Регион
Доживотен затвор за тројца Бугари поради смртта на 71 мигрант
Судот во Унгарија на доживотен затвор осуди четворица шверцери на луѓе поради смртта на 71 мигрант, чии тела биле пронајдени натрупани во камион оставен на австриски автопат во август 2015 година, пренесе „Ројтерс“.
Во пресудата на судијата Ерик Мезолаки стои дека за тројца шверцери нема да има можност за предвремено пуштање на слобода, а четвртиот ќе треба да отслужи најмалку 30 години затвор.
Лидерот на шверцерската дружина со потекло од Авганистан и тројца бугарски државјани се обвинети за убиство без предумисла бидејќи одбиле да го запрат камионот и да ги отворат вратите за да дојде воздух до мигрантите иако тие ги предупредиле дека почнуваат да се задушуваат.
Во текот на судењето се дозна дека додека се возеле, мигрантите во еден момент сфатиле дека ќе се задушат и почнале да удираат на вратата викајќи му на возачот да го запре возилото.
Смртта на 59 мажи, осум жени и четири деца од Сирија, Ирак и од Авганистан, што се случи за време на мигрантската криза, ја згрози Европа.
Трагичниот настан беше најлошиот од ваков вид на балканската рута по која се движеа стотици илјади луѓе од Блискиот Исток, Африка и од Азија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.