Економија
ССК: Деловната заедница со намалена доверба во судството

Недовербата во судскиот систем се зголемува, изјави претседателката на Сојузот на стопански комори (ССК), Данела Арсовска, која со претседателот на Комората на медијатори, Славе Младеновски, официјално го потпишаа догoворот за пристапување на Комората на медијатори во Сојуз на стопански комори на Македонија.
Арсовска рече дека со пристапувањето на Комората на медијатори во рамки на Сојузот внесуваат уште еден, значаен сегмент во работењето, а тоа е сеопфатниот структуриран систем за алтернативно решавање на споровите со медијацијата или постапка за компромисно решавање на споровите.
„Недовербата во судскиот систем се зголемува, владеењето на правото е еден од предизвиците на кои алармираат и меѓународните институции во извештаите, а судските постапки траат несразмерно долго, што е и причина за незадоволство кај деловната заедница. Должината на траење на судските постапки резултира со пролонгирање на разврска на должничко доверителските спорови, при што неможноста да се наплатат побарувањата имаат за последица проблеми во ликвидност на компаниите, а кај оние со големи побарувања во судски спорови дури и отпочнување постапки за стечај поради неможност за сервисирање на обврските. Сојузот, како застапник на интересите на приватниот сектор, алармира на потребата да се афирмира како алтернативен начин на решавање на стопанските спорови со акцент на заштеда на време и средства кај компаните, во време кога е неопходно да се почне со реализација на структурни реформи во судството кои би ја вратиле изгубената доверба кај деловната заедница“, истакна Арсовска.
Претседателот на Комора на медијатори, Младеновски, на официјалното пристапување во Сојузот истакна дека во период што следи ќе се заложат нашата земја да биде лидер во регионот во областа на медијацијата.
„Комората на медијатори со пристапувањето во Сојузот на стопански комори на Македонија продолжува со политиката на градење мостови на соработка и пријателство со деловната заедница. Ние во Сојузот гледаме партнер, соработник и пријател. Видовме големи можности заеднички да направиме промени во пристапот кај стопанствениците во решавање на споровите. Со предавања и информирање ќе ги запознаеме со предностите и карактеристиките на медијацијата. Со изборот на оваа постапка деловната заедница ќе испрати јасна порака во јавноста дека е подготвена за соработка врз основа на интересот“, изјави Младеновски и додаде дека со медијацијата се придонесува во намалување на големата поделеност по различни основи и во намалување на конфликтноста во општеството.
Од европските земји, Кралството Холандија има висок процент на застапеност на медијацијата во решавањето на споровите. Во Македонија вкупната бројка на медијации од 2007 до 2016 година, не можеше да достигне троцифрен број, од 2017 година, се забележува драстична разлика. Лиценцираните медијатори, заклучно со 10 април 2019 година прикажаа внес на 1364 предмети во регистарот на Министерството за правда. Согласно статистиката на Министерството за правда, од вкупно 1364 предмети кои досега се евидентирани во регистарот на Министерството за правда, 79%, односно 1079 завршиле со спогодба. Што се однесува до стопанските спорови, од 395 медијации по овој основ пред медијаторите, 129 или 32,6% завршиле со постигнати спогодби.
Сојузот на стопански комори на Македонија е најголема деловна организација во земјава со 34 стопански комори, секторски, билатерални, регионални и со над 30 групации, здруженија и асоцијации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.