Министерката за труд и социјална политика, Мила Царовска, присуствуваше на доделувањето ортопедски помагала на лица со телесна попреченост со кои подвижноста и мобилноста ќе им се подобри и зголеми.

Помагалата се обезбедени од Националниот сојуз на лица со телесен инвалидитет – „Мобилност Македонија“, со средства од МТСП, кои му се доделени на Сојузот во согласност со програмата за работа и одобрениот финансисики план за 2018 година. Вкупната сума потрошена за ортопедски помагала изнесува 1,6 милион денари.

„Навистина ми е драго што денеска 36 лица со потешка телесна попреченост ги добиваат помагалата што им се потребни. Министерството за труд и социјална политика прави напори со обезбедувањето средства потребни за функционирањето на Националниот сојуз на инвалидските организации и Националниот сојуз на телесно инвалидизирани лица на Македонија – ‘Мобилност Македонија’ да ја поттикне работата на полето видливост на лицата со попреченист, а со овие ортопедски помагала и олеснувањето на движењето, присуството на лицата со попреченост во социјалниот живот ќе биде секојдневиe“, изјави министерката Царовска.

Истовремено, од МТСП наведуваат дека со најновите измени на Законот за социјалната заштита значително ги унапредуваат правата на лицата со попреченост, со тоа што се воведуваат две нови услуги – домашна нега и лична асистенција.

Бранимир Јовановски од „Мобилност Македонија“ вели дека во согласност со програмата за работа Сојузот обезбедува соодветна парична помош на членовите во случаи кога треба да платат или партиципираат за користење неопходни здравствени услуги или набавка на помагала, а во границите на финансиските можности на Сојузот, како и во склад со актите на Сојузот и за оваа намена се на располагање 271.890,00 денари, кои се префрлени на 16 општински здруженија – членки на Сојузот.