Култура
Почнуваат 47. Мајски оперски вечери

Меѓународниот фестивал на оперската уметност Мајски оперски вечери почнува вечерва, 9 маj, а ќе трае до 31 мај. За време на фестивалот, кој оваа година се одржува 47. пат, се изведуваат некои од најубавите оперски претстави, како и една балетска претстава, а учествуваат реномирани домашни и светски режисери, диригенти, кореографи, оперски и балетски солисти.
Оваа година Мајските оперски вечери свечено ќе се отворат и ќе се затворат со „Аида“, магичното ремек-дело на Џузепе Верди. Спојот на традицијата со визуелната иновација, футуристичката виртуелна сценографија ќе ја одведат публиката на патување низ древниот Египет раскажувајќи приказна за љубовта. Италијанскиот диригент Енрико Довико ја има честа да ги отвори Мајските оперски вечери со премиерната изведба на „Аида“ во продукција на театарот „Карло Феличе“ од Џенова, Италија. Режијата ја пренесува и адаптира Дејан Прошев, кореографијата е на Луиза Балдинети, а асистент кореограф е Саша Евтимова. Во главните улоги ќе настапат Благица Поп Томова како Аида, Амади Лага (Франција/Тунис) како Радамес, Ирена Кавкалевска како Амнерис и Борис Трајанов како Амонсаро. Улогата на Рамфис ќе ја толкува Владимир Саздовски, а во улогата на фараонот ќе настапи Евгениј Станимиров од Бугарија.
„Лебедово езеро“ на Петар Илич Чајковски, бисерот на балетската уметност, легендарниот и еден од најубавите балети во класичната уметност, ќе биде изведен на 12 мај. На 15 мај ќе биде изведена операта „Лучија од Ламермур“ на Гаетано Доницети.
Од 15 до 31 мај, во делот најавен како офф-програма, од 19 часот, ќе биде поставена изложба во чест на примадоната и еден од основоположниците на оперската уметност во Македонија, мецосопранот Ана Липша-Тофовиќ.
„Риголето“, уште едно ремек-дело на Џузепе Верди, ќе биде изведено на 18 мај во режија на Нина Најденова од Бугарија.
На 20 мај, како дел од офф-програмата, во соработка со австриската амбасада во Скопје, ќе се одржи проекција на отворено на операта „Ана Болена“ на Гаетано Доницети. Настанот ќе се одржи пред платото на НОБ по повод одбележувањето на 150-годишнината од основањето на Виенската државна опера.
Величественото дело „Боеми“ на Џакомо Пучини ќе биде изведено на 22 мај под диригентската палка на Оливер Балабурски, во режија на Дејан Прошев. На 28 мај ќе имаме можност да проследиме уште еден бисер на оперската уметност, „Травијата“ на Џузепе Верди, ремек-дело чие либрето е напишано според романот „Дамата со камелии“ на Александар Дима.
Годинешниот фестивал ќе биде затворен на 31 мај со повторна изведба на Вердиевата „Аида“ под диригенство на Дијан Чобанов од Бугарија, диригент со богата европска кариера. Во главните улоги ќе настапат Русинките Олга Романко како Аида и Ирина Долженко како Амнерис. Во улогата на Радамес ќе настапи првенецот Ѓорѓи Цуцковски, а во улогата на Амонасро ќе настапи Анџело Веча, гостинот од Италија. Улогата на Фараонот ќе ја исполни Александар Стефаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.