Култура
„Крадци на гулаби“ и „8 минути и 19 секунди“ добитници на „Златен був“ на Филозофскиот филмски фестивал
Синоќа во Кинотеката на свечен начин со прогласување на добитниците на „Златен був“ заврши 9. Филозофски филмски фестивал. Во конкуренција на селекција на долгометражни филмови жирито што го сочинуваа познатиот македонски режисер Милчо Манчевски, професорот по филмски студии од Универзитетот во Единбург и стручњак во областа на филм-философијата – Дејвид Сорфа и професорот по филозофија и научен истражувач – Бошко Караџов, „Златниот був“ му го додели на „Крадци на гулаби“ на младиот турски режисер Осман Наил Доган. Со „Златен був“ од публиката годинава се закити бугарскиот омнибус филм од 6 режисери „8 минути и 19 секунди“, работен по расказите и во косценарио на Георги Господинов.
Во конкуренција на краткометражни филмови, жирито составено од научниот истражувач од Институтот К.Г Јунг од Цирих – Габриела Калчи Новати, режисерот Иво Бару и докторандот при Институтот за филозофија и социологија на Полската академија на науки во Варшава – Наум Трајановски, со „Златен був“ го награди филмот „Ноќен разговор со џелат“ на рускиот режисер Јаков Сивченко.
Жирито додели и две специјални признанија: узбекистанскиот „Чај“ на Шакир Холиков (којшто воедно го доби и „Златниот був“ од публиката) и португалскиот „Понеделник“ на Себастиао Салгадо.
Вечерта беа истакнати и добитниците на наградите од сегментот средношколска видеолектира во рамките на Едукативната програма на Фестивалот. По гледањето на филмската предлошка, организирана во соработка со италијанската амбасада, класикот „Чудо во Милано“ од Виторио де Сика и со вклученост на 24 средни училишта и 500 ученици од целата земја, 58 ученици напишаа филмософски есеј на тема: „Homo homini lupus est: Колку чини една насмевка“. Стручното жири сочинето од Сузана Симоновска, Марија Тодоровска и Мартин Поповски првото место го додели на Наташа Драшковиќ од СУГС „Раде Јовчевски Корчагин“ – Скопје (наставник ментор: Даниела Николова), второто место на Виктор Димовски (од истото училиште и истиот ментор) и третото место на Марија Танеска од ОСУ „Св. Климент Охридски“ – Охрид (наставник ментор: Јане Богоески).
Во продолжение присутната публика имаше можност да го проследи францускиот филм „Заливот слек“ на Бруно Димон. Кон оваа необична комедија и воопшто за елементите на хуморот и скепсата во филм-философијата се осврна специјалниот гостин за вечерта, професорот Дејвид Сорфа, во излагањето насловено: What Are We Laughing At? Skepticism as a Joke in Film-Philosophy. Во отворената дискусија со публиката беа отворени теми поврзани со проблемот на изнаоѓањето валиден интерпретациски клуч на вакви „бизарни“ филмски ремек дела, потоа со смислата на употребата на елементите на религијата во филмот.
Главната програма на 9. Филозофски филмски фестивал неформално заврши во кафе-бар „Мартини“, каде што SILENT SPRING QUARTET (Дени Омерагиќ /контрабас/, Нинослав Спировски /кларинет, тенор саксофон/, Мартин Георгиевски /електроника, гитара/ и Владимир Мартиновски /тамбура, кавал, удиралки/) со маестрални музички импровизации ја забавуваа присутните.
Тимот на 9. Филозофски филмски фестивал и Филозофското друштво на Македонија како негов организатор најавија дека со завршувањето на Главната програма само се затвора еден поголем негов дел, односно дека во текот на наредните 30-тина дна ќе следуваат уште неколку настани од фестивалот. Најпрвин, веќе наредната недела, од 20 до 23 мај во четири градови од државата ќе се реализира ФФФ караванот, односно трансферирањето на дел од Главната програма и фестивалската атмосфера во Штип, Свети Николе, Прилеп и Битола. Подоцна, во периодот помеѓу 27-30 мај, ќе продолжи Ретроспективата ВИМ ВЕНДЕРС, којашто се организира во соработка со Гете-институтот Скопје. Во рамите на Ретроспективата во Кинотеката на С Македонија ќе бидат прикажани филмовите: Токио-ГА, Солта на земајта, Соба 666 и Пина. Конечно, 9. Филозофски филмски фестивал ќе заврши со две специјални проекции на победничките филмови во конкуренција на долгометражни филмови. Проекциите, во присуство на режисерите на филмовите, кога и ќе им бидат доделени наградите „Златен був“, ќе се одржат кон средината на месец јуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Бизнисот на задоволството“ почна да се прикажува пред македонската публика, екипата се соедини на кинопремиерата
Со свечена кинопремиера и три проекции во „Синеплекс“ почна прикажувањето на еден од најнaградуваните македонски филмoви „Бизнисот на задоволството“, на режисерот, Гоце Цветановски.
Филмскиот настан ја соедини на едно место екипата на политичкиот трилер, а по проекцијата на коктел забава присутните гости ги собираа впечатоците.
Режисерот Гоце Цветановски ги повика сите љубители на филмот да го проследат неговото дело кое што отвора една деликатна тема како што е присилната проституција, а во фокусот се корупцијата и трулоста на целиот систем.
„Како режисер сум премногу задоволен од приемот на публиката на првите проекции. Коментарите се дека сме направиле филм кој се разликува од се’ останато што досега е направено во Македонија и ме радува што многумина искоментираа дека е храбар и задира чувствителни теми. Повеќе не би коментирал, ги повикувам сите љубители на филмот да дојдат во кино и да видат за што станува збор, па заедно ќе дебатираме. Веќе е на редовниот репертоар и се прикажува секој ден“, рече Цветановски.
Филмот од вчера почна со проекции и во другите градови низ Македонија. Во сабота ќе има можност да го види публиката во Кочани, додека во Штип и во Велес ќе биде прикажан в недела.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Филмот е финансиран од Агенцијата за филм.
Култура
КИЦ го најавува годинешното издание на „Звукот на Скопје“
Носечката манифестација на Културно информативниот центар – Скопје „Звукот на Скопје“, оваа година повторно ќе се случи во формат на летен фестивал на отворено на кој ќе настапат свежи и актуелни музички имиња. Програмата ќе биде збогатена со изложби и проекции на филмови, како дел од програмските активности на центарот.
Веќе знаете дека „Звукот на Скопје“ значи нов, летен, open air фестивал, кој прераснува во ново скопско музичко жариште. „Звукот на Скопје“ значи и свеж здив во долгото скопско лето и заситување на културните потреби на скопската сцена, со современи музички збиднувања и разновидна културна понуда. „Звукот на Скопје“ е и простор каде на голема сцена ќе може да се видат и етаблирани, но и нови групи, а значи и промовирање на нови концертни локации во градот, оживувајќи ги во културен контекст.
„Звукот на Скопје“ ќе се случи на 27 септември 2024, и тоа во Кулпарк (пред КИЦ), Салон 19:19 и галериите.
Култура
Со наградената претстава „Мојот маж“, Драмски театар ја отвора новата сезона
Новата сезона во Драмски започнува утре со претставата „Мојот маж“. Ансамблот на Драмски неодамна учествуваше на меѓународниот театарскиот фестивал Пургаторије 2024 во Тиват, Црна Гора каде за претставата „Мојот маж“ ја доби награда за „Актерска бравура”.
Во образложението на жирито е истакнато: „Неспорна работа е дека актерската уметност има свој автентичен простор во однос на режисерско-драматуршкиот концепт, но дека актерската подела во една претстава функционира како еден организам, еден комплексен ум, една добро организирана машинерија, која умее во целина темелно да ја разбере и преболи современата сурова стварност, меѓучовечката бездна што се отвора меѓу најблиските, е врвно мајсторство што се гледа сѐ помалку и помалку во театарот денес. Актерите во оваа претстава се сами по себе доволна критична маса за одличен театар, свесно поврзани со сопствената психолошка слоевитост, наелектризирани од личните неволји, подготвени да се поништат и повторно да се преродат одвнатре, откривајќи му ја на гледачот старо-новата терапевтска вистина за човечката совест“.
Режисер на претставата „Мојот маж“ е Нела Витошевиќ, драматург е Викторија Рангелова-Петровска. Драматизацијата е на Нела Витошевиќ и Викторија Рангелова-Петровска. Костимограф е Роза Трајчевска-Ристоска, сценограф е Костантин Трпеноски и асистент сценограф е Моника Ангелевска. Музиката е избор на Нела Витошевиќ.
Улогите во претставата ги толкуваат актерите: Сара Климоска, Сања Арсовска, Емилија Мицевска, Наталија Теодосиева, Трајанка Илиева-Вељиќ, Игор Ангелов, Исмет Шабановиќ и Филип Трајковиќ.
По премиерата во 2020 година претставата “Мојот маж” е веќе пет сезони на редовниот репертоар на матичната сцена.
На фестивалот Војдан Чернодрински во 2021 година претставата доби 4 награди и тоа: „Награда за костимографија“ на Роза Трајчевска–Ристоска за костимите во претставата, „Награда за современа сценска драматизација“ на Нела Витошевиќ и Викторија Рангелова–Петровска за драматизација на колажот од раскази на Румена Бужаровска и авторските монолози, „Награда за главна женска улога“ на Наталија Теодосиева за улогите во претставата „Мојот маж“ и „Награда за севкупен уметнички ангажман и резултат на авторот и актерите“.
Драмски театар Скопје со оваа претстава имаше повеќе гостувања со извонреден прием од публиката. Се играше во Словенија на сцената на „Местно гледалишче“ во Љубљана, во Црна Гора на сцената на „Градско позориште“ во Подгорица и минатата година на летната сцена на Бриони на хрватското издание на фестивалот „РУТА“.