Свет
Египет бара откажување на аукцијата на 3.000 години старата биста на Тутанкамон

Египет побара од аукциската куќа „Кристис” во Лондон да ја запре продажбата на бистата на момчето крал Тутанкамон бидејќи египетските официјални претставници тврдат дека артефактот бил украден и треба да биде вратен, пренесува „Брејтбарт“.
„Кристис” планира да ја продаде бистата стара повеќе од 3.000 години за околу 5 милиони долари, но египетското МНР се спротивстави на планот.
„Министерството за антиквитети контактирало со аукциската куќа и со УНЕСКО за да ги прекине процедурите за продажба на античкиот артефакт и бара ‘Кристис’ да ги обезбеди документите за сопственоста на артефактот. Освен тоа, Египет го посочува своето право врз артефактот според сегашните и претходните египетски закони”, објави египетското МНР доцна во средата.
Поранешниот египетски министер за антиквитети, Захи Хавас, исто така, се вмеша во контроверзноста, тврдејќи дека се чини оти артефактот бил украден во 1970-тите од комплексот на храмот Карнак.
Тутанкамон умрел пред повеќе од 3.000 години на возраст од 19 години. Неговите останки биле пронајдени во 1922 година. Бистата од кафен кварцит доаѓа од приватна колекција со античка уметност што од „Кристис“ последен пат ја продале за 3 милиони фунти во 2016 година.
Во соопштението, од аукциската куќа велат дека артефактот не е ниту бил предмет на истрага и нагласуваат дека никогаш нема да стават на аукција предмет за кој има законски проблеми, пренесува Би-би-си.
Од „Кристис“, исто така, објавија хронологија на сопствениците на бистата во изминатите 50 години. Се смета дека бистата прв ја поседувал принцот Вилхелм фон Турн помеѓу 1973 и 1974 година.
Египет во 1983 година воведе закони за забрана на изнесување артефакти од земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Сè уште размислувам дали ќе присуствувам на преговорите за Украина во Турција

Американскиот претседател Доналд Трамп изјави денес дека сè уште размислува дали ќе присуствува на разговорите за прекин на огнот во Украина, планирани за утре во Турција, но дека не знае дали во нив ќе учествува и рускиот претседател, Владимир Путин.
„Тој би сакал да бидам таму и тоа е можност. Не знам дали би бил таму ако јас не сум таму. Ќе дознаеме“, им рече Трамп на новинарите во претседателскиот авион на пат кон Катар, објави „Ројтерс“.
Трамп рече дека би можел да ја посети Турција на разговори како дел од престојот на Блискиот Исток оваа недела, иако неговиот распоред на посети и разговори е преполн и тој треба да биде во Обединетите Арапски Емирати утре.
„Тоа не значи дека не би го направил тоа за да спасам многу животи и да се вратам“, рече Трамп, според извештајот на „Вашингтон пост“.
Трамп потврди дека американскиот државен секретар Марко Рубио ќе биде присутен на разговорите меѓу претставниците на Русија и Украина во Истанбул. Украинскиот претседател Володимир Зеленски вчера изјави дека ќе присуствува на преговорите во Истанбул, само доколку биде присутен и Путин, објави „Танјуг“.
Кремљ денес објави дека ќе испрати делегација во Истанбул, без да прецизира кој ќе ја претставува Москва.
Свет
Папата Лав понуди Ватикан да посредува во решавањето на конфликтите во светот

Папата Лав XIV денес понуди Ватикан да посредува во решавањето на конфликтите во светот. Ватикан е достапен да им овозможи на непријателите да се сретнат и да се погледнат в очи за народите да ги вратат надежта и достоинството што им припаѓаат, рече папата додека примаше претставници на 23 католички цркви од источен обред.
Папата исто така ги повика источните христијани да не ги напуштаат своите земји барајќи ги за себе „сите права потребни за безбеден опстанок“.
Во својот прв неделен благослов како римокатолички лидер папата Лав XIV повика на праведен мир во Украина и итен прекин на огнот во Газа заедно со ослободување на заложниците и испорака на хуманитарна помош.
Свет
Европската комисија: Транспарентноста ни е најважна, ќе ја проучиме одлуката за пораките на Фон дер Лајен

Европската комисија денес реагира на пресудата на Судот на правдата на ЕУ велејќи дека ја зема предвид, дека внимателно ќе ја проучи и ќе одлучи за следните чекори. „Комисијата сега внимателно ќе ја проучи одлуката на Општиот суд и ќе одлучи за следните чекори. За таа цел, Комисијата ќе донесе нова одлука со подетаљно образложение“, се вели во соопштението на Комисијата.
Општиот суд на Европската Унија пресуди дека Европската комисија не дала убедливо објаснување за тоа што не ги поседувала бараните документи, СМС-пораките меѓу претседателката на Комисијата, Урсула фон дер Лајен, и извршниот директор на фармацевтската компанија „Фајзер“, во кои разговарале за набавка на вакцина против коронавирус.
Во соопштението на Комисијата се наведува дека Општиот суд смета дека Комисијата требало да даде подетаљно објаснување во својата одлука дека не поседува документи од бараниот тип.
„Општиот суд не ја доведува во прашање политиката на Комисијата за регистрација во врска со пристапот до документи. Целта на овие правила е да се обезбеди интегритетот на евиденцијата на Комисијата и целосна транспарентност преку обезбедување на важните документи составени или примени од Комисијата да бидат лесно достапни за заинтересираните граѓани на ЕУ“, истакнува Комисијата.
„Транспарентноста отсекогаш била од најголема важност за Комисијата и за претседателката Урсула фон дер Лајен. Ќе продолжиме строго да се придржуваме до воспоставената робусна законска рамка за спроведување на нашите обврски“, додаде Комисијата.
Претседателката на Комисијата, Урсула фон дер Лајен, и извршниот директор на „Фајзер“, Алберт Бурла, размениле пораки, чија содржина останува непозната за јавноста, во време кога Комисијата преговараше за договори вредни повеќе милијарди евра за набавка на вакцини против коронавирусот.