Македонија
(Видео) Комисијата предложи да му се одземе мандатот на Груевски

Со пет гласа „за“ и ниту еден „против“ и „воздржан“ Комисијата за мандатно-имунитетни прашања го утврди предлогот за одземање на мандатот на експремиерот и пратеник Никола Груевски поради неоправдано отсуство во работата на Собранието повеќе од шест месеци.
Предлогот од комисијата ќе биде ставен на дневен ред на наредната пленарна седница каде по расправата ќе се гласа за мандатот на пратеникот Никола Груевски. Според деловникот, потребно е двотретинско мнозинство, односно 80 пратеници за да се одземе мандатот.
Пред гласањето на мандатно-имунитетната комисија по предлогот да се одземе мандатот на Груевски, се отвори мала расправа помеѓу пратениците од ВМРО-ДПМНЕ и пратениците од владејачкото мнозинство.
Пратеничката од ВМРО-ДПМНЕ, Невенка Стаменковска, се повика на Уставот на РСМ, во кој се гарантираат основните човекови права и рече дека согласно ова, добиениот азил на Груевски не може да се смета како неоправдано отсуство.
„Деловникот дозволува пријавување на отсуство на пратениците, но вие со вашите репресивни мерки не дозволивте Груевски да се пријави како отсутен. Тој не ги исполнува целосно условите за одземање на мандатот. Да ги потсетам СДСМ и коалицијата дека Груевски не е бегалец, како што милуваат да го наречат, туку лице кое има добиено политички азил од страна на земја членка на ЕУ во која повеќе се почитуваат човековите права отколку овде“, рече Стаменковска.
На ова одговори заменик-претседателката на комисијата, Снежана Калевска-Ванчева, која кажа дека добро е што пратениците на ВМРО-ДПМНЕ се повикуваат на Уставот и членот 65, кој вели дека на пратеникот треба да му се одземе мандатот доколку е осуден за кривично дело или е неоправдано отсутен шест месеци.
„Јас навистина не знам како имаме различно толкување на овој член. Изминаа шест месеци откако Груевски е отсутен во Собранието. Ниту еден државен орган, ниту институција не го натера да отиде во Унгарија и да бара азил. Дали азилот се толкува како оправдано отсуство, тоа ќе се остави на совеста на секој пратеник во Собранието. Фактите за неоправдано отсуство се повеќе од очигледни“, рече Снежана Калевска-Ванчева.
Пред гласањето на самиот старт на денешната седница на комисијата, членовите се расправаа дали да се додаде уште една точка на дневниот ред која се однесува на оставката на пратеникот Павле Богоевски. Овој предлог не беше прифатен, по што комисијата расправаше само за мандатот на Никола Груевски.
Претседателот на Собранието, Талат Џафери, на 15 мај упати известување до комисијата за неоправдано отсуство на Груевски. Џафери констатирал дека експремиерот е отсутен од работата на Собранието од 14 ноември минатата година до 14 мај оваа година по што комисијата почна да расправа по ова прашање. Во меѓувреме претседателот на комисијата, Павле Богоевски, најави оставка од пратеничката функција па наместо тој со комисијата заседаваше заменик-претседателката Снежана Калевска-Ванчева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче од Атина: За работниците направивме најмногу, мора да знаат дека со социјалдемократијата нивните права и стандард ќе растат

За работниците направивме најмногу, мора да знаат дека со социјалдемократијата нивните права и стандард ќе растат. Ова го истакна претседателот на СДСМ, Венко Филипче, на панел-дискусијата „Прогресивен одговор на кризата на демократијата“, во рамките на втората Меѓународна конференција за демократија и социјална правда, организирана од Институтот „Алексис Ципрас“ во Атина.
На панелот, на кој учествуваа професори од неколку светски универзитети и други говорници, меѓу кои и од Универзитетот Харвард, Филипче, како претседател на СДСМ, ги сподели своите ставови за тоа како да се заштитат темелите на демократските општества, кои сè почесто се загрозени од дејствувањето на авторитарните режими.
„Мораме да ги потсетиме нашите традиционални гласачи – работниците. Треба да признаеме дека во изминатите изборни циклуси многу од нив гласаа за десните партии, заоа што се чувствуваа напуштени од нас“, изјави Филипче.
Тој го посочи примерот со Македонија, каде што, и покрај реалните вложувања и мерки за поддршка на работничките права, политиките не допреле до гласачите поради влијанието на хибридни инструменти што ги користат авторитарните режими.
„Тоа е парадоксот, ова е групата граѓани за кои направивме најмногу. Го зголемивме минималецот, обезбедивме социјална поддршка, но тие не ги препознаа придобивките од нашата политика“, рече Филипче, додавајќи дека мора да се преземат конкретни мерки против овие хибридни закани.
Како втора мерка, тој го нагласи значењето на подобар социјален и економски статус за работниците.
„Мораме да ги поврземе нивниот социјален и економски статус со животниот стандард, за да сфатат дека тоа е демократија, систем што им овозможува да ги остварат своите идеи и да постигнат благосостојба“, појасни Филипче.
Третата насока, според него, е справувањето со неконтролираниот капитализам.
„Особено сегашните и многу модерни, јас ги нарекувам технофеудалисти, кои успеаја да ги придобијат нашите традиционални гласачи, не затоа што им понудија подобри услови, туку затоа што го искористија нивниот страв од глобализацијата и имиграцијата.
Социјалдемократските и прогресивните либерални сили треба заеднички да ги искористат своите капацитети за запирање на подемот на авторитарните режими ширум светот#, рече тој. Филипче подвлече дека клучот лежи во отворената комуникација со граѓаните.
„Без разлика колку некое прашање изгледа ирационално, мора да разговараме за тоа, бидејќи кога луѓето се плашат од нешто и нешто не им е јасно, тогаш тие одат кон авторитарните режими, затоа што се чувствуваат побезбедно“, истакна тој.
Како заклучок, Филипче посочи дека иако предизвиците се големи, постои капацитет меѓу прогресивните сили да се здружат и да ги надминат опасностите што се закануваат на темелите на демократијата.
Македонија
Потпишан Меморандум за соработка помеѓу Македонија и Италија за користење на ЕУ фондови

Во рамките на официјалната посета на Република Италија од делегација на Националната агенција за европски образовни програми и мобилност, предводена од Петар Богојески, во Рим беше потпишан Меморандум за соработка помеѓу македонската и италијанската Национална агенција, предводена од Федерика Целестини Кампанари.
Овој стратешки документ претставува темел за унапредување на билатералната соработка во областите на образованието, науката, младите, спортот и културата, со што се отвораат нови перспективи за директна поддршка на македонските универзитети, училишта, младински организации и компании преку европски фондови од Брисел, чии финансиски капацитети се значително повисоки од оние кои се достапни преку националните програми.
Потпишувањето на ваков документ со една од основачките и водечки земји-членки на Европската Унија, Италија, претставува чин од особена важност за Република Македонија. Истовремено, тоа е јасен сигнал за проширување на европската солидарност и зацврстување на меѓусебната доверба и партнерство на полето на образовниот и научниот развој.
Со овој договор, корисниците од Република Македонија ќе добијат непосреден пристап до институционални мрежи, програми и партнери од Италија, со можност за заедничка реализација на проекти и иницијативи од европски ранг.
Ова партнерство претставува уште еден чекор напред во заложбите на Националната агенција за создавање нови можности за македонските граѓани, во духот на европските вредности, меѓународната соработка и одржливиот развој.
Националната агенција изразува длабока благодарност до италијанските домаќини за топлиот прием и за визионерскиот пристап кон заедничката европска иднина на нашите млади генерации.
Македонија
Ѓорѓиевски: Награди за талентираните ученици

„Кисела Вода изобилува со талентирани ученици, на што сме исклучително горди! За таа цел, објавен е јавниот повик за доделување на награди на талентирани ученици и спортисти од основните училишта на територијата на Кисела Вода, што претставува еден стимул за нивното понатамошно градење како личности“, велат од Општината.
„Имено, се работи за Јавен повик за пријавување на најдобрите основци кои, постигнале одлични резултати на натпреварите во образованието, културата, науката и спортот кои ќе добијат финансиска поддршка, а мешовити комисии составени од претставници на Советите на родителите, наставничките совети, општинската администрација итн, ќе се погрижат за објективен и транспарентен избор на најдобрите, согласно Правилниците донесени од страна на Советот на општината, за таа намена.
Огласот е објавен на веб страната на општината и ќе трае пет дена од денот на објавувањето, а покрај објавата на општинската веб-страна и социјалните медиуми, истиот ќе биде објавен и на огласните табли на сите воспитно-образовни установи во општината.
Ги повикуваме сите заинтересирани кандидати кои ги исполнуваат условите наведени во огласот, да не се колебаат и да земат учество во изборот“, се додава во соопштението на Општината.
Јавниот оглас и потребните документи за апликација може да ги најдете на следниот линк