Свет
Под урнатините на Помпеја демнат неексплодирани бомби од Втората светска војна
Најмалку 10 неексплодирани бомби фрлени од сојузничките сили врз Помпеја во 1943 година, за време на Втората светска војна, остануваат во историската област, тврди италијанскиот весник „Ил фато квотидиано“.
Весникот ги проучувал документите од Националната архива на фотографии од воздух, вклучувајќи една карта за бомбардирање, и интервјуирала археолози и историчари за да дознае дали еден од најпопуларните археолошки локалитети во светот е еден вид минско поле, бидејќи се уште не е познато каде се наоѓаат некои бомби.
Според новинарите, сојузничките воздушни сили фрлиле 165 бомби врз античкиот град на 24 август 1943 година, на истиот ден кога Везув избувнал во 79 година п.н.е.
Со текот на годините, во областа беа лоцирани 96 бомби, а многу биле деактивирани или експлодирале самите од себе. Но, некои треба допрва да се откријат во неистражена област што опфаќа 22 хектари, бидејќи нема информации за нив во официјалните документи.
Весникот го цитира професорот од универзитетот „Суор Орсола Бенинкаса“ во Неапол, Антонио де Симоне, кој открил една од бомбите додека ископувал во античкиот римски град во 1986 година. Сепак, како што истакна Археолошкиот музеј Помпеја, посетителите се безбедни во областа и не постои ризик за нив бидејќи тиесмеат да се движат само во расчистените делови.
„На локалитетот редовно се спроведува проектот за расчистување од страна на војската, а чистењето на теренот се изведува на секој метар,“ вели музејот.
Во меѓувреме, вулканот Везув може да претставува уште поголема опасност бидејќи се вели дека е се уште активен и е под 24-часовен надзор поради постојаната опасност од ерупција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.
Свет
Девојка од Чикаго на 17 години стана доктор на науки
Дороти Џин Тилман од Чикаго стана најмладата личност, на 17 години, што успеа да се здобие со докторска диплома за интегрирано бихевиорално здравје во Аризона.
„Ова е прекрасна прослава и се надеваме дека Дороти Џин ќе инспирира повеќе студенти. Но, ова е нешто многу ретко и уникатно“, вели вонредниот професор Лесли Менсон.
Кога повеќето ученици се обидуваат да се адаптираат во средно училиште, Дороти веќе беше запишана на колеџот во Лејк Каунти во северен Илиноис, каде што дипломира психологија.
Во 2018 година таа дипломира на отсекот хуманитарни науки на колеџот „Екселсиор“ во Њујорк. Две години подоцна, магистрира на колеџот „Јунити“ во Мејн пред да биде примена на Програмата за бихевиорално управување.
Поголемиот дел од нејзиното образование го реализира на далечина, преку онлајн настава.
Како што вели таа, најголема заслуга за целото нејзино образование има нејзината баба, како и нејзината мајка, на која е благодарна за помошта и насочувањето. Секако, целиот образовен процес не бил без жртва.
„Немав секојдневна училишна работа, немав училишно фотографирање или работи кои создаваат единство меѓу врсниците “, вели таа.