Регион
(Видео) Гинисов рекорд во Хрватска: Загрепчанец истурка автомобил цели 85 километри, ќе продолжи до 100

Загрепчанецот Томислав Лубењак го собори Гинисовиот рекорд за најдолго туркање на автомобил, туркајќи го возилото повеќе од 85 километри и тоа со брзина од шест километри на час.
Неговиот потфат започна вчера во 15 часот, кога беше вклучена официјалната стоперка и стартуван пратечкиот автомобил кој го следеше секој чекор на Томислав, а службените лица будно го надгледуваа развојот на настаните со цел да се евидентираат било какви неправилности при обидот да се урне светскиот рекорд, објави „Вечерњи лист“.
Целта е за 24 часа, Лубењак да премине 100 километри туркајќи автомобил од 730 килограми со возач, но тој рекордот го собори утринава кога пред очекуваниот термин влезе во 83 километар.
Томислав на самиот почеток започнал со исклучително високо темпо, а во моментов возилото го турка со брзина при која еден километар минува за девет минути и 30 секунди, движејќи се со просечна брзина од шест километри на час.
Срцето на Томислав моментално е под 80 отчукувања во минута.
„Мојата цел е стотка“, вели Томислав, најавувајќи дека верува оти во рок од 24 часа автомобилот ќе го истурка неверојатни 100 километри. Со така високо поставениот предизвик, загрепчанецот не само што го предизвикува светскиот рекорд во должина на туркање на автомобил, туку и во должина на туркање на автомобил од две лица истовремено.
Иако рекордот веќе е срушен, Лубењак автомобилот ќе го турка денеска до 15 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора се бори со пожари

Седми ден по ред пожарите во Црна Гора не стивнуваат, а најкритично е во Подгорица, каде што и покрај тоа што ситуацијата е под контрола.
Началникот на Дирекцијата за цивилна заштита и намалување на ризици од катастрофи, Љубан Тмушиќ, соопшти дека најзагрозени области се Пипери и Кучки Корита. – Во овие подрачја се ангажирани сите расположливи ресурси – 12 возила и 42 пожарникари, рече Тмушиќ.
Посебна закана претставуваат и таканаречените „подземни пожари“ кои се активираат со пораст на температурите.
Во гаснењето се вклучени и армијата, како и помош од странство – Србија испрати хеликоптер, а вчера пристигна и швајцарски тим со 26 пожарникари и четири специјализирани возила. Поддршка дава и хеликоптер од Чешка.
Регион
Еди Рама вети бесплатни нови куќи за оние кои во пожарите ги загубија своите домови

По катастрофалните пожари кои деновиве зафатија делови од Албанија, уништувајќи домови и имоти, премиерот Еди Рама излезе со силно и директно ветување до сите настрадани граѓани. Во објава на социјалните мрежи, тој најави дека државата целосно ќе ги обесштети сите што претрпеле штета, вклучително и бесплатна обнова на секој уништен дом.
„Кој и да го изгубил својот дом, ќе го обновиме бесплатно, кој и да изгубил добиток, ќе го рефинансираме еден по еден“, напиша Рама на социјалните мрежи.
Оваа мерка, како што појасни министерот за одбрана Пиро Венгу, ќе се спроведува преку општините. Ќе се формираат посебни комисии за проценка на штетите на куќи, инфраструктура, бизниси и земјоделски култури, по што ќе следува обештетување од општинските фондови за цивилна заштита, поддржани од државниот буџет.
Регион
Шестмина припадници на полицијата се повредени за време на синоќешните протести во Србија

Министерот за внатрешни работи на Србија, Ивица Дачиќ изјави дека за време на синоќешните протести имало драстично нарушување на јавниот ред и мир и брутален напад врз полицијата, и дека, според досегашните податоци, повредени се шестмина припадници на полицијата.
„Шест полицајци се повредени, според информациите што ги имаме во моментов, а 38 лица се приведени. Секој можеше да види во преносот во живо дека имало брутален напад врз полицијата, дека демонстрантите дошле со намера да ги нападнат полицајците, да ги повредат“, рече Дачиќ.
Тој изјави дека вечерта немало поддржувачи на Српската напредна партија, што, како што рече, не ги спречило демонстрантите да ги нападнат просториите на таа партија низ цела Србија, и додаде дека на некои места биле нападнати и просториите на Социјалистичката партија на Србија.