку и кои „држави како општества најлесно можат да се разрушат“. Токму поради тоа била и одбрана Белгија, чиј главен град Брисел е седиште на Европската унија и НАТО. крај/мф/нц