Судија за извршување санкции при Основниот кривичен суд во Скопје, надлежен да
постапува по предметот на СЈО – „Труст“, изготвил и доставил упатен акт за бизнисменот Сеад Кочан, кој со правосилна пресуда е осуден на ефективна казна затвор од четири години и 8 месеци. Тој треба да се јави во затвор на 17 јули.

„Според упатниот акт, а во согласност со член 137 и 139, ст.3 од Законот за извршувањето санкции, осудениот е должен на 17.7.2019 да се јави на издржување на казната затвор во наведената казнено-поправна установа“, соопштија од Кривичниот суд.

На обвинетиот Василије Авировиќ во предметот „Труст“ скопска Апелација му изрече алтернативна мерка условна осуда, казна затвор во траење од 2 години, која нема да се изврши доколку обвинетиот за време од 5 години по правосилноста на пресудата не стори ново кривично дело.

Сеад Кочан претходно со првостепената пресуда беше осуден на 6 години затвор, а Авировиќ на 3 години. Обвинетите беа осудени за злоупотреба на постапка за јавна набавка. И двајцата добија забрана за вршење дејност и да бидат управители или одговорни лица на правно лице во траење од 3 години. Третообвинениот во предметот, Сафет Ватиќ, беше ослободен од обвинението, како и неговата фирма „Вато“ ДООЕЛ.

Правните лица „Трансмет“ и „Силекс неметали – Кратово“ добија парична казна од два милиона денари. И двете фирми добија забрана за учество во јавни набавки за три години. Судот за нив определи и конфискација на имот од 1 милијарда и 60 милиони денари.