Македонија
Камчев: Не е срамота да се разговара за криминал
Бизнисменот Орце Камчев во денешното сведочење за случајот „Тортура“ во врска со разговорот за апсењето на Љубе Бошкоски, меѓу него и новинарката Оливера Трајковска, рече дека комуникацијата се случила затоа што предметот бил интересен и сите во Македонија разговарале за апсењето на лидерот на Обединети за Македонија.
„Сите разговараа за тоа зашто многу беше интересен предметот. Не е срамота да се разговара за криминал, сигурно и вие сте разговарале за тоа“, му рече Камчев на обвинителот на СЈО, Љубомир Лапе.
Прашан од обвинителот што знае за апсењето на Бошкоски, Камчев кажа дека му било познато дека одреден човек примил мито да преговара за име, дека МВР го уапсила и ништо повеќе.
Камчев на крајот од сведочењето кажа дека не верува дека аудиоснимките се вистинити и може да се сечени, лепени и монтирани.
„Од разговорот кој беше пуштен во јавноста помеѓу мене и Орце Камчев, бидејќи велиме ‘пријателот’, потврдувам дека станува збор за Сашо Мијалков. Тој му ја дал информацијата за апсењето на Бошкоски“, рече Трајковска.
Предметот „Тортура“ на СЈО е за начинот на апсењето на Љубе Бошкоски во 2011 година. За овој случај се обвинети Сашо Мијалков, поранешниот прв човек на полициските „алфи”, Ивица Антевски-Пуки и уште петмина припадници на единицата.
Одговараат за мачење и друго сурово, нечовечко или понижувачко постапување и казнување, за начинот на лишување од слобода на претседателот на Обединети за Македонија на 6 јуни 2011 година, ден по предвремените парламентарни избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Каевски од голтар до милионер, фатен како прави милионски проневери како директор на Агенцијата за млади и спорт, велат од ВМРО-ДПМНЕ
Каевски од голтар до милионер, фатен како прави милионски проневери како директор на Агенцијата за млади и спорт, велат од ВМРО-ДПМНЕ.
„Дарко Каевски како директор на Агенцијата за млади и спорт заобиколувајќи ги законските процедури извршил распределба на пари преку така наречените ваучери до клубови и федерации, кои одредена фирма ги реализирала под услов дел од парите да ги добие назад преку даночно ослободување“, дополнуваат од ВМРО-ДПМНЕ.
Според нив, Каевски е фатен на дело, и веќе на сите им е јасно зошто излегувал и ширел лаги и манипулации во јавноста.
„Тоа се кадрите на СДС, како Дарко Каевски, вмешани во криминал и корупција. Време е Македонија да се ослободи од криминалците како Каевски. Време е да ја вратиме Македонија на народот. Македонија повторно твоја“, завршуваат од ВМРО-ДПМНЕ.
Македонија
Нестабилно време со пороен дожд, грмежи и ветер
Времето ќе биде променливо облачно, од пладневните часови на повеќе места нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта, соопшти УХМР.
Минималната температура ќе биде во интервал од 6 до 12, а максималната ќе достигне од 18 до 25 Целзиусови степени.
Во Скопје ќе биде променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени.
Следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град. Дневната температура од утре до сабота ќе биде во постепено опаѓање, а во недела ќе се покачи за 2 до 4 степени.
Скопје
Без струја дел од корисниците на Волково и Кучково
Дел од корисниците на Волково и Кучково во Општина Ѓорче Петров од 7 до 16 часот ќе немаат електрична енергија.
Како што информира Регионалниот центар за управување со кризи на Град Скопје, по добиеното известување од ЕВН, прекинот на струја е поради технички зафати во електродистрибутивната мрежа.