Македонија
(Видео) ВМРО-ДПМНЕ вработувала роднини со ургенции, антикорупциската ненадлежна
Eклатантни примери на ургенции, влијанија, непотизам и специјално креирање работни места при вработувањата на роднините на поранешни функционери од ВМРО-ДПМНЕ во јавниот сектор констатира ДКСК. Иако речиси два часа антикорупционерите расправаа за вработувањата на роднините и судирот на интереси, ниту еден од случаите не доби епилог. Членовите на комисијата се прогласија за ненадлежни бидејќи станува збор за вработувања од пред повеќе од 10 години.
Според образложението на анткорупционерите, двајца братучеди на ексминистерот и актуелен пратеник Антонијо Милошоски, двете ќерки на поранешната претседателка на Уставниот суд Елена Гошева, како и сопругата на ексгенералниот секретар на Владата Кирил Божиновски, но и таткото на актуелниот генерален секретар на ВМРО-ДПМНЕ, а поранешен директор на ЈСП Игор Јанушев, со врски се вработиле во државни институции.
Најатрактивни места за вработувања биле АЕК, ЕЛЕМ, но и Централниот регистар, Телеком, Водовод и ЦУК. Меѓу највпечатливите примери каде се забележуваат индиции за влијание при вработувањето е за Бојана Гошева во АЕК. Станува збор за ќерката на судијката Гошева, која во 2009 се вработила во АЕК, а како што објаснија од ДКСК, немало транспарентност во јавниот оглас и се криело објавувањето на работното место, но бидејќи се работи за стар случај од пред десет години, антикорупциската комисија не може да постапува и предметот се затвора.
Слична ситуација ДКСК забележа и при вработувањето на таткото на Јанушев, Љубенчо Јанушев, во Централниот регистар. Според документите до кои дошла комисијата, од 4 кандидати кои го положиле испитот за државни службеници, Агенцијата до Централниот регистар доставиле податоци за второрангираниот Јанушев и четврторангираниот. Од доставените документи ДКСК констатира и дека Јанушев немал целосна документација, а има индиции и дека не ги исполнувал условите. Но исто како и за претходните предмети, ДКСК констатира дека нема надлежност да постапува затоа што случајот е од 2008.
Образложението на претседателката на ДКСК, Билјана Ивановска, е дека биле должни пред јавноста да ги испитаат овие случаи и да докажат дека системот на вработување генерира непотизам, а нивната улога е да предложи законски измени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Центар и Бутел денеска без вода
Од ЈП Водовод и канализација – Скопје известуваат дека денеска без вода ќе бидат делови од општините Центар и Бутел.
Поради дефект на улична цевка ф 2“ на улица Рајко Жинзифов бб раскрсница со улица Киро Крстевски Платник без вода ќе останат корисниците на дел од улицата Киро Крстевски Платник и дел од улицата Шумадиска во општина Центар. Водоснабдувањето ќе биде прекинато од 08:00 часот до завршување на интервенцијата.
Поради дефект на огрлица од ф 250мм на улицата Македонско Косовска Бригада крак 11 бб. без вода ќе останат корисниците од комплекст Вива Фреш, касарната Илинден и улица Македонско Косовска Бригада крак 11 во општина Бутел.
Водоснабдувањето ќе биде прекинато од 09:00 часот до завршување на интервенцијата.
Македонија
Мурал на потпорен ѕид долг 120 метри крај реката Пена со порака за отпорност кон поплавите
Потпорниот ѕид изграден за спречување на лизгање на земјиштето во близина на ХЕЦ Пена, покрај тоа што обезбедува сигурност за возилата и пешаците, трансформиран е и во дело на уличната уметност, преку голем мурал кој пренесува порака за отпорност и единство во заедниците соочени со катастрофи.
Муралот е изработен како дел од серијата активности кои УНДП ќе ги спроведе за одбележување на меѓународниот ден за намалување на ризиците од катастрофи, 13-ти октомври.
На претставувањето на муралот нацртан по целата должина на ѕидот долг 120 метри денеска присуствуваа Постојаниот претставник на Програмата за развој на Обединетите Нации (УНДП), Армен Григорјан и градоначалникот на Тетово, Биљал Касами.
„Овој ѕид е одлично направен и обезбедува безбедно одвивање на сообраќајот и движење на граѓаните на Тетово кон Бањиче, популарна рекреативна дестинација. Но, беше сив и ние сакавме да го разубавиме, но и да испратиме значајна порака за отпорност и единство во заедниците соочени со ризик од катастрофи“, изјави Григорјан.
„Големо задоволство е да се биде тука со нашите партнери од УНДП, на презентацијата на овој мурал, во чија подготовка учествуваа и повеќе млади лица. Заедно спроведуваме значајни активности со кои сакаме во Полог да ја засилиме отпорноста кон поплавите и нашите заедници да ги направиме поотпорни на катастрофи“, рече Касами.
Инспирација за приказната претставена на муралот, уметниците најдоа во цртежите кои ги изработија учениците од повеќе основни училишта во Тетовско, на работилниците организирани од УНДП.
Ѕидот кој послужи како платно за уличните уметници е изграден во рамки на проектот за „Подобрување на отпорноста кон поплавите во Полошкиот регион“, финансиран од Швајцарија, кој Програмата за развој на Обединетите нации го спроведува во партнерство со Министерството за животна средина и просторно планирање и општините во регионот.
Македонија
Потпишан договор за европски грант, 50-тина училишта ќе добијат соларни фотоволтаични системи
Педесетина училишта во Македонија ќе ја подобрат енергетската ефикасност преку инсталирање на соларни фотоволтаични системи, за што, денеска министерката за образование и наука проф. д-р Весна Јаневска и вицегувернерот на Банката за развој на Советот на Европа, Томас Бошек потпишаа договор за неповратен грант вреден 1,1 милион евра.
Училиштата ќе ја заменат енергијата базирана на фосилни горива со чиста и обновлива енергија. На овој начин, тие ќе дадат дополнителен придонес кон заштитата на животната средина, а ќе заштедат и средства кои ќе можат да се реалоцираат во унапредувањето на условите за настава.
На потпишувањето на договорот за овој проект одобрен преку Европскиот фонд за зелени општествени инвестиции, наменет за јакнење на инклузивните климатски мерки, Јаневска изрази благодарност до Банката за развој при Советот на Европа за континуираната поддршка на државата во унапредувањето на инфраструктурните услови во областа на образованието.
Министерката изрази очекувања дека соработката во насока на достигнување на европските стандарди за квалитет, ќе продолжи и во иднина.