Македонија
Османи и Димитров во Париз на разговори за евроинтеграциите на земјата
![](https://makfax.com.mk/wp-content/uploads/2019/06/Paris-1.jpeg)
Вицепремиерот задолжен за европски прашања Бујар Османи и министерот за надворешни работи Никола Димитров, престојуваа во работна посета на Париз. Двајцата имаа одделни средби со државниот секретар за европски прашања, Амели де Моншален во француското Министерство за надворешни работи и со Клеман Бон, советник за Европа во кабинетот на претседателот Емануел Макрон.
На средбите, како што соопшти владината прес-служба, вицепремиерот Османи и министерот Димитров го истакнале значењето на последниот Извештај на Европската Комисија кој прецизно го рефлектира степенот на постигнатите реформи во Република Северна Македонија во изминатата година, и јасно дефинираната препорака за отпочнување на преговорите на нашата земја со Европската Унија, што ја потврдува нашата целосна подготвеност за следната фаза од овој долготраен процес. Соговорниците биле детално брифирани за постигнатиот напредок во клучните области кои се дел од заклучоците на Европскиот Совет минатата година, а се солидна основа за донесување одлука од страна на Европскиот Совет за почеток на преговорите со Северна Македонија, оваа година.
„Уверени сме дека Франција ќе препознае дека нашата жед и работа за создавање стабилна и просперитетна европска демократија дома, целосно се совпаѓа со визијата и напорите на претседателот Макрон за силна, стабилна и просперитетна Европа“, потенцирал министерот Димитров.
Европските перспективи, како што истакнал Османи, претставуваат единственото гориво кои имаат доволно сила за да ја придвижат трансформативната моќ на Европската Унија на Балканот, која, токму на примерот на Република Северна Македонија покажа на дело дека умее да ги менува општествата на подобро, што претставува основа и за подлабоко, регионално влијание, како заемен интерес во создавањето трајна стабилност и просперитет на целиот континент.
„Задржувањето на моментумот на континуирано заедничко чекорење за имплементација на реформската агенда и валоризацијата на постигнатиот прогрес на нашата земја, недвосмислено ќе придонесат за силно зацврстување на европската перспектива во Регионот, но и ќе го потврди кредибилитетот на Европската Унија“, додал тој.
Соговорниците размениле мислења и за француската Стратегија за Западен Балкан која претставува комлементарен процес со процесот на интегрирање на земјите од Регионот во Европската Унија, преку поддршка на реформската агенда за поскора имплементација на европските стандарди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Царинска управа: Мобилен тим спречи криумчарење на два тона месо штетно за здравјето на граѓаните
![](https://makfax.com.mk/wp-content/uploads/2024/07/13_13-002.jpg)
Мобилен тим на Царинска управа викендов спречи криумчарење на два тони месо штетно за здравјето на граѓаните. Превозникот воедно и сопственик на транспортното возило, месото не го пријавил со царинска декларација, а за истото не поседувал ниту ветеринарен сертификат. По поднесена кривична пријава, донесена е и пресуда за сторено кривично дело, криумчарење на стока.
Имено, во саботата на царинска испостава Богородица на влез во државата се пријави товарно возило со грчки регистарски таблички, за коешто со царински документ беа пријавени 28 колети вода, пити, салати и пиперки. Заради извршување на детален преглед возилото е пренесено во јавен царински склад, каде по отпочнување на прегледот превозникот изјавил дека има и друга непријавена стока, замрзнато свинско месо, чија што вредност согласно дополнително приложените документи изнесува 11 илјади евра.
Случајот е преземен од страна на инспектори во Одделение за истраги при Сектор за контрола и истраги, кои поднесоа кривична пријава до Основен кривичен суд Гевгелија, каде е донесена пресуда за сторено кривично дело „Криумчарење“ по член 278 од Кривичниот законик.
Царинска управа согласно своите приоритети во континуитет спроведува акции за сузбивање на сите форми на криминал, грижејќи се за безбедноста на граѓаните.
Македонија
(Видео) Спасен маж од длабока тиња и кал, како од „жив песок“, на реката Пчиња
![](https://makfax.com.mk/wp-content/uploads/2024/07/f5a49109-611e-482f-9b5b-0a370b6f9f70.jpg)
Центарот за управување со кризи објави дека утрово имало спасувачка акција на реката Пчиња, каде што човек пропаднал до гуша во тиња и кал.
„Денеска, од пред зори имаше неколкучасовно, успешно, а опасно извлекување од длабока тиња и кал како „жив песок“ и за заробениот човек и за спасителите – пожарникарите, Конкретно, покрај кумановскиот дел од река Пчиња, имаше комбинирана спасителна акција од страна на пожарникарите од Територијалната противпожарна единица и Итната медицинска помош од Куманово.
Кумановските пожарникари, на чело со командирот на смена Сашо Илиевски, неколку часа, од околу 04.00 часот па до 07.00 часот утрово беа во спасувачка акција. Итниот случај го пријавил на 112 во ЦУК риболовец, којшто ги слушнал повиците за помош на лицето кое покрај реката заглавило во длабоката тиња и кал, на тој потег од реката Пчиња.
Ситуацијата била опасна, бидејќи полека, како што лицето, возрасен маж, сакало да се самоизвлече се повеќе пропаѓало на местото каде што почвата била буквално, како маскиран „жив песок“ со исушен слој најгоре, на површината, од топлото време, а надоу како да немало дно“, информираат од ЦУК.
Тимот пожарникари, како што додаваат, брзо и навреме стигнал до оддалеченото место од пристапен пат, бидејќи лицето било веќе речиси до рамења и врат пропаднато и на крај од неговите сили заради долготрајното заглавување при што полека тонело во меката почва.
Пожарникарите успеале да го фатат со јажиња од нивната опрема и полека почнале да го извлекуваат, при што било потребно и нивно доизвлекување, бидејќи и тие тонеле полека во меката почва. Еден со друг тимски си помагале, етапа по етапа, од сложеното, а навидум едноставно, извлекување и спасување на заглавеното лице, од опасниот терен.
Откако пожарникарите го извлекле од длабока тиња и кал, што била буквално како „жив песок“, лицето речиси се онесвестило и го ставиле на специјалната спасителна даска за носење. Додека едни го носеле, други со секири го расчистувале пред нив патот од вегетацијата и дрвјата за да се пробијат до пристапниот пат каде ги чекала Итната медицинска помош. Настраданиот е жив, но многу истоштен и снеможен од долготрајното заглавување. Тој е веќе во болница во Куманово и е надвор од животна опасност, соопшти ЦУК.
Македонија
ВМРО-ДПМНЕ: Венко Филипче сигурно не е Чак Норис, но е лопов ископиран со индиго на Заев
![](https://makfax.com.mk/wp-content/uploads/2022/12/VMRO-DPMNE-sedishte-3.jpg)
Ја разбираме фрустрацијата на СДС и Венко Филипче кои се китат со перјата на оваа влада. Но нивното време заврши. За само две недели, две големи инвестиции. Инвестицијата од 500 милиони долари на Алказар Енерџи во ветерен парк е најголема во регионот. И инвестицијата на германско белгиската компанија Епсотех Аим во Петровец од 20 милиони евра. Се потврди по којзнае кој пат и дека за СДСМ само ВМРО-ДПМНЕ може да донесе нови инвестиции во државата, што зборува за недостатокот на елементарна работливост од страна на СДС кои 7 години здружно крадеа со ДУИ, па затоа за нив посветеноста на оваа влада е недостижна цел на која ѝ придаваат супер моќи, велат од ВМРО-ДПМНЕ.
Според партијата на власт, Венко Филипче сигурно не е Чак Норис, но е лопов ископиран со индиго на Заев, 7 години на власт 0 инвестиции.
Од друга страна, како што додаваат, додека Владата предводена од ВМРО-ДПМНЕ работи СДСМ повторно прави очајнички обиди да го минимизира успехот на новата влада на ВМРО-ДПМНЕ.
„Очигледно е дека реалноста и напорната работа на ВМРО-ДПМНЕ ги надминуваат нивните способности. Но, ние ќе продолжиме да работиме напорно и да ги постигнуваме нашите цели, без оглед на саркастичните и несериозни коментари од СДСМ, партијата која ја урниса државата претворајќи ја во срамна филијала на белосветскиот и домашниот криминал. Венко Филипче и Зоран Заев се лошото лице на власта на СДС и ДУИ. Нашата посветеност кон привлекување инвеститори е јасна и недвосмислена. Преку промовирање на Македонија како стабилна и атрактивна дестинација за инвестирање, ние ќе продолжиме да ги реализираме нашите ветувања и да ја подобруваме економската состојба на сите граѓани“, се истакнува во реакцијата на ВМРО-ДПМНЕ откако од СДСМ во нивното соопштение истакнаа дека само Мицкоски и Чак Норис можат за два дена власт да донесат нова инвестиција, доста се китите со туѓи перја.