Иранскиот претседател Хасан Роухани го осуди обезглавувањето на невините луѓе и изјави дека со таквите потези терористите од радикалната сунитска џихадистичка група Исламска држава ги кршат исламските начела, според цитатите што ги пренесуваат медиуми од неговото интервју за американската телевизиска мрежа NBC News. Истовремено има извештаи дека силите на исламската дражва започнале да се повлекуваат од Сирија пред најавите дека американските сили ќе ги бомбардираат нивните позиции.

„Според исламските начела и култура, убивањето на невини луѓе е еднакво на убивањето на целото човештво и според тоа, убивањето и отсекувањето на главите на невините луѓе е всушност срамота за нив и извор на загриженост и тага за секој човек и за целото човештво“, изјави иранскиот претседател Хасан Роухани во интервју во пресрет на неговото доаѓање следната седмица во Њујорк на годишното заседание на Генералното собрание на Обединетите нации, на којашто, како што се очекува главно ќе се говори за сузбивањето на џихадистичката Исламска држава.Зборовите на претседателот на шиитската Исламска Република Иран, доаѓаат по бруталните обезглавувања на американските новинари Џејмс Фоли и Стивен Сотлоф. Минатата седмица се појави уште еден видео материјал на кој беше прикажано отсекувањето на главата на британскиот хуманитарен активист Дејвид Хејнс. Сите тие беа подолг период во заложништво на сунитските радикали откако беа грабнати во Сирија. Според повеќе сведоштва, вакви брутални, како и други видови свирепи масовни и јавни егзекуции, припадниците на Исламската држава практикуваат и врз други нивни заложници или противници, без разлика дали се сунити или шиити.САД настојуваат да воспостават меѓународна коалиција за борба против исламската милитантна група, а исламскиот врховен лидер ајатолахот Али Хамнеи претходно седмицава изјави дека ја одбил понудата на Вашингтон за разговори за ова прашање.Американскиот претседател Барак Обама во средата изјави дека досега повеќе од 40 земји ветиле учество на некој начин во коалицијата против Исламската држава. Во очекување е дека Обама многу скоро ќе се сретне со својот тим советници за национална безбедност со кои ќе разговара за состанокот во ОН за Исламската држава.Доцна вечерта во средата, од џихадистички извори беше пренесено дека борците на Исламската држава поради американските закани за воздушни напади се повлекле од неколку позиции во источна покраина на Сирија која во поголем дел ја држат под контрола. „Исламската држава започна да ги напушта своите бази и позиции во покраината Деир ал-Езор“, чијшто поголем дел е под контрола на џихадистите од оваа организација, изјавил за AFP Абу Осама, борец од споменатата област.Осама, со кого агенцијата стапила во контакт преку интернет, рекол и дека се „затворени“ сите познати позиции на Исламската држава во Ешар, 60 километри од главниот град Деир ал-Езор. Џихадистите ја напуштиле и поранешната зграда на покраинската влада во Деир ал-Езор, претворена во најголемото складиште во регионот на Исламската држава, рекол Осама. „Во градот Мајадин (во близина на ирачката граница) Исламската база се повлече од осум бази и има отворени само три бази“, додал. „Се повлекуваат дури и од нафтените полиња. Евакуирани се семејствата на странските џихадисти коишто живееја во станбените згради во близина“, соопштил борецот соговорник на AFP.Исламската држава во сирискиот судир се појави во пролетта 2013 година, тогаш уште како дел од глобалната терористичката мрежа Ал Каеда, полека станувајќи доминантната сила којашто се бори против владините сириски сили на претседателот Башар ал-Асад. Од почетокот на 2014 година, џихадистите од IS успеаја да ги потиснат од богатата покраина Деир ал-Езор другите исламистички групи и сунитските опозициски сили. Војската на Асад, којашто истовремено се бори и со бунтовниците и со Исламската држава, сѐ уште контролира некои сектори во градот Деир ал-Езор како и воената воздухопловна база во таа покраина.Џихадистите наводно се повлекуваат од Сирија по заканите на Вашингтон дека ќе ги прошири воздушните удари коишто веќе ги спроведува против Исламската држава во Ирак.Џихадистите останале на позициите во Рака, најголемото упориште на Исламската држава во Сирија, изјавил борец кој од страв од одмазда се крие зад псевдонимот Фурат ал-Вафа. „Базите уште се таму, иако IS го повлече оружјето од некои позиции. Меѓутоа во градот IS и натаму е присутна“, порачал преку интернет./крај/мф/сн

Извор: Reuters/AFP