Македонија
Протест против изградбата на Али-пашината џамија: Во Охрид се случува атак врз достоинството и чувствата на охриѓани

Жителите на Охрид предводени од граѓанското здружение „Совест“ излегоа на мирен протест пред општината каде го изразија својот револт од, како што велат, агресивната и нелегална изградба на Али-пашината џамија во централното градско подрачје.
Граѓаните велат дека се изманипулирани и излажани од страна на актуелната власт. Тие велат дека премиерот Зоран Заев ветил решение за овој проблем по претседателските и градоначалничките избори кои се случија во општината, но дека тоа сè уште не е остварено.
„Во централното градско подрачје на Охрид се случува атак врз достоинството и чувствата на охриѓани преку агресивна и нелегална реализација на градба заштитена со закон, Али-пашината џамија, која има за цел да ги промени физионимијата и карактерот на градот, а зад која стојат цели и стратегии кои не се добронамерни и во чија реализација учествуваат институциите на државата. Управата за заштита на културното наследство, Републичката урбанистичка и градежна инспекција и судот не се на ниво на своите надлежности и не покажуваат решеност да стават мораториум на градбата која веќе е прогласена како нелегална“, рече Сашо Михајловски од „Совест“.
Граѓаните ги повикаа државните институции, градоначалникот Константин Геориевски и премиерот да ги преземат сите уставни надлежности и правдата, законитоста и легалноста да важат за сите. Тие до властите упатија пет барања.
„Заштитата на Али-пашината џамија е од врвен интерес на граѓаните на Охрид и државата. Во име на тоа го повикуваме градоначалникот на Охрид јавно да ја повика Републичката урбанистичка и градежна инспекција да донесе извршни решенија за забрана на градежните активности на Али-пашината џамија. Да се повика УЗНК да ја оцени важноста на конзерваторското одобрение, ИВЗ која е инвеститор да не се однесува своеволно и надвор од легислативата со која се уредува градењето во државата, да се побара од инвеститорот да ја прилагоди својата инвеститорска цел и истата да биде ускладена со програмската рамка и ограничувања опфтени со ПЦГП на Охрид водејќи сметка за чувствителноста на несразмерно поголемиот дел на граѓаните од Охрид и оштина Охрид и институциите од кулурата да изработат предлог до инвеститорот за пренамена на објектот џамија во центар на исламската култура и изработка на проект за партерно уредување на просторот околу објектот кој ќе биде своевидна експозиција на сите историски и културни слоеви на локалитетот“, рече Михајловски.
Од здружението потенцираа дека будно ќе ги следат заложбите на државните институции и дека нема да престанат со протести додека не се исполнат нивните барања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: По трагедијата во Кочани целосно се забрани употреба на пиротехника во затворен простор

СДС брутално и очигледно ја злоупотребува трагедијата во Кочани, со очајнички обиди да фрлат песок во очите на јавноста и со нивните лаги да ја засенат вистината, реагираат од ВМРО-ДПМНЕ, на обвинувањата од потпретседателот на СДСМ, Методија Илиевски.
„За разлика од претходната власт сега има сеопфатна, темелна истрага за трагедијата во Кочани во која беа опфатени поранешни и сегашни функционери, од кои некои се во притвор, а тоа е доказ дека сега има одговорност и неселективност. Владата на ВМРО-ДПМНЕ за разлика од претходната власт, донесе серија законски, измени со кои тотално се забранува употреба на пиротехнички средства во затворен простор, со цел да нема импровизации кои во иднина би резултирале со несреќи“, велат од партијата.
Од ВМРО-ДПМНЕ додаваат дека санкциите за прекршување на оваа забрана драстично се зголемени, но исто така утврдена е и строга одговорност за нелегално присуство на малолетници по полноќ во угостителски објекти, со цел заштита на младата популација.
„Ова се ефикасни законски мерки со кои се воведува одговорност и ефективен надзор, мерки кои гарантираат заштита на јавноста во затворени простории. Оваа Влада демонстрира одговорност со максимална сериозност и законски механизми ја брани јавната безбедност, води транспарентна и структурирана одговорност кон сите виновници без исклучок“, велат од партијата.
Македонија
АХВ: Засилени мерки по појавата на ново жариште на чума кај малите преживари во Албанија

Агенцијата за храна и ветеринарство (АХВ) воведе мерки на засилен надзор на болеста чума кај малите преживари, особено во регионот на Западна Македонија, со цел спречување на внесување и ширење на болеста од соседна Албанија во земјава.
Засилена е контролата на движењето и транспортот на животни од видовите овци и кози по добиеното известување вчера вечер преку европскиот систем за пријава на болести (ADIS) на Светската организација за здравствена заштита на животните – WOAH, дека во Република Албанија во областа Дебар, во место Кастриот, на фарма со 200 кози има појава на ново жариште на болеста, по пријавата на првиот случај неодамна во областа Скадар.
АХВ донесе Решение за забрана за увоз и транзит на живи домашни и диви мали преживари, семе, јајце клетки и емброни од домашни и диви мали преживари, месо од домашни и диви мали праживари, производи и преработки од месо од домашни и диви мали преживари, млеко и производи од млеко од домашни и диви мали преживари, како и нуспроизводи од домашни и диви мали преживари во Република Северна Македонија од РепубликаАлбанија, со цел спречување на можноста за ширење на болеста.
Со оглед на новонастаната состојба, а заради намалување на ризикот од појава и проширување на болеста, АХВ ги извести ветеринарните друштва и официјалните ветеринари за спроведување на засилен надзор на одгледувалиштата со овци и кози и пријавување на секој сомнителен случај на болеста. На сила останува Решението за безбедносни мерки во однос на болеста чума кај мали преживари кое Агенцијата за храна и ветеринарство го донесе на 09.08.2024 година.
Агенцијата за храна и ветеринарство го извести Министерството за внатрешни работи за новонастанатата ситуација со појава на болеста во пограничниот регион со Македонија за преземање на засилени мерки за надзор и спречување на евентуален шверц со живи животни од видовите овци и кози од Албанија во нашата земја.
Македонија
Петрушевски: Струјата со СДС се зголеми затоа што фирми блиски до Заев и Филипче препродавале јаглен на ЕСМ за три пати поскапо од набавното

Венко Филипче трет ден молчи за испумпувањето на десетици милиони евра од ЕСМ од страна на Вице Заев и фирми кои водат и лично до него. Истражувањето на истражувачките новинари, кои го објавија овој скандал всушност покажува зошто ЕСМ е доведена во состојба на милионски долгови, изјави Бране Петрушевски, пратеник на ВМРО-ДПМНЕ.
„Вице Заев, Зоран Заев и Венко Филипче се директно виновни што струјата во нивно време се покачи за над 50%. Заев и Филипче се директно виновни што немало инвестиции во енергетиката, а немало за да има повеќе пари за во нивните џебови. За да може да профитираат Зоран Заев, Вице Заев и Венко Филипче, биле направени мрежа на фирми и посредници за ископ, транспорт и продажба на јаглен од Грција на ЕСМ. Јагленот кој од Грција се продавал кон мрежата на фирми за 30 евра бил препродаван во Македонија на ЕСМ по цена и до 82.5 евра“, рече тој.
Петрушевски обвини дека Заеви продавале скап јаглен на ЕСМ, а Филипче уживал во придобивките на милионските бизниси низ разни луксузи кои што му ги приуштувале.
„Овој скандал и афера од размери од неколку стотици милиони евра мора да има разрешница и одговорност. Очекуваме ЈО да отвори истрага, а Венко Филипче да излезе и да каже со кое лице излегува повторно во политиката и бара гласови од народот кој тој и Заев го краделе со стотици милиони евра“, рече Петрушевски.