Утрово во СВР Скопје било пријавено дека во текот на ноќта била опљачкана аптека на Бит-пазар. Полицијата направи увид.

„Денеска во 08.15 било пријавено дека во текот на ноќта со употреба на сила и погоден алат било влезено во аптека на подрачјето на Бит Пазар и биле одземени пари од касата. Извршен бил увид од увидна екипа од СВР Скопје и се преземаат мерки за расчистување на случајот“, извести полицијата.

91-годишна скопјанка вчера во полиција пријавила дека била измамена за 5.000 евра од лажен полицаец кој ѝ побарал пари за да го спаси внукот од сообраќајка во која прегазил дете.

„Според пријавеното, лицето ѝ се јавило телефонски, се претставило како полициски службеник и ѝ кажало дека нејзиниот внук и неговата сопруга предизвикале сообраќајна несреќа во која прегазиле дете и доколку не сака тие да лежат во затвор требало да плати. Како што е пријавено, таа ги оставила парите на договореното место, а откако се слушнала со нејзината снаа сфатила дека била измамена“, велат од СВР Скопје.

Полицијата презема мерки за расчистување на случајот.

Две малолетнички вчераутро се степаа на кејот на реката Сушица во Кичево, извести полицијата. Направени се разговори со нив во присуство на нивните родители.

„Вчера во 09.40 часот, на пешачка зона на кејот на реката Сушица во Кичево, настанала физичка пресметка помеѓу две малолетнички. Со нив, во присуство на родителите и претставник од Центарот за социјални работи, биле извршени службени разговори“, велат од СВР Охрид.

По целосно документирање на случајот полицијата најави соодветни поднесоци.