Култура
Јубилејниот „Грин бич фестивал“ вечерва го отвора светската легенда Пол Калкбренер
Вечерва, во 21 часот, најпознатиот фестивал на електронската музика во земјата, „Грин бич“, ги отвора фестивалските капии за своето јубилејно 10-то издание, кое сѐ до раните утрински часови в сабота, ќе се одржува на фестивалската локација кај хотелот „Еуротел“ во Струга! По девет незаборавни изданија покрај Охридското Езеро, „Грин бич“ како синоним за најквалитетно електронско доживување кај нас ја продолжува и традицијата на претставување на врвните уметници од светската сцена во зенитот на нивната кариера и премиерно во земјата, а оваа карактеристика на фестивалот е посебен акцентирана на годинешното славеничко издание. За прославата на овој значаен јубилеј, илјадниците посетители на овој настан ги очекува и најгламурозното издание досега со врвна продукција и ексклузивно подготвени сценски визуализации.
Спектакуларното отворање на фестивалот вечерва ќе го предводи апсолутниот лидер на современата светска електронска сцена, Пол Калкбренер, чиј настап ќе почне во хедлајнерскиот термин на вечерта, од 1.45 часот. Врвниот уметник, кој важи за институција на светската техносцена, гостува премиерно во Македонија, и тоа во рамките на неговата актуелна светска турнеја Parts Of Life, која веќе брои повеќе од 60 настапи во светот и речиси сите од нив целосно се распродадени. Како еден од најголемите светски електронски продуценти, Пол Калкбренер познат е по хедлајнерските настапи на најголемите фестивали и стадионски спектакли пред стотици илјади луѓе, кои пред него беа резервирани само за најголемите светски бендови, како што се „Ролинг стоунс“ и „У2“. Уште поголема ексклузивност на овој настан е и фактот дека станува збор за диџеј-продуцент кој настапува исклучиво во живо правејќи ги неговите сетови секогаш непредвидливи и високо ценето доживување на современата електронска сцена.
Важна информација за сите посетители на „Грин бич“ е дека при доаѓање на фестивалот билетите треба да ги заменат за соодветна фестивалска белезица, со која им е овозможен влезот на настанот. Замената на билетите за белезици ќе се спроведува на официјалното заменско место лоцирано пред влезот на фестивалот, а кое ќе работи од 21 до 4 часот. Поради огромниот интерес и големиот број посетители што пристигнуваат во Струга за овој настан, ги советуваме посетителите да дојдат што порано на настанот со цел да го избегнат метежот на заменското место и чекањето во редици за влез на фестивалот.
За безгрижна забава „Грин бич“ и оваа година апелира до своите посетители да не возат под дејство на алкохол и да ги остават своите возила дома, а за доаѓање на настанот да го искористат и организираниот превоз, кој на секои 30 минути во периодот од 22 до 5 часот ќе сообраќа на релација Охрид – Струга – Охрид, со цена од 70 денари за билет во еден правец. Автобусите од организираниот превоз од Охрид поаѓаат и се враќаат на постојката кај „Тим маркет“ (спроти градскиот пазар).
Оние што допрва планираат да купуваат билети за „Грин бич“, претпродажбата се одвива преку мрежата на „МК тикетс“, а билетарницата на фестивалот ќе работи од 21 часот. Сите детали за цените и разните понуди на билети се достапни на овој линк.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Центарот за култура „Трајко Прокопиев“ втора Меѓународна изложба на уметничка фотографија Мотус 2025
Здружението за промоција на интелектуални, мултикултурни и спортски вредности – Мотус од Куманово, преку својот Фото клуб – Мотус, во период од 18 декември (четврток) 2025 во просториите на Центар за култура „Трајко Прокопиев“ во Куманово, ќе ја организира втората Меѓународна изложба на уметничка фотографија Мотус 2025.
На изложбата ќе бидат изложени пеесетина фотографии. Учество зедоа 249 автори од 50 земји.

Финансиер на изложбата е Општина Куманово, преку програмата за подршка на културни манифестации за 2025 година, а истата е под патронат на Меѓународната Федрација на Фотографска Уметност (ФИАП 2025/393), (Фото Сојуз на Македонија (ФСМ 2025/003) и Меѓународна Фото Асоцијација Дунав (ДИПА 2025/054).
Изложбата ќе биде отворена на 18 (четврток) декември 2025 во 19:30 часот во просториите на Центар за култура „Трајко Прокопиев“ во Куманово.
Култура
„Интер(но)фејс“ на Борис Шемов во „Мала станица“
На 18 декември 2025 година, со почеток во 20.00 часот, во Мултимедијалниот центар „Мала станица“, во рамките на програмските активности на Националната галерија, ќе биде отворена изложбата „Интер(но)фејс“ на уметникот Борис Шемов, курирана од д-р Ана Франговска.
„Интер(но)фејс“ е мултимедијален проект кој се фокусира на односот меѓу човекот и вештачката интелигенција, на улогата на јазикот како визуелно, идеолошко и комуникациско средство, како и на пост-интернет естетиката како нова културна реалност. Преку различни медиумски форми – текстуални интервенции, видео-содржини, алгоритамски и дигитални процеси – изложбата отвора прашања за моќта, контролата, технологијата и трансформацијата на субјектот во современиот дигитален контекст.
Насловот „Интер(но)фејс“ упатува на двојната природа на интерфејсот – како техничка површина на комуникација меѓу човекот и машината, но и како внатрешен, идеолошки простор во кој се преговараат значењата, одлуките и позициите на моќ. Изложбата го третира интерфејсот не само како функционален медиум, туку како критичка зона на судир меѓу човечкото искуство и алгоритамската логика.
Проектот се надоврзува на актуелните уметнички и теориски дискурси за постхуманизмот, визуелната култура и дигиталната медијација на реалноста. Во таа рамка, „Интер(но)фејс“ ја поставува вештачката интелигенција не како неутрален технолошки алат, туку како активен фактор во креирањето на современите културни, политички и етички релации.
Изложбата „Интер(но)фејс“ може да се посети во периодот од 18 до 24 декември 2025 година во Мултимедијалниот центар „Мала станица“, Национална галерија, Скопје.
Култура
Концерт на Драган Ѓорѓевиќ-Сузуки и Дино Имери во Музејот на македонската борба
На 17 декември (среда), со почеток во 20 часот, во амбиентот на Музејот на македонската борба, ќе се одржи концерт на двајцата истакнати уметници од регионалната и меѓународната сцена – виолончелистот Драган Ѓорѓевиќ Сузуки, еден од најценетите и највлијателни виолончелисти во регионот, и пијанистот Дино Имери, волшебникот на пијаното.
Сузуки е препознатлив по својата извонредна техничка виртуозност, длабока музикалност и силно сценско присуство, а критиката и публиката го вбројуваат меѓу најдобрите виолончелисти на Балканот. Заедно со Дино Имери, еден од најреномираните македонски пијанисти, тие носат концертна вечер од врвен уметнички ранг.
Публиката ќе има можност да ужива во внимателно избрана програма со дела од: Бетовен, Шнитке, Шуман, Дебиси, како и композиции од Имери Илкоска, носејќи свеж и современ израз во концертната вечер.
Концертот е со слободен влез, претставувајќи ретка можност за љубителите на класичната музика да доживеат висок уметнички квалитет и инспиративна интерпретација.

