Македонија
Хелсиншки: Работодавачите имаат обврска да спречат негативни последици врз здравјето на работниците

Имајќи го предвид прогласувањето на портокалова фаза на територијата на цела држава до 14 август оваа година, Хелсиншкиот комитет за човекови права потенцира дека работодавачите имаат обврска да ги преземат сите мерки со цел да спречат негативни последици врз здравјето на работниците кои се изложени на високи температури. Согласно Акцискиот план за превенирање на последиците од топлотните бранови, се препорачува ослободување од работните обврски на најранливите групи население, како што се – бремените жени и лицата на возраст над 60 години. Дополнително, сите правни субјекти што вршат работи на отворено, а особено градежните работници, треба да ги запрат активностите во периодот од 11 до 17 часот.
Топлинскиот стрес претставува сериозна закана за животот и здравјето на работниците. Оттука, неопходно е да се спроведат проверки на соодветноста на вентилацијата и климатизацијата на работните места, да се обезбеди минимум една климатизирана просторија, каде вработените можат да се разладуваат во текот на работата и да има почести паузи во текот на работата со доволно разладени течности за пиење. Хелсиншкиот комитет препорачува значително да се намали интензитетот на работа и нормите во производството, да не се дозволува прекувремена работа и да има прекин на работата при потреба. Ги поттикнуваме работниците и сите граѓани да пријават непочитување на препораките, или доколку забележат симптоми на топлотен удар кај работниците.
„Во исто време апелираме до работодавачите да обезбедат соодветни лични заштитни средства, да се запознаат работниците со ризикот на работното место од високи температури и да се посвети посебно внимание и надзор при работа со хемиски материи поради поголема опасност од интоксикација. Хелсиншкиот комитет за човекови права се обрати до Државниот инспекторат за труд и побара да ги зголеми своите теренски контроли во овој период со цел утврдување и казнување на неправилностите. Сите оние кои сакаат да пријават непочитување на препораките, можат да се јават во Државниот инспекторат за труд на 02 311 6110″, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.
Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.