Шеф на американската дипломатија Џон Кери и неговиот руски колега Сергеј Лавров одржаа во неделата доцна вечерта во Рим тричасовни разговори на коишто главно дискутираа за украинската криза, првпат по американскиот Конгрес за законот со кој се најавуваат нови санкции против Русија и се дозволуваат испораки на смртоносно оружје за Украина.

За време на разговорите Лавров изјавил дека заемните односи меѓу Русија и САД можат да се развиваат само врз основа на рамноправни односи и сите обиди за вршењето притисок врз Москва ги смета за безнадежни, објави руското министерство за надворешни работи на својата страница на социјалната мрежа Facebook.

„Во контекст на ситуацијата во југоисточна Украина, беше акцентирана неопходноста од спроведување на договорот од Минск и скорешно свикување на Контактната група со таа цел“, се наведува во соопштението што го цитира агенцијата ТАСС.

Кога станува збор за билатералните односи, се додава уште во соопштението на руската дипломатија, Лавров истакна дека нивниот развој е возможен само врз рамноправна односа и почитување на заемните интереси.

Кери и Лавров разговарале и за актуелните меѓународни проблеми, вклучително и „потребата да му се даде нов импулс на израелско-палестинските мировен процес, за решавањето на сирискиот конфликт и развој на сеопфатен договор за иранската нуклеарна програма“.

Русија во неделата се закани со соодветен одговор доколку биде применет текстот насловен „Чин на поддршка на слободата на Украина“, кој американските пратеници го прифатија едногласно. Со него се отвора пат за нови американски санкции против Русија поради наводната нејзина улога во Украина, како и доставување смртоносно оружје на силите лојални на прозападните власти во Киев кои од април војуваат за враќање под контрола на одметнатите југоисточни рускојазични територии.

„Нема сомнение дека моравме да реагираме“, предупреди помошникот на рускиот министер за надворешни работи Сергеј Рјабков, пренесува AFP.

Американскиот претседател може да избира дали споменатиот текстот прифатен во Конгресот и во Сенатот ќе го прогласи за закон или на нега да стави вето. Белата куќа засега не ги открива своите намери, иако претседателот Барак Обама неодамна го оцени како „контрапродуктивно“воведувањето нови американски санкции без усогласување со Европската унија.

И испораката на оружјето од САД во Украина, зависи од претседателот Обама кој засега се спротиставува, потсетува Reuters.

„Имаме голем број прашања за разгледување “ едноставно изјави Кери пред почетокот на разговорите, кои беа всушност 17-та директна средба на двајцата дипломати истакнувајќи ја благодарноста до Лавров што ја прифатил средбата којашто се одвиваше во резиденцијата на американскиот амбасадор во Рим.

Во врска со ситуацијата во Украина, Кери го потврди значењето на „целосното спроведување на договорот од Минск во насока на смирувањето на ситуацијата на теренот. Вашингтон сака спогодбата за прекин на огнот потпишана на 5-ти септември во белоруската престолнина да се спроведе бидејќи „општо се смета за најдобар начин за доаѓање до смирување“./крај/мф/сн

Извор: Макфакс